ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງຄະນະສະຖາບັນດ້ານການເງິນ ແລະ ການປ່ອຍເງິນກູ້, ຄະນະທະນາຄານຈາກໄຕ້ຫວັນ ສປຈີນ ແລະ ທະນາຄານຈາກ ສສ ຫວຽດນາມ ຊຶ່ງນຳພາຄະນະໂດຍ ທ່ານ ເຈມ (James) ຮອງປະທານອາວຸໂສທະນາຄານ ຄາເທຢູໄນເຕັດ ໄຕ້ຫວັນ ສປ ຈີນ, ພ້ອມດ້ວຍຄະນະວິຊາການເຂົ້າຮ່ວມ ໃນອາທິດຜ່ານມາ ທີ່ກະຊວງການເງິນ.
ທັງນີ້, ເນື່ອງຈາກວ່າທະນາຄານດັ່ງກ່າວ ມີຄວາມສົນໃຈຢາກຈະມາລົງທຶນຢູ່ ສປປ ລາວ ດ້ານການເງິນ, ການປ່ອຍເງິນກູ້ ແລະ ອື່ນໆ.
ໂອກາດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ການຕ້ອນຮັບ ແລະ ສະແດງຄວາມຄວາມຂອບໃຈ ມາຍັງບັນດາສະຖາບັນການເງິນ ແລະ ການປ່ອຍເງິນກູ້, ບັນດາທະນາຄານຈາກໄຕ້ຫວັນ ສປ ຈີນ ແລະ ທະນາຄານຈາກ ສສ ຫວຽດນາມ ທີ່ມີຄວາມສົນໃຈຢາກຈະມາລົງທຶນຢູ່ ສປປ ລາວ ດ້ານການເງິນ ແລະ ອື່ນໆ.
ປັດຈຸບັນ ສປປ ລາວ ກຳລັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ເພື່ອແກ້ໄຂຄວາມທຸກຍາກຂອງປະຊາຊົນ ໃຫ້ດີຂຶ້ນເທື່ອລະກ້າວ ແລະ ໃນປີ 2020 ສປປ ລາວ ຈະໃຫ້ຫລຸດພົ້ນ ອອກຈາກສະຖານະພາບ ປະເທດດ້ອຍພັດທະນາ ແລະ ໃຫ້ເສດຖະກິດມະຫາພາກ ມີການສືບຕໍ່ຂະຫຍາຍຂະຫຍາຍຕົວຢ່າງຕໍ່ເນື່ອງ, ໂດຍສະເລ່ຍປີໜຶ່ງເພີ່ມຂຶ້ນ10% ຂອງແຜນການ 5 ປີ. ໃນນັ້ນຈະໄດ້ຈະສຸມໃສ່ຂະແໜງການຕ່າງໆ ເປັນຕົ້ນ ແມ່ນຊຸກຍູ້ຂະແໜງການກະສິກຳໃຫ້ມີການພັດທະນາແບບຍືນຍົງ, ສຸມໃສ່ການຜະລິດການກະເສດປອດສານພິດ, ຂະແໜງອຸດສາຫະກຳ, ພະລັງງານໄຟຟ້າ, ບໍ່ແຮ່, ການບໍລິການທາງດ້ານການສົ່ງ, ການບໍລິການທາງດ້ານການຄ້າ, ການທ່ອງທ່ຽວ ແລະ ອື່ນໆ.
ແຫລ່ງຂ່າວຈາກກະຊວງການເງິນ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment