ເມື່ອໃດລາວເຮົາຈະທັນເພິ່ນ? ຂີ້ເຫຍື້ອໃນມືຖືໄປຫາກະຕ່າບໍ່ຍາກເກີນແຮງ

ແຫຼ່ງທ່ອງທ່ຽວທີ່ສວຍງາມ ແຕ່ວັນມີຜູ້ຄົນນັບແສນນັບລ້ານໄປແວ່ຢາມ(ແຄມຂອງທ່າວັດຈັນ ນະຄອນຫຼວງວຽງຈັນ) ໜ້າເສົ້າທີ່ແຄມທາງເປັນແບບນີ້ ຍ້ອນຄວາມມັກງ່າຍຂອງຄົນລາວເຮົາທີ່ຕິດນິໄສກິນແລ້ວແກວ່ງລົງພື້ນຄືຈົບເລື່ອງ. ບ້ານເຮົາສະຫງົບສຸກ ທຳມະຊາດຍັງສວຍງາມເປັນມິດກັບສິ່ງແວດລ້ອມຖ້າປະຊາຊົນຮ່ວມແຮງກັນຢ່າງນ້ອຍທີ່ສຸດມີຄວາມຮັບຜິດຊອບການກະທຳຂອງຕົນເອງ, ຮູ້ຖືຂີ້ເຫຍື້ອໃນມືໃຫ້ໄປຮອດໄປເຖິງກະຕ່າບ່ອນເພີ່ນກຳນົດໃຫ້ຖີ້ມ ພວກເຮົາຄົງສາມາດຮັກສາຄວາມງາມໃຫ້ລູກຫຼານໄດ້ສືບຕໍ່ໄປອີກຫຼາຍເຊັ່ນຄົນ.

ພັກ-ລັດເພິ່ນລົງທຶນມະຫາສານກໍ່ຕະຝັ່ງກັນເຈື່ອນ, ສ້າງຄວາມສະອາດສວຍງາມໃຫ້ກັບແຄມຂອງ ເພື່ອໃຫ້ປະຊາຊົນໄດ້ມີບ່ອນທ່ຽວຊົມທຳມາຫາກິນ, ມີບັນຍາກາດໃໝ່ ແຕ່ປະຊາຊົນຈຳນວນໜຶ່ງບໍ່ຮູ້ຈັກໃຫ້ຄວາມຮ່ວມມືຈິ່ງຖີ້ມຂີ້ເຫຍື້ອຊະຊາຍ, ຕະຫຼອດໄລຍະທາງສຸດສາຍຕາຈາກຕໍ່ໜ້າເຈົ້າອະນຸວົງຫາຂ້າງໂຮງແຮມແມ່ຂອງຈະມີຂີ້ເຫຍື້້ອກອງຂຶ້ນເປັນຈຸດໆ, ສ່ວນທີ່ຢາຍຕາມພື້ນຍັງບໍ່ນັບ, ເຫັນຫຍ້າຂຶ້ນຂຽວອອກດອກງາມສະຫງ່າ ແຕ່ທາງພື້ນຂີ້ເຫຍື້ອເຕັມອະຍະເບິ່ງແລ້ວບໍ່ຄັກໃຈ.

ກອງຂີ້ເຫຍື້ອເຫຼົ່ານີ້ສ່ວນໃຫຍ່ແມ່ນເສດຖົງຢາງ, ກະປອງ, ສິ່ງຫຸ້ມຫໍ່ອາຫານທັງນັ້ນ ສະແດງວ່າກິນແລ້ວຈາກປາກຄືດຶກລົງພື້ນເລີຍແລ້ວໃຜຈະເປັນຜູ້ເກັບ? ຖີ້ມໜ້າທີ່ຈຸດນີ້ໃຫ້ພາກສ່ວນກ່ຽວຂ້ອງຢ່າງດຽວບ້ານເຮົາຈະເປັນແນວໃດຕໍ່ໄປ ຖ້າປະຊາຊົນບໍ່ຮ່ວມມືກັນ??

ພາສິດລາວເພິ່ນວ່າໄວ້ "ໄມ້ລຳດຽວລ້ອມຮົ້ວບໍ່ໄຂວ່ໄຜ່ບໍ່ພ້ອມແປງບ້ານບ້ານບໍ່ເຮືອງ" ການຂາດຄວາມຮັບຜິດຊອບໃນສິ່ງທີ່ຕົນສ້າງຂຶ້ນ ແລະຖີ້ມໃຫ້ເປັນພາລະຄົນອື່ນ ຜູ້ໃດທີ່ຮູ້ສຶກເປັນແບບນັ້ນຄວນເກັບສຸພາສິດທ່ອນນີ້ໄປຄິດ ແລະໃຫ້ຄວາມຮ່ວມມືພາກສ່ວນກ່ຽວຂ້ອງຄົນລະໄມ້ລະມື ຖືສິ່ງເສດເຫຼືອຂອງໃຜຂອງລາວໄປໃຫ້ເຖິງກະຕ່າຂີ້ເຫຍື້ອ ຖ້າທຸກຄົນເຮັດໄດ້ ແຫຼ່ງທ່ອງທ່ຽວສວຍງາມ ຕະຫຼອດຮອດສະຖານທີ່ສະທາລະນະຢູ່ປະເທດເຮົາ ຄືຊິງົດງາມສະອາດໜ້າຢູ່ຫຼາຍຂຶ້ນ.