ສປປ ເກົາຫຼີ ປະກາດພ້ອມປະເຊີນໜ້າກັບສັດຕູ ຫາກມີບັນຫາເກີດຂຶ້ນ

ຈາກການເຂົ້າມາມີສ່ວນຮ່ວມຂອງບັດດາປະເທດໃນການຫັກຫ້າມສະຖານະການລະຫວ່າງ ສປປ ເກົາຫຼີ(ເກົາຫຼີເໜືອ)ກັບອາເມລິກາໄດ້ເຮັດໃຫ້ ສະພາບຄວາມເຄັ່ງຕຶງໃນແຫຼມສະໝຸດເກົາຫຼີເລີ່ມຈະຜ່ອນຄາຍລົງໄປແລ້ວ ແຕ່ຫຼ້າສຸດທາງການ ສປປ ເກົາຫຼີປະກາດເຕືອນການຊ້ອມຮົບລະຫວ່າງອາເມລິກາ ແລະ ສ ເກົາຫຼີໃນວັນທີ 21 ສິງຫານີ້ ອາດກະຕຸ້ນໃຫ້ເກີດສົງຄາມນີວເຄລຍ.

ການປະກາດນີ້ໄດ້ຕີພິມໃນໜັງ ສືພິິມ ໂຮດົງ ຊິມມຸນ ຂອງທາງການສປປ ເກົາຫຼີ 1 ມື້ ກ່ອນທີ່ອາເມລິກາ ແລະ ສ ເກົາຫຼີຈະມີການຊ້ອມຮົບຮ່ວມກັນຊຶ່ງຈະມີໃນມື້ນີ້(ວັນທີ 21/2017) ທາງການສປປ ເກົາຫຼີຍັງປະກາດຕື່ມວ່າ ກອງທັບສປປ ເກົາຫຼີສາມາດໂຈມຕີອາເມລິກາໄດ້ທຸກເວລາແບບໄຮ້ຄວາມປານີ ບໍ່ວ່າຈະເປັນເກາະກວມ, ຮາວາຍ ແລະ ແຜ່ນດິນອາເມລິກາ. ກ່ອນໜ້ານີ້ທາງສປປ ເກົາຫຼີປະກາດແຜນກຽມໂຈມຕີເກາະກວມຊຶ່ງຢູ່ໃນອານາເຂດຂອງອາເມລິກາດ້ວຍ ມິສໄຊ 4 ລູກ ແຕ່ທ່ານ ຄິມ ຈອງອຶນ ຜູ້ນຳສປປ ເກົາຫຼີ ປະກາດທົບທວນແຜນ ໂດຍຂໍເບິ່ງທ່າທີຂອງອາເມລິກາກ່ອນຈະຕັດສິນໃຈລົງມື.

ນອກຈາກນີ້ ຄຳປະກາດຫຼ້າສຸດທີ່ລະບຸວ່າ ການຊ້ອມຮົບຈະເກີດຂຶ້ນນີ້ ເປັນການກະທຳທີ່ບໍ່ຄິດໜ້າຄິດຫຼັງ ແລະ ອາດເຮັດໃຫ້ເກີດສົງຄາມນິວເຄລຍທີ່ບໍ່ສາມາດຄວບຄຸມໄດ້ ຂະນະທີ່ກອງທັບສປປ ເກົາຫຼີຈັບຕາເບິ່ງຄວາມເຄື່ອນໄຫວນຂັ້ນສູງສຸດ ພ້ອມປະເຊີນໜ້າກັບສັດຕູ ແລະ ພ້ອມເຄື່ອນໄຫວທຸກເວລາຫາກມີເຫດການພຽງເລັກນ້ອຍເກີດຂຶ້ນ.