ກະຊວງການເງິນຄາດຄະເນວ່າໝົດປີ 2017 ຈະສາມາດເກັບລາຍຮັບທັງໝົດໄດ້ 23.489 ຕື້ກີບ ຫລື ເທົ່າກັບ 98,1% ຂອງແຜນການປີ. ສ່ວນລາຍຈ່າຍຄາດການປະຕິບັດປະມານ 31.508 ຕື້ກີບ.
ຂະນະທີ່ 6 ເດືອນຕົ້ນປີ 2017 ນີ້ ປະຕິບັດລາຍຮັບໄດ້ແລ້ວ 10.365 ກວ່າຕື້ກີບ ເທົ່າກັບ 43,29% ຂອງແຜນການປີ ໃນນັ້ນລາຍຮັບພາຍໃນ 9.446 ຕື້ກວ່າກີບ, ຢູ່ສູນກາງປະຕິບັດໄດ້ 7.491 ຕື້ກວ່າກີບ, ທ້ອງຖິ່ນປະຕິບັດໄດ້ 1.954 ຕື້ກວ່າກີບ. ສ່ວນລາຍຈ່າຍປະຕິບັດໄດ້ 12.615 ກວ່າຕື້ກີບ, ຢູ່ສູນກາງ 8.394 ຕື້ກວ່າກີບ ແລະ ທ້ອງຖິ່ນ 4.221 ຕື້ກວ່າກີບ.
ທ່ານ ສົມດີ ດວງດີ ຮອງນາຍົກລັດຖະມົນຕີີ ລັດຖະມົນຕີກະຊວງການເງິນ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ່ 4 ຂອງສະພາແຫ່ງຊາດຊຸດທີ VIII ໃນວັນທີ 16 ຕຸລາ 2017 ນີ້ ກ່ຽວກັບການຈັດຕັ້ງປະຕິບັດງົບປະມານ 6 ເດືອນຕົ້ນປີ, ຄາດຄະເນໝົດປີ 2017 ແລະ ທິດທາງຄາດໝາຍແຜນງົບປະມານແຫ່ງລັດ ປະຈໍາປີ 2018 ວ່າ: ລັດຖະບານຈະສູ້ຊົນໃຫ້ສາມາດຈັດເກັບລາຍຮັບໝົດປີ 2017 ໃຫ້ໄດ້ຕາມຄາດຄະເນ, ດໍາເນີນມາດຕະການທາງດ້ານລາຍຈ່າຍ ໃຫ້ມີຄວາມຮັດກຸມ ແລະ ເອົາໃຈໃສ່ ການປະຕິບັດນະໂຍບາຍປະຢັດມັດທະຍັດ ໃຫ້ເປັນຮູບປະທໍາ, ພ້ອມທັງລະດົມທຶນເພື່ອມາດຸ່ນດ່ຽງງົບປະມານ ໃຫ້ພຽງພໍ ຈາກບັນດາແຫລ່ງທຶນຕ່າງໆ ທັງພາຍໃນ ແລະ ຕ່າງປະເທດ.
+ດ້ານລາຍຮັບ: ລາຍຮັບທັງໝົດຄາດຄະເນ ຈະໄດ້ປະມານ 23.489 ຕື້ກີບ ເທົ່າກັບ 98,1% ຂອງແຜນການປີ; ໃນນັ້ນ ລາຍຮັບຊ່ວຍເຫຼືອລ້າ 103% ຂອງແຜນການປີ ແລະ ລາຍຮັບພາຍໃນ 20.923 ຕື້ກີບ ເທົ່າກັບ 97,5% ຂອງແຜນການປີ.ລາຍຮັບໄດ້ຈາກຂະແໜງການ ສ່ວຍສາອາກອນຄາດຄະເນ ຈະໄດ້ 95% ຂອງແຜນການປີ, ພາສີ ຈະໄດ້ 100%, ຄຸ້ມຄອງພັດທະນາລັດວິສາຫະກິດ ແລະ ການປະກັນໄພ 103%, ຄຸ້ມຄອງຊັບສິນຂອງລັດ 95% ຂອງແຜນການປີ ແລະ ລາຍຮັບອື່ນໆ 49.2 ຕື້ກີບ.
+ ດ້ານລາຍຈ່າຍ: ລາຍຈ່າຍທັງໝົດ ຄາດຄະເນ ປະມານ 31.508 ຕື້ກີບ ເທົ່າກັບ 97,24% ຂອງແຜນການປີ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment