ທ່ານ ແພງສະຫວັນ ແກ້ວປະເສີດ ຫົວໜ້າຫ້ອງການຄະນະກຳມະການຊາຍແດນແຫ່ງຊາດ , ກະຊວງການຕ່າງປະເທດ ໄດ້ຖະແຫລງຕໍ່ສື່ມວນຊົນ ໃນວັນທີ 17 ສິງຫານີ້ ເຖິງບັນຫາຂໍ້ຂັດແຍ່ງເຂດຊາຍແດນລະຫວ່າງລາວ ແລະ ກຳປູເຈຍ ທີ່ເຂດຊາຍແດນເມືອງສະໜາມໄຊ ແຂວງອັດຕະປື ກັບ ເມືອງແສນປາງ,ແຂວງຊຽງແຕງ ວ່າ: ເປັນບໍລິເວນຊາຍແດນທີ່ຄົງຄ້າງ ແກ້ງຕໍມໍຄອຍ-ຫ້ວຍຕະເງົາ ເຊິ່ງບໍລິເວນດັງກ່າວ ທັງສອງຝ່າຍຍັງບໍ່ໄດ້ສຳຫຼວດ ແລະ ກຳນົດທິດເນັ່ງເສັ້ນຊາຍແດນ ແລະ ການນຳຂັ້ນສູງທັງສອງປະເທດ ກໍ່ໄດ້ຕົກລົງເປັນເອກະພາບກັນວ່າ ເປັນຈຸດຄົງຄ້າງມິດຕະພາບ ແລະ ຫ້າມບໍ່ໃຫ້ມີການດຳເນີນກິດຈະການໃດໆຂອງຝ່າຍໃດຝ່າຍໜຶ່ງແລະ ໃຫ້ຮັກສາບໍລິເວນນີ້ໃຫ້ຢູ່ໃນສະພາບເດີມ ຈົນກວ່າທັງສອງຝ່າຍຈະຕົກລົງກຳນົດເຂດເສັ້ນຊາຍແດນ ແລະ ປັກຫຼັກໝາຍຊາຍແດນສຳເລັດກ່ອນ.
ທ່ານ ກ່າວຕື່ມກ່ອນໜ້ານີ້ ໃນວັນທີ 12 ສິງຫາ 2017 ຜ່ານມາ ທ່ານ ສົມເດັດອັກຄະມະຫາເສນາບໍດີເຕໂຈ ຮຸນເຊນ ນາຍົກລັດຖະມົນຕີແຫ່ງຣາຊະອານາຈັກກໍາເຈຍ ແລະ ຄະນະຜູ້ແທນຂັ້ນສູງຂອງກຳປູເຈຍ ໄດ້ເດີນທາງມາ ສປປ ລາວ ທັນທີ່ ເພື່ອປືກສາຫາລື ກັບ ທ່ານ ທອງລຸນ ສີສຸດລິດ ນາຍົກລັດຖະມົນຕີ ແລະ ການນໍາຂັ້ນສູງຂອງ ສປປ ລາວ ຊອກຊ່ອງທາງແກ້ໄຂບັນຫາຊາຍແດນລະຫວ່າງສອງປະເທດທີ່ກຳລັງເຄັ່ງຮ້ອນ ເຊິ່ງລັດຖະບານຂອງທັງສອງປະເທດກໍ່ໄດ້ປຶກສາຫາລືກ່ຽວກັບແນວທາງບັນຫາຊາຍແດນລະຫວ່າງແຂວງອັດຕະປືສປປ ລາວ ກັບ ແຂວງຊຽງແຕງ ຣາຊະອານາຈັກກຳປູເຈຍ ຢ່າງກົງໄປກົງມາ ຖານມິດຕະພາບ, ບ້ານພີ່ເມືອງນ້ອງທີ່ມີມູນເຊື້ອພົວພັນທີ່ດີມາແຕ່ດົນນານ.
ຜົນຂອງການເຈລະຈາທັງສອງຝ່າຍເຫັນດີຖອນກຳລັງທີ່ບໍ່ທັນຖອນໝົດ ໂດຍທັງສອງຝ່າຍເຫັນດີເປັນເອກະພາບມອບໃຫ້ກະຊວງການຕ່າງປະເທດ ກໍ່ຄືຄະນະກຳມະການຊາຍແດນຮ່ວມລາວ-ກຳປູເຈຍ ສືບຕໍ່ພົບປະ ແລະ ເຈລະຈາແກ້ໄຂຈຸດຊາຍແດນທີ່ຍັງຄົງຄ້າງ ແລະ ໃຫ້ປັກຫຼັກໝາຍຮ່ວມກັນໂດຍໄວເທົ່າທີ່ຈະໄວໄດ້ ເຊິ່ງອີງໃສ່ຜົນສຳເລັດທີ່ຜ່ານມາ ແລະ ອີງຕາມເອກະສານ ແລະ ຫຼັກຖານທີ່ກ່ຽວຂ້ອງທີ່ສອງຝ່າຍໄດ້ຮັບຮອງເອົາຮ່ວມກັນແລ້ວ, ລວມທັງສັນຍາ ແລະ ແຜນທີ່ຂອງສອງປະເທດທີ່ມີຢູ່ໃນປັດຈຸບັນເປັນພື້ນຖານໃນການປຶກສາຫາລືໃນຂັ້ນຕໍ່ໄປ . ພ້ອມທັງໄດ້ຕົກລົງເຫັນດີຈະສືບຕໍ່ສ້າງເງື່ອນໄຂໃຫ້ມີການປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນຢ່າງເປັນປົກກະຕິ ເພື່ອຮ່ວມກັນແກ້ໄຂບັນຫາລະຫວ່າງສອງປະເທດ,ທ່ານ ແພງສະຫວັນ ແກ້ວປະເສີດ ກ່າວ
ທ່ານ ກ່າວຕື່ມວ່າ: ລາວ ແລະ ກໍາປູເຈຍ ມີຊາຍແດນຕິດຈອດກັນທັງໝົດ 535 ກິໂລແມັດ, ເບື້ອງ ສປປ ລາວ ມີແຂວງຈໍາປາສັກ ແລະ ແຂວງອັດຕະປຶ, ເບື້ອງກຳປູເຈຍມີແຂວງເພຣຍວິເຮຍ, ແຂວງຊຽງແຕງ ແລະ ລັດຕະນະຄີຣີ. ໃນປີ 1995 ລັດຖະບານທັງສອງປະເທດໄດ້ຕົກລົງກັນໃຫ້ມີການສຳຫຼວດ ແລະ ປັກຫຼັກໝາຍຊາຍແດນຮ່ວມກັນ ໂດຍໄດ້ຕົກລົງຮັບຮອງເອົາ 4 ຫຼັກການເພື່ອເປັນພື້ນຖານໃຫ້ແກ່ການສຳຫຼວດ ແລະ ປັກຫຼັກໝາຍຊາຍແດນຮ່ວມກັນດັ່ງນີ້:
1. ບົນພື້ນຖານຮັບຮູ້ເຂດແດນຕິດຕໍ່ກັນ, ເຂດແດນທີ່ມີມາແຕ່ເມື່ອຄາວຫົວເມືອງຂຶ້ນປະໄວ ໂດຍອີງຕາມແຜນທີ່ 1/100 000 ແລະ ແຜນທີ່ອື່ນໆທີ່ກ່ຽວຂ້ອງພິມອອກແຕ່ປີ 1933-1953 ໂດຍຜະແນກແຜນທີ່ຂອງອິນດູຈີນ.
2. ບົນພື້ນຖານຫຼັກການຕ່າງໆທີ່ສາກົນຮູ້ຮັບກ່ຽວກັບການຂີດເສັ້ນຊາຍແດນ
3. ບົນພື້ນຖານຄໍານຶງເຖິງເຂດທີ່ປະຊາຊົນຄຸ້ມຄອງຕົວຈິງທີ່ສືບທອດກັນມາຫຼາຍເຊັ່ນຄົນແລ້ວ
4. ບົນພື້ນຖານຂອງຄວາມສະເໝີພາບ, ທ່ຽງທໍາສົມເຫດສົມຜົນ, ຜ່ອນສັ້ນຜ່ອນຍາວໃຫ້ກັນ, ເຄົາລົບສິດ ແລະ ຜົນປະໂຫຍດຂອງກັນ ແລະ ເປັນເອກະພາບຢ່າງສົມບູນ.
ເພື່ອເຮັດໃຫ້ຊາຍແດນຂອງທັງສອງປະເທດມີຄວາມຈະແຈ້ງ ແລະ ຊັດເຈນຕະຫຼອດການ, ເພື່ອເປັນມູນມໍລະດົກຕົກທອດໃຫ້ແກ່ອານຸຊົນລຸນຫຼັງໃຫ້ສືບທອດກັນຕໍ່ໄປ, ໃນປີ 2000 ເປັນຕົ້ນມາທັງສອງຝ່າຍໄດ້ຮ່ວມກັນສຳຫຼວດທິດເນັ່ງເສັ້ນຊາຍແດນສຳເລັດປະມານ 87% ຂອງລວງຍາວຊາຍແດນທັງໝົດ ແລະ ໄດ້ກໍ່ສ້າງຫຼັກແດນຈຳນວນ 121 ຫຼັັກໝາຍ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment