ທ່ານ ນາງ ພູນຊັບ ພົນໂຍທາ ຫລື (ມີມີ່) ນາງງາມ ມິດສ ອິນເຕີເນເຊີແນວລາວ 2017, ໄດ້ຖືກຮັບເລືອກເປັນທູດວັດທະນະທຳ ຂອງລາວແຟຊັ້ນວິກ ປະຈຳປີ 2018 ຄົນໃໝ່ ຢ່າງເປັນທາງການ ເພື່ອເປັນຕົວແທນໃນການໂຄສະນາປະຊາສຳພັນ ກ່ຽວກັບວົງການແຟຊັ້ນລາວ ໃຫ້ສາກົນໄດ້ຮັບຮູ້ຢ່າງກວ້າງຂວາງ, ເຊິ່ງໄດ້ຈັດຂຶ້ນໃນ ວັນທີ 22 ກຸມພາ 2018 ທີ່ນະຄອນ ຫລວງວຽງຈັນ.
ທ່ານ ນາງ ປານີ ໄຊຍະວົງສ ຜູ້ກໍ່ຕັ້ງໂຄງການລາວແຟຊັ້ນວິກ (Lao Fashion Week) ເຜີຍໃຫ້ຮູ້ວ່າ: ໂຄງການລາວແຟຊັ້ນວິກ ເປັນບຸນມະໂຫລານແຟຊັ້ນ ທີ່ໃຫຍ່ທີ່ສຸດຂອງລາວ, ເຊິ່ງໄດ້ນຳເອົາຊື່ສຽງ ຂອງປະເທດລາວ ແລະ ວົງການແຟຊັ້ນຂອງລາວ ໄປສູ່ລະດັບສາກົນ ຢ່າງສຳເລັດຜົນ ແລະ ໄດ້ສ້າງເຄືອຂ່າຍ ການຮ່ວມມືຢ່າງແໜ້ນແຟ້ນ ກັບບັນດາວົງການ ແຟຊັ້ນສາກົນ.
ຄຽງຄູກັນນັ້ນ ລາວແຟຊັ້ນວິກ ຍັງມີເປົ້າໝາຍສຳຄັນ ໃນການສ້າງໂອກາດໃຫ້ກັບບັນດາ ນັກອອກແບບໜຸ່ມນ້ອຍຂອງລາວ ທີ່ຍັງດ້ອຍໂອກາດ ໃຫ້ມີເວທີສະແດງຜົນງານ ການອອກແບບ ແລະ ເປີດໂອກາດໃຫ້ພວກເຂົາ ໄດ້ກ້າວເຂົ້າສູ່ວົງການແຟຊັ້ນມືອາຊີບ. ນອກນີ້, ໂຄງການ ລາວແຟຊັ້ນວິກ ຍັງກະກຽມຈັດບຸນມະໂຫລານ ຄັ້ງທີ 5 ເຊິ່ງຈະຈັດຂຶ້ນໃນ ລະຫວ່າງວັນທີ 10-14 ກັນຍານີ້ ຄາດວ່າຈະມີນັກອອກແບບ ມືອາຊີບທັງລາວ ແລະ ຕ່າງປະເທດ ເຂົ້າຮ່ວມສະແດງຜົນງານຫລາຍຂຶ້ນກວ່າທຸກປີ.
ທ່ານ ນາງ ພູນຊັບ ພົນໂຍທາ ໄດ້ສະແດງຄວາມດີໃຈ ທີ່ໄດ້ຖືກເລືອກເປັນທູດວັດທະນະທຳ ຂອງ ລາວແຟຊັ້ນວິກ ປະຈຳປີ 2018, ເຊິ່ງໂຄງການດັ່ງກ່າວ ເປັນໂຄງການທີ່ໃຫຍ່ ແລະ ສາກົນ ໃຫ້ການຍ້ອມຮັບ. ພ້ອມນີ້, ນາງ ພູນຊັບ ພົນໂຍທາ ຢືນຢັນວ່າຈະຕັ້ງໃຈປະຕິບັດໜ້າທີ່ ທີ່ໄດ້ຮັບມອບໝາຍໃຫ້ດີທີ່ສຸດ ເພື່ອໃຫ້ວົງການແຟຊັ້ນລາວ ກາຍເປັນທີ່ຮູ້ຈັກຫລາຍຂຶ້ນ ໃນບັນດາອາຊີ ແລະ ສາກົນ.
ຂ່າວຈາກ ຂປລ, ຮູບ:firstmodelinglao
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment