ແຂວງສະຫວັນນະເຂດ ໄດ້ຈັດພິທີເປີດການກໍ່ສ້າງເສັ້ນທາງຟ້າງຸ່ມ ແລະໄກສອນ ພົມວິຫານ ໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນ້ຳຂອງ (GMS1) ເງິນກູ້ຍືມເລກທີ 2931 ແລະເງິນຊ່ວຍເຫຼືອລ້າເລກທີ 0313/0314 ຂຶ້ນຢ່າງເປັນທາງການໃນວັນທີ 28 ກຸມພາ 2018 ນີ້, ທີ່ບໍລິເວນເສັ້ນທາງຟ້າງຸ່ມ ໂດຍການເປັນກຽດເຂົ້າຮ່ວມຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ບໍລິສັດຜູ້ຮັບເໝົາກໍ່ສ້າງເສັ້ນທາງ 2 ເສັ້ນດັ່ງກ່າວ, ບັນດາຊ່ຽວຊານ ແລະທີ່ປຶກສາໂຄງການ, ແຂກທີ່ຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົມມາ ວົງພະຈິດ ຫົວໜ້າໂຄງການພັດທະນາຕົວເມືອງ GMS1 ໄດ້ລາຍງານໃຫ້ຮູ້ວ່າ: ໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນ້ຳຂອງ ເປັນໂຄງການໜຶ່ງທີ່ລັດຖະບານ ສປປ ລາວ ໄດ້ຮັບເງິນກູ້ຍືມ ແລະຊ່ວຍເຫຼືອລ້າຈາກທະນາຄານພັດທະນາອາຊີ (ADB) ເງິນກູ້ຍືມ Loan 2931, Grant 0313, 0314 ໃນມູນຄ່າໂຄງການ 47,74 ລ້ານໂດລາສະຫະລັດ ໃນນີ້ ລັດຖະບານ ສປປ ລາວສົບທົບ 6,27 ລ້ານໂດລາ, ເລີ່ມປະຕິບັດໂຄງການແຕ່ປີ 2013 ແລະປິດໂຄງການໃນເດືອນ 6/2020 ໂດຍໄດ້ຈັດຕັ້ງປະຕິບັດໃນ 3 ເມືອງຂອງແຂວງສະຫວັນນະເຂດ ທີ່ນອນໃນແລວທາງເສດຖະກິດຕາເວັນອອກ-ຕາເວັນຕົກຄື: ເມືອງໄກສອນ ພົມວິຫານ, ເມືອງພີນ ແລະເມືອງເຊໂປນ.
ຊຶ່ງປະຕິບັດໃນ 3 ໜ້າວຽກຫຼັກຄື: ສ້າງແຜນຍຸດທະສາດການພັດທະນາເສດຖະກິດ-ສັງຄົມໃນ 3 ຕົວເມືອງ, ປັບປຸງພື້ນຖານໂຄງລ່າງໃນຕົວເມືອງ 7 ໂຄງການຍ່ອຍ ແລະພັດທະນາຂີດຄວາມສາມາດຂອງພະນັກງານ ຍທຂ ແລະພາກສ່ວນຕ່າງໆທີ່ມີສ່ວນຮ່ວມໃນໂຄງການ ນອກຈາກນີ້,ໂຄງການ GMS1 ຍັງມີອີກ 1 ໂຄງການຊ່ວຍເຫຼືອລ້າຈາກກອງທຶນຫຼຸດຜ່ອນຄວາມທຸກຍາກປະເທດຍີ່ປຸ່ນ ໂດຍຜ່ານທະນາຄານ ADB ຈຳນວນ 953.000 ໂດລາ ໃນນີ້ ລັດຖະບານລາວສົມທົບ 100.000 ໂດລາ ໂຄງການນີ້ ຈັດຕັ້ງປະຕິບັດນເມືອງໄກສອນ ພົມວິຫານມີ 4 ໜ້າວຽກຄື: ສ້າງຕະຫຼາດກາງຄືນ, ຝຶກອົບຮົມສະມາຊິກກຸ່ມຄ້າຂາຍ, ປ່ອຍເງິນກູ້ຂະໜາດນ້ອຍ ແລະໜ້າວຽກທີ່4ແມ່ນສ້າງຂີດຄວາມສາມາດໃຫ້ໂຄງການບໍລິຫານຕະຫຼາດກາງຄືນຍືນຍົງ.
ສຳລັບການກໍ່ສ້າງເສັ້ນທາງທາງຟ້າງຸ່ມ ລວມທັງສວນສາທາລະນະ ລວມມີຄວາມຍາວຂອງເສັ້ນທາງແມ່ນ 2,1 ກິໂລແມັດ, ມີຄວາມກວ້າງຂອງໜ້າທາງແມ່ນ 7 ແມັດ ບວກກັບທາງຍ່າງທັງສອງເບື້ອງລວມເປັນ 12 ແມັດ ໂດຍແມ່ນບໍລິສັດຈຳປາຄຳກໍ່ສ້າງສ້ອມແປງຂົວທາງ ແລະເຄຫາສະຖານຈຳກັດ ເປັນຜູ້ຮັບເໝົາການກໍ່ສ້າງເສັ້ນທາງດັ່ງກ່າວ, ໃນມູນຄ່າ 2,28 ລ້ານກວ່າໂດລາ; ສ່ວນການ ກໍ່ສ້າງທາງໄກສອນ ພົມວິຫານ ທີ່ມີຄວາມຍາວ 6,2 ກິໂລແມັດ, ກວ້າງ 24 ແມັດ ໂດຍແມ່ນບໍລິສັດລັດວິສາຫະກິດທາງເລກ8, ບໍລິສັດພູຂົງກໍ່ສ້າງ ແລະບໍລິສັດໄຕທວງເຊິນກໍ່ສ້າງເປັນບໍລິສັດຮ່ວມ ເປັນຜູ້ຮັບເໝົາການກໍ່ສ້າງ, ມີມູນຄ່າການກໍ່ສ້າງແມ່ນ 7,54 ລ້ານກວ່າໂດລາ ເຊິ່ງທັງສອງເສັ້ນທາງດັ່ງກ່າວນີ້ ແມ່ນຂຶ້ນກັບເມືອງໄກສອນ ພົມວິຫານ, ຄາດຄະເນການກໍ່ສ້າງແມ່ນຈະໃຫ້ສຳເລັດ 100% ໃນປີ 2019.
ໂອກາດນີ້, ທ່ານ ທ່ອນແກ້ວ ພຸດທະໄກຍະລາດ ໄດ້ກ່າວວ່າ: ຂ້າພະເຈົ້າໃນນາມຜູ້ຊີ້ນຳຂັ້ນແຂວງ ເວລາໃດກໍ່ໄດ້ຊີ້ນຳຢ່າງໃກ້ສິດຕິດແທດ ເພື່ອໃຫ້ດຳເນີນໄປຢ່າງມີປະສິດທິຜົນ ພ້ອມນີ້ ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງຈົ່ງອຳນວຍຄວາມສະດວກ ແລະສະໜັບສະໜູນການຈັດຕັ້ງປະຕິບັດການກໍ່ສ້າງເສັ້ນທາງຟ້າງຸ່ມ ແລະທາງໄກສອນ ພົມວິຫານ ເພື່ອໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້ ຈາກນີ້, ກໍ່ຮຽກຮ້ອງໃຫ້ທາງບໍລິສັດຜູ້ຮັບເໝົາ ຈົ່ງເອົາໃຈໃສ່ກໍ່ສ້າງໃຫ້ທ່ວງທັນກັບເວລາ, ມີປະສິດທິຜົນ ແລະໃຫ້ມີຄວາມຈົບງາມ ໃຫ້ສົມກັບສາຍາຍາມກັບຊື່ເສັ້ນທາງຟ້າງຸ່ມ ແລະໄກສອນ ພົມວິຫານ ຊຶ່ງລ້ວນແລ້ວແຕ່ແມ່ນຊື່ບັນພະບູລຸດຂອງຊາດລາວເຮົາ ອັນສຳຄັນກໍ່ແມ່ນເພື່ອສ້າງພື້ນຖານໂຄງລ່າງທີ່ມີຄວາມຈົບງາມກຽມສູ່ການສ້າງເປັນນະຄອນໄກສອນ ພົມວິຫານໃນອະນາຄົດອັນໃກ້ໆນີ້.
ໃນໂອກາດດຽວກັນນີ້, ທ່ານ ໄພທູນ ປະທຸມພອນ ຜູ້ອຳນວຍການບໍລິສັດຈຳປາຄຳກໍ່ສ້າງສ້ອມແປງຂົວທາງ ແລະເຄຫາສະຖານຈຳກັດ ຍັງໄດ້ໃຫ້ສຳພາດກັບນັກຂ່າວພວກເຮົາວ່າ: ທາງບໍລິສັດພວກເຮົາ ຈະໄດ້ພ້ອມກັນສຸມທຸກເຫື່ອແຮງສະຕິປັນຍາ ແລະກຳລັງຂອງຕົນ ເຂົ້າໃນການຈັດຕັ້ງປະຕິບັດການກໍ່ສ້າງເສັ້ນທາງຟ້າງຸ່ມໃຫ້ມີຜົນສຳເລັດ ໂດຍພາຍຫຼັງທີ່ໄດ້ມີພິທີເປີດການກໍ່ສ້າງຢ່າງເປັນທາງການແລ້ວ ກໍ່ຈະໄດ້ມີການລົງມືກໍ່ສ້າງທັນທີ ເພື່ອໃຫ້ສຳເລັດຕາມສັນຍາທີ່ໄດ້ເຊັ່ນຮ່ວມກັນໄປແລ້ວນັ້ນ ກໍ່ຄືໃຫ້ສຳເລັດໃນທ້າຍປີ 2019 ທີ່ຈະເຖິງນີ້ ພ້ອມນີ້ກໍ່ຂໍຂອບໃຈຕໍ່ການນຳພັກ-ລັດທີ່ໃຫ້ຄວາມໄວ້ເນື້ອເຊື່ອໃຈບໍລິສັດພວກເຮົາ ໃຫ້ໄດ້ຮັບໃຊ້ເຂົ້າໃນການກໍ່ສ້າງພື້ນຖານໂຄງລ່າງການພັດທະນາເສດ ຖະກິດ-ສັງຄົມ ກໍ່ຄືໃນການກໍ່ສ້າງເສັ້ນທາງດັ່ງກ່າວ.
ຫຼັງຈາກນັ້ນ, ບັນດາທ່ານຄະນະປະທານ ແລະແຂກທີ່ເຂົ້າຮ່ວມໃນພິທີຄັ້ງນີ້ ກໍ່ໄດ້ຮ່ວມກັນຕັດແຖບຜ້າ ແລະປ່ອຍໝາກປູມເປົ້າ ເພື່ອເປັນສັນຍາລັກແຫ່ງການເປີດການກໍ່ສ້າງເສັ້ນທາງໄກສອນ ພົມວິຫານ ແລະເສັ້ນທາງຟ້າງຸ່ມຢ່າງເປັນທາງການ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment