ໃນພິທີອັນສຳຄັນດັ່ງກ່າວ ທ່ານພັນໂທ ບຸນພອນ ຍອງສົມພຽນ ພະນັກງານບຳນານ ອາດີດຫົວໜ້າຫ້ອງການເມືອງ ກອງບັນຊາການທະຫານແຂວງຫົວພັນ ໄດ້ຂື້ນເລົ່າປາຖະກະຖາວັນປົດປ່ອຍຜາຖີ່ໃຫ້ຮູ້ວ່າ:ຜາຖີ່ເປັນເຂດຍຸດທະສາດທາງການທະຫານຂອງປະເທດລາວເວົ້າລວມ,ເວົ້າສະເພາະແມ່ນແຂວງຫົວພັນ ຊຶ່ງຕັ້ງຢູ່ທິດຕາເວັນອອກຂອງເມືອງຊຳເໜືອຫ່າງຈາກເທດສະບານຕົວເມືອງຊຳເໜືອ 60 ກິໂລແມັດ, ທາງອາກາດ 30 ກິໂລແມັດ, ມີຊາຍແດນຕິດກັບ 3 ເມືອງທິດໃຕ້ຕິດກັບເມືອງຫົວເມືອງ,ທິດເໜືອຕິດກັບເມືອງແອດ ແລະ ທິດຕາເວັນຕົກຕິດກັບເມືອງຊ່ອນ, ຜາຖີ່ເປັນຜາຫີນເອກະລາດທີ່ສູງຊັນມີຄວາມສູງປະມານ 1,687 ແມັດ ທຽບກັບໜ້ານ້ຳທະເລມີຄວາມສູງຈາກໜ້າດິນຂຶ້ນໄປປະມານ 200-800 ແມັດ ( ຈຸດຕ່ຳສຸດ 200 ແມັດ, ຈຸດສູງສຸດ 800 ແມັດ ), ເປັນກຳແພງຫີນທຳມະຊາດທີ່ມີຄວາມໜາແໜ້ນມີເສັ້ນທາງດຽວຂຶ້ນລົງຢູ່ເທີງຈອມຜາຖີ່, ມີຄວາມຍາວຂອງຜາຖີ່ 700 ແມັດ, ກ້ວາງ 500-3000 ແມັດ, ຂອບເຂດຄົນສາມາດຢູ່ໄດ້ 200 X 50 ແມັດ, ບໍລິເວນເບື້ອງນອກໄດ້ອ້ອມຈອດດ້ວຍບັນດາຈອມພູສູງຊັນກວມເຖີງ 99% ເປັນພູມີປະເທດທີ່ເໝາະສົມໃນການຕັ້ງສູນບັນຊາທາງດ້ານການທະຫານທີ່ສາມາດຄວບຄຸມໄດ້ທຸກພື້ນທີ່, ທຸກບັ້ນຮົບຢູ່ພາກເໜືອຂອງລາວ, ພາກເໜືອຫວຽດນາມ.ເປັນຕົ້ນແມ່ນແຂວງຫົວພັນ.
ຈຸດພູມີປະເທດດັ່ງກ່າວນີ້ພວກສັດຕູຈິ່ງໄດ້ໃຊ້ພູມີປະເທດທີ່ມີທຸລະກັນດານແຫ່ງນີ້ສ້າງເປັນທີ່ໝັ້ນຂອງກຸ່ມພວກປຸ້ນ ແລະ ປ້ອມບັນຊາການທາງອາກາດຂອງຈັກກະພັດອາເມລິກາ ແລະ ກຳລັງພິເສດວັງປາວພວກມັນໄດ້ຕັ້ງຈັກລາດາເພື່ອຊີ້ຈຸດທຳລາຍເຂດປົດປ່ອຍພາກເໜືອຂອງລາວ-ພາກເໜືອຂອງຫວຽດ ນາມ ແລະ ເຂດທີ່ໝັ້ນຂອງສູນກາງຢູ່ເມືອງຊຳເໜືອ-ວຽງໄຊ.
ຕໍ່ກັບສະພາບການດັ່ງກ່າວນີ້ຄະນະພັກການທະຫານສູນກາງໄດ້ເອກະພາບກັບຄະນະພັກການທະຫານຫວຽດນາມໄດ້ຕີລາຄາສະພາບການຂອງສັດຕູ ແລະ ຕັດສິນໃຈນຳໃຊ້ກຳລັງແຮງທີ່ມີເດັດດ່ຽວປົດປ່ອຍຜາຖີ່, ຕີດັບສູນເຮືອນຮັງຂອງກອງປຸ້ນວັງປາວ, ທຳລາຍສູນບັນຊາການທາງອາກາດຂອງພວກສັດຕູຢູ່ເທີງຜາຖີ່ ແລະ ບໍລິເວນອ້ອມຂ້າງໃຫ້ໄດ້ຢ່າງເດັດຂາດສະນັ້ນຄະນະພັກການທະຫານສູນກາງ ແລະ ຄະນະພັກອຳນາດການປົກຄອງແຂວງຫົວພັນຈິ່ງໄດ້ແຕ່ງຕັ້ງເລຂາພັກແຂວງຫົວພັນ, ຄະນະພັກກອງບັນຊາການທະຫານແຂວງຫົວພັນເປັນຄະນະຊີ້ນຳດ້ານຮົບຂັ້ນແຂວງສົບທົບກັບຄະນະຊີ້ນຳດ້ານຮົບຂັ້ນສູນກາງ ແລະ ກອງທະຫານອາສາສະໝັກຫວຽດນາມກໍ່ໄດ້ເຄື່ອນໄຫວທັບເປີດສາກບຸກໂຈມຕີເລີກຮື້ເຮືອນຮັງຂອງສັດຕູຢູ່ບໍລິເວນຜາຖີ່ເຊິ່ງເລີ່ມໃນເວລາ 05:30 ໂມງເຊົ້າຂອງວັນທີ 11 ເດືອນ ມີນາ ປີ 1968 ໄດ້ຜັນແປໄປຢ່າງດຸເດືອດ, ຂ້ຽວຂາດ ແລະ ແກ່ຍາວເປັນເວລາ 116 ມື້, 116 ຄືນ ດ້ວຍນໍ້າໃຈອົງອາດກ້າຫານທົນທານໜຽວແໜ້ນ, ກ້າຕີ, ກ້າຊະນະສັດຕູ ແລະ ນໍ້າໃຈເສຍສະຫຼະອັນສູງສົ່ງຂອງກອງທັບ ແລະ ປະະຊາຊົນບັນດາເຜົ່າຂອງແຂວງຫົວພັນທີ່ປະກອບສ່ວນຊີວິດອິນຊີ ແລະ ວັດຖຸປະກອນຕ່າງໆເພື່ອຮັບໃຊ້ໃຫ້ແກ່ບັ້ນຣົບປົດປ່ອຍຜາຖີ່.
ກອງທັບ ແລະ ປະຊາຊົນຈິ່ງສາມາດປັດເຂ່ຍສັດຕູອອກຈາກວົງສູ້ຣົບໄດ້ 872 ບັກ, ຂ້າຕາຍ 350 ບັກ, ບາດເຈັບ 114 ບັກ, ຈັບສະເລີຍເສິກໄດ້ 117 ບັກ, ອອກມາຍອມ 261 ບັກ, ໃນນີ້ມີຂັ້ນຜູ້ບັນຊາການຈຳນວນໜື່ງ, ຕີທຳລາຍ 3 ກອງຮ້ອຍອາເຊຂອງສັດຕູ, ຍິງຍົນຕົກ 3 ລຳ, ຍຶດອາວຸດທຸກຊະນິດໄດ້ 219 ກະບອກ ແລະ ຜູ້ບັນຊາເຂດຜາຖີ່, ທີ່ປຶກສາວິຊາການເຕັກນິກຢູ່ສະຖານີລາດາໄດ້ 18 ບັກ, ໃຊ້ປືນກົນຍິງຍົນ T 28 ຂອງຈັກກະພັດອາເມລິກາຕົກ 1 ລຳ ແລະ ທຳລາຍຈັກລາດາຂອງພວກມັນ.
ໄຊຊະນະບັ້ນຣົບປົດປ່ອຍຜາຖີ່ແມ່ນໄຊຊະນະແຫ່ງຄວາມສາມັກຄີຮ່ວມສຳພັນສູ້ຣົບລະຫວ່າງກອງທັບປະຊາຊົນລາວ ແລະ ກອງທັບຫວຽດນາມ, ເປັນໄຊຊະນະນຳໃຊ້ສິລະປະຍຸດທະບັ້ນຣົບຢ່າງຖືກຕ້ອງ, ມີນໍ້າໃຈພິລະອາດຫານ, ຄວາມສາມັກຄີອັນໜຽວແໜ້ນແບບພິເສດລາວ-ຫວຽດນາມ ແລະ ນໍ້າໃຈເດັດດ່ຽວໜຽວແໜ້ນຄວາມເສຍສະຫຼະຂອງນັກຣົບກໍ່ຄືປະຊາຊົນບັນດາເຜົ່າທີ່ມີນໍ້າໃຈຮັກຊາດ, ຮັກບ້ານເກີດເມືອງນອນຕົນພ້ອມທັງປະຕິບັດແນວທາງປ້ອງກັນຊາດ, ປ້ອງກັນຄວາມສະຫງົບທົ່ວປວງຊົນຮອບ ດ້ານຂອງພັກ.
ແຫລ່ງຂ່າວຈາກແຂວງຫົວພັນ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment