ສຸດເສົ້າຊາວໜຸ່ມປະສົບອຸປະຕິເຫດເສຍຊີວິດອີກແລ້ວ

ພໍ່ແມ່ທຸກຄົນຮັກ ແລະເປັນຫ່ວງລູກກວ່າຊີວິດພະຍາຍາມຫາສິ່ງທີ່ດີທີ່ສຸດໃຫ້ກັບລູກ ແມ່ນແຕ່ພາຫະນະທີ່ໃຊ້ໃນການເດີນທາງພໍ່ແມ່ກໍ່ດິ້ນຮົນຫາເງິນມາຊື້ ຫວັງໃຫ້ລູກເດີນທາງສະບາຍ ແລະປອດໄພກັບຮອດບ້ານຮອດຊ່ອງ ແຕ່ອຸປະຕິເຫດລາຍນີ້ຜູ້ທີ່ເປັນພໍ່ແມ່ຄົງຫົວໃຈສະຫຼາຍເມື່ຶອຕ້ອງສູນເສຍລູກຍ້ອນອຸປະຕິເຫດທາງທ້ອງຖະໜົນ.

ອຸປະຕິເຫດຄັ້ງນີ້ເກີດຂຶ້ນໃນວັນທີ 23.02.2018ເວລາ 20:38ໂມງ ໜ່ວຍກູ້ໄພ ມູນນິທິ ຊ່ວຍເຫຼືອຄົນທຸກຍາກແຫ່ງ ສປປ ລາວ ໄດ້ຮັບແຈ້ງເຫດຜ່ານເບີສຸກເສີນ 1623 ວ່າມີລົດໃຫຍ່ຕຳກັນ ຈຸດເກີດເຫດແມ່ນ ບ້ານ ດົງໝາກຄາຍ ເມືອງ ໄຊທານີ ນະຄອນຫຼວງວຽງຈັນ.

ພໍໜ່ວຍກູ້ໄພມູນນິທິອອກກວດສອບພົບເຫັນຜູ້ເສຍຊີວິດຕິດຢູ່ໃນລົດ ແລະ ບໍ່ສາມາດເອົາອອກຈາກລົດໄດ້ ທາງທີມງານໄດ້ນຳໃຊ້ອຸປະກອນຕັດ-ຖ່າງເຂົ້າຊ່ວຍຕັດ ແລ້ວນຳເອົາຮ່າງຜູ້ເສຍຊີວິດອອກມາ ຊຶ່ງເປັນເພດຍິງ ອາຍຸ 21ປີ ຢູ່ບ້ານ ທ່າສະຫວ່າງ ເມືອງ ໄຊທານີ ນະຄອນຫຼວງ ອາການເບື້ອງຕົ້ນແມ່ນ ກະທົບຫົວ,ເລືອດອອກດັງ,ເລືອດອອກຫູ ແລະ ຄໍຫັກ.

ດັ່ງນັ້ນທາງໜ່ວຍກູ້ໄພຈຶ່ງໄດ້ນຳຮ່າງຂອງຜູ້ກ່ຽວໄປທີ່ໂບດນາໄຊ ເມືອງ ໄຊເສດຖາ ນະຄອນຫຼວງວຽງຈັນ ເພື່ອໃຫ້ພີ່ນ້ອງຂອງຜູ້ກ່ຽວເຮັດພິທີທາງສາສະໜາ ຕ້ອງຂໍສະແດງຄວາມເສຍໃຈນຳຄອບຄົວຜູ້ເສຍຊີວິດດ້ວຍ.