ມາແລ້ວກັບການທົດສອບຄັ້ງທໍາຂອງ ຄໍາປານ ເດັກບ້ານນອກ ໄດ້ຊ້ອມແບບເຕັມໆກັບທີມງານ ນະຄອນຫຼວງ ຢູໄນເຕັດ

ຖືວ່າເປັນບາດກ້າວສໍາຄັນສໍາລັບ ທ້າວ ຄໍາປານ ດວງວິໄລ ອາຍຸ 15 ປີ ຮຽນຢູ່ຊັ້ນມໍ 4 ທີ່ເມືອງສະໝ້ວຍ ແຂວງສາລະວັນ ສ່ວນສູງ 158 ຊັງຕີແມັດ ທີ່ມັກຮັກໃນກິລາບານເຕະ ໂດຍມີ ຄິສເຕຍໂນ ໂຣນັລໂດ ກອງໜ້າເບີ 1 ຂອງໂລກ ເປັນຂວັນໃຈ ແລະ ຮຽນແບບນັກເຕະຄົນນີ້, ເຊິ່ງລາວຫວັງວ່າຈະມີໂອກາດຈັກຄັ້ງໄດ້ມາຄັດເລຶອກເປັນ ນັກເຕະທີມຊາດລາວ ດ້ວຍການໂຊເດາະບານເຫັນແລ້ວບໍ່ທໍາມະດາ.

ຫຼ້າສຸດໄດ້ມີໂອກາດມາຝຶກຊ້ອມກັບ ສະໂມສອນ ນະຄອນຫຼວງ ຢູໄນເຕັດ ທີ່ສະໜາມ ລ້ານຊ້າງ ສະເຕດ້ຽມ ບ່້ານໜອງໄຮ ເມື່ອຕອນແລງວັນທີ 22 ມີນາ ທີ່ຜ່ານມາ ພາຍຫຼັງທີ່ ທ່ານ ນາງ ພິຈິກາ ບຸນກວ້າງ ປະທານ ເອີ້ນມາທົດສອບສີຕີນກັບທີມ ແລະ ໃຫ້ໂອກາດເດັກຄົນດັ່ງກ່າວ ມາສະແດງການເດາະບານ ໃນມື້ເປີດບານເຕະ 4 ເສົ້າ ໃນວັນເສົາທີ 24 ມີນານີ້ ທີ່ສະໜາມກິລາເຈົ້າອານຸວົງ. ຢ່າງໃດກໍ່ຕາມ ຄວາມຫວັງເປັນນັກເຕະຂອງສະໂມສອນ ໃນນະຄອນຫຼວງຂອງນ້ອງ ຍັງເປັນເລື່ອງທີ່ທ້າທາຍ ເພາະນ້ອງເປັນຄົນຕ່າງແຂວງ ແລະ ຕ້ອງຮຽກຮ້ອງໃຫ້ຜູ້ໃຫຍ່ໃຈບຸນຊຸກຍູ້ຕໍ່ໄປ.

ໂດຍ ຄໍາປານ ໄດ້ຮັບຄໍາແນະນໍາຈາກ ຄູຝຶກຂອງ ນະຄອນຫຼວງ ຢູໄນເຕັດ ທັງເລື່ອງເທັກນິກ ແລະ ມີຄວາມສາມັກຄີກັບເພື່ອນຮ່ວມທີມ ລວມທັງຍັງໄດ້ລົງຫຼິ້ນໃຫ້ກັບ ນະຄອນຫຼວງ ຢູໄນເຕັດ ນັດທໍາອິດພົບກັບ ມາສເຕີ 7 ຊຸດເປບຊີ ລາວພຣີເມຍລີກ ອີກດ້ວຍ.