ອົງຄະນະພັກ ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປະຈໍາປີ 2016 ເມື່ອວັນທີ 9 ມີນາ ຜ່ານມາ ທີ່ສະໂມສອນມະຫາວິທະຍາໄລແຫ່ງຊາດ, ໂດຍເປັນກຽດມອບຂອງສະຫາຍ ຮສ.ປອ ກອງສີ ແສງມະນີ ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີເລຂາ-ຮອງເລຂາໜ່ວຍພັກ, ຫົວໜ້າ-ຮອງຫົວໜ້າຫ້ອງການ, ກົມ, ມະຫາວິທະຍາໄລ, ຄະນະບໍດີ, ຮອງຄະນະບໍດີ, ພະນັກງານ ແລະ ສະມາຊິກພັກເຂົ້າຮ່ວມເປັນສັກຂີພິຍານ.
ໂອກາດດັ່ງກ່າວ, ສະຫາຍ ພູທອນ ສິລິອຸດົມ ຮອງຫົວໜ້າຫ້ອງການຄະນະພັກ ກະຊວງສຶກສາທິການ ແລະ ກິລາ ໄດ້ຜ່ານບົດສະຫຼຸບຕີລາຄາຜົນການລົງຕິດຕາມປະເມີນຜົນໜ່ວຍພັກເຂັ້ມແຂງ-ຮູ້ນໍາພາຮອບດ້ານຂອງໜ່ວຍພັກທີ່ຂຶ້ນກັບອົງຄະນະພັກ ກະຊວງສຶກສາທິການ ແລະ ກິລາ ປະຈໍາປີ 2016 ແລະ ທິດທາງແຜນການກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນ ປີ 2017. ໃນນັ້ນ, ກໍ່ມີຈຸດປະສົງຂອງການລົງຕິດຕາມປະເມີນ, ວິທີການດໍາເນີນການຕິດຕາມປະເມີນ, ສະພາບລວມ ແລະ ຈຸດພິເສດຂອງບັນດາໜ່ວຍພັກ, ສັງເກດຕີລາຄາດ້ານດີ, ດ້ານອ່ອນ, ສາເຫດ ແລະ ບົດຮຽນທີ່ຖອດຖອນໄດ້ທັງ 4 ດ້ານ ແລະ 5 ເນື້ອໃນ.
ສໍາລັບຜົນການປະເມີນໜ່ວຍພັກ ເຫັນວ່າບັນດາໜ່ວຍພັກທີ່ໄດ້ລົງຕິດຕາມປະເມີນທັງໝົດ 113 ໜ່ວຍ (ສໍານັກ ແລະ ອ້ອມຂ້າງກະຊວງ 38 ໜ່ວຍ, ມຊ ຈໍານວນ 75 ໜ່ວຍ) ເທົ່າກັບ 92,62 ເປີເຊັນຫຼຸດຄາດໝາຍວາງໄວ້ 7,38 ເປີເຊັນ, ໜ່ວຍພັກເຂັ້ມແຂງ-ຮູ້ນໍາພາຮອບດ້ານ 100 ໜ່ວຍ ເທົ່າກັບ 81,97 ເປີເຊັນຂອງຈໍານວນໜ່ວຍພັກທັງໝົດ ຖ້າທຽບໃສ່ປີ 2015 ຫຼຸດຄາດໝາຍ 18,03 ເປີເຊັນ, ໜ່ວຍພັກແຂງ 13 ໜ່ວຍ ເທົ່າກັບ 10,66 ເປີເຊັນ, ໜ່ວຍພັກກາງ ແລະ ອ່ອນບໍ່ມີ; ຜົນການປະເມີນສະມາຊິກພັກ ເຫັນວ່າສະມາຊິກພັກ 113 ໜ່ວຍ ມີຈໍານວນ 2.170 ສະຫາຍ ເທົ່າກັບ 85,06 ເປີເຊັນຂອງຈໍານວນສະມາຊິພັກທັງໝົດ, ສະມາຊິພັກທີ່ມີເງື່ອນໄຂປະເມີນຕົວຈິງ (ລວມທັງ ມຊ) 1.815 ສະຫາຍ ເທົ່າກັບ 83,64 ເປີເຊັນຂອງສະມາຊິກພັກ ຈໍານວນ 113 ໜ່ວຍທີ່ໄດ້ປະເມີນ, ສະມາຊິກພັກເຂັ້ມແຂງ-ຮູ້ນໍາພາຮອບດ້ານທັງໝົດຈໍານວນ 1.781 ສະຫາຍ ເທົ່າກັບ 73,90 ເປີເຊັນຂອງສະມາຊິພັກທີ່ໄດ້ປະເມີນຕົວຈິງ, ບໍ່ໄດ້ປະເມີນ 355 ສະຫາຍ (ບໍານານ, ນັກສຶກສາຮຽນຕໍ່, ສໍາຮອງ ຍົກຍ້າຍບ່ອນປະຈໍາການ, ພັກປິ່ນປົວ, ໄປອົບຮົມ ແລະ ອື່ນໆ).
ຂະນະດຽວກັນ, ສະຫາຍ ປອ. ສໍາລານ ພັນຄະວົງ ຄະນະພັກ, ຮອງຫົວໜ້າຫ້ອງການພັກກະຊວງສຶກສາທິການ ແລະ ກິລາ ກໍ່ໄດ້ຜ່ານມະຕິຕົກລົງຂອງຄະນະປະຈໍາພັກ ວ່າດ້ວຍການອະນຸມັດໜ່ວຍພັກເຂັ້ມແຂງ-ຮູ້ນໍາພາຮອບດ້ານ ປະຈໍາປີ 2016 ໂດຍຄະນະປະຈໍາພັກ ກະຊວງສຶກສາທິການ ແລະ ກິລາ ໄດ້ຢັ້ງຢືນ ແລະ ຮັບຮອງເອົາ 100 ໜ່ວຍພັກທີ່ຂຶ້ນກັບກະຊວງສຶກສາທິການ ແລະ ກິລາ. ໃນນັ້ນ, ມີສໍານັກງານກະຊວງ 36 ໜ່ວຍ ແລະ ມະຫາວິທະຍາໄລແຫ່ງຊາດ ຈໍານວນ 64 ໜ່ວຍ ເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ໃນປີ 2016.
ຫຼັງຈາກນັ້ນ, ສະຫາຍ ຮສ.ປອ ກອງສີ ແສງມະນີ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ບັນດາໜ່ວຍພັກທີ່ໄດ້ຮັບນາມມະຍົດເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ ພ້ອມທັງເນັ້ນໜັກໃຫ້ຄະນະພັກ ແລະ ແຕ່ລະໜ່ວຍພັກເອົາໃຈໃສ່ໃນການປະເມີນທີ່ມີຄຸນະພາບສູງຂຶ້ນກວ່າກົ່າ, ເອົາໃຈໃສ່ໃນການຕໍານິສົ່ງຂ່າວເຊິ່ງກັນ ແລະ ກັນ, ມີຄວາມຮັບຜິດຊອບກໍາໄດ້ແນວທາງຂອງພັກ-ລັດ ໂດຍສະເພາະແມ່ນນິຕິກໍາ ແລະ ຄໍາສັ່ງ, ບັນຫາຄວາມຮັບຜິດຊອບຂອງຄະນະພັກ, ສະມາຊິກພັກຕ້ອງສູງຂຶ້ນ ແລະ ຕ້ອງເອົາໃຈໃສ່ຮຽນຮູ້ກ່ຽວທິດສະດີໃຫ້ກວ້າງຂວາງຂຶ້ນ.
(ບຸນທະວີ)
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment