ພິທີເປີດການນຳໃຊ້ ສວນສາທາລະນະ ໜູຮັກ ພູມສະຫວັນ ໄດ້ຈັດຂຶ້ນໃນຕອນບ່າຍຂອງວັນທີ 24 ສິງຫາ 2017 ໂດຍການໃຫ້ກຽດເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ຄຳເຜີຍ ຜັນທະຈອນ ປະທານສະພາປະຊາຊົນແຂວງ, ມີບັນດາທ່ານຮອງເຈົ້າແຂວງ, ບັນດາທ່ານຫົວໜ້າພະແນກການອ້ອມຂ້າງ, ທ່ານເຈົ້າເມືອງ, ຕະຫຼອດຮອດມວນຊົນຊາວເມືອງໄກສອນພົມວິຫານ ກໍ່ໄດ້ເປັນກຽດເຂົ້າຮ່ວມ. ພິເສດຍັງມີທ່ານກົງສຸນໃຫຍ່ແຫ່ງ ສ.ສ ຫວຽດນາມ ແລະຣາຊະອານາຈັກໄທ ປະຈຳແຂວງສະຫວັນນະເຂດ ກໍ່ໄດ້ເປັນກຽດເຂົ້າຮ່ວມໃນງານຄັ້ງນີ້ດ້ວຍ.
ທ່ານ ນາງ ທູນສະຫວັນ ສີຈັນທອງທິບ ຜູ້ອຳນວຍການບໍລິສັດ ເທບໄຊສິນກໍ່ສ້າງ ຈຳກັດ ໄດ້ລາຍງານສະພາບການດຳເນີນການກໍ່ສ້າງ ໃນຕະຫຼອດໄລຍະຜ່ານມາ ໂດຍສັງເຂບດັ່ງນີ້: ການກໍ່ສ້າງສວນສາທາລະນະເພື່ອສຸຂະພາບ ໜູຮັກ ພູມສະຫວັນ ເມືອງໄກສອນພົມວິຫານ ຕັ້ງຢູ່ບ້ານທ່າເມືອງ (ເດີ່ນບານເກົ່າ ກຸວໍລະວົງ) ມີເນື້ອທີ່ເກືອບ 25 ພັນຕາແມັດ, ເຊິ່ງໂຄງການດັ່ງກ່າວ ໄດ້ເລີ່ມລົງມືກໍ່ສ້າງມາແຕ່ເດືອນມັງກອນ 2016 ເປັນຕົ້ນມາ. ໜ້າວຽກທີໄດ້ຈັດຕັ້ງປະຕິບັດ ປະກອບດ້ວຍ: ວຽກທຸບ-ມ້າງກຳແພງເດີ່ນບານເກົ່າ ພ້ອມທັງອະນາໄມ, ວຽກກໍ່ສ້າງສວນ, ທາງລົດຖີບ, ທາງຄົນຍ່າງ-ແລ່ນ, ເດີ່ນກາງແຈ້ງ, ສວນຫຍ້າອະເນກປະສົງ, ຕົບແຕ່ງປູກຕົ້ນໄມ້ ແລະສວນດອກໄມ້, ກໍ່ສ້າງນ້ຳພຸ, ຮ່ອງລະບາຍນ້ຳ, ຮາວກັນຕົກ, ວຽກໄຟຟ້າ, ນ້ຳປະປາ ແລະວຽກອື່ນໆ ທີ່ຕິດພັນເຊັ່ນ: ປ້າຍເຕືອນ, ຕັ່ງນັ່ງສາທາລະນະ, ບ່ອນຈອດລົດ ແລະອື່ນໆ ລວມໄລຍະການກໍ່ສ້າງ 18 ເດືອນ, ໃຊງົບປະມານທັງໝົດ 23,5 ຕື້ກີບ, ໂດຍນຳໃຊ້ງົບປະມານລົງທຶນທີ່ສະພາອະນຸມັດ.
ຈາກນັ້ນ ທ່ານ ບຸນຍູ້ ທຳມະວົງ ເຈົ້າເມືອງໄກສອນ
ພົມວິຫານ ໃນນາມເຈົ້າຂອງໂຄງການ ກໍ່ໄດ້ສະແດງຄວາມຂອບອົກຂອບໃຈ ຕໍ່ການນຳ
ພັກ-ລັດ ທີ່ເຫັນໄດ້ຄວາມສຳຄັນຂອງສວນສາທາລະນະແຫ່ງດັ່ງກ່າວນີ້ວ່າ: ເມືອງໄກສອນພົມວິຫານ
ເປັນເມືອງເທດສະບານຂອງແຂວງ, ມີຜູ້ຄົນຈຳນວນຫຼວງຫຼາຍອາໃສຢູ່, ຜູ້ຄົນສ່ວນໃຫຍ່ເປັນຄົນທຳງານ
ດັ່ງນັ້ນ ສວນດັ່ງກ່າວນີ້ ຈຶ່ງເປັນບ່ອນພັກຜ່ອນ, ເປັນສະຖານທີ່ອອກກຳລັງກາຍ,
ບ່ອນພົບປະຂອງຜູ້ຄົນທຸກເພດທຸກໄວ ແລະເປັນບ່ອນຈັດກິດຈະກຳຕ່າງໆຢູ່ທີ່ສວນແຫ່ງນີ້,
ເຮັດໃຫ້ເມືອງໄກສອນພົມວິຫານ ກາຍເປັນນະຄອນຢ່າງສົມບູນແບບ ໃນອີກບໍ່ພໍເທົ່າໃດເດືອນຂ້າງໜ້ານີ້.
ສຸດທ້າຍ ທ່ານເຈົ້າເມືອງໄກສອນພົມວິຫານ ຍັງໄດ້ຮຽກຮ້ອງມາຍັງ ອຳນາດການປົກຄອງ,
ພໍ່ແມ່ປະຊາຊົນຊັ້ນຄົນຕ່າງໆ ຈົ່ງຮ່ວມກັນປົກປັກຮັກສາ ແລະນຳໃຊ້ໃຫ້ເກີດປະໂຫຍດສູງສຸດ
ແລະນຳໃຊ້ໃຫ້ຍາວນານ.
ຈາກນັ້ນ ທ່ານເຈົ້າແຂວງສະຫວັນນະເຂດ ທ່ານ ສັນຕິພາບ ພົມວິຫານ ພ້ອມດ້ວຍການນຳຂອງແຂວງ ກໍ່ໄດ້ຮ່ວມກັນລັ່ນຄ້ອງ 9 ບາດ, ພ້ອມທັງເປີດປ້າຍ ສວນສາທາລະນະ ໜູຮັກ ພູມສະຫວັນ ຢ່າງເປັນທາງການ, ພ້ອມກັນນັ້ນ ບັນດາກິດຈະກຳຕ່າງໆ ເປັນຕົ້ນ: ຂະບວນກອງຕຸ້ມ-ກອງຫາງ, ຂະບວນຟ້ອນ, ຂະບວນລົດຖີບ, ການເຕັ້ນແອວໂລບິກ ກໍ່ໄດ້ເລີ່ມການສະແດງ ພ້ອມທັງສະໂມສອນຈ້ອງບິນລາວ ກໍ່ໄດ້ມີການສະແດງຢູ່ເທິງອາກາດ, ສ້າງຄວາມຄຶກຄື້ນມ່ວນຊື່ນແກ່ມວນຊົນທີ່ເຂົ້າຮ່ວມ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment