ຂປລ.ທ້າຍ ອາທິດຜ່ານມານີ້, ເມືອງຫົງສາ ແຂວງ ໄຊຍະບູລີ ໄດ້ຈັດພິທີເປີດ ແຫລ່ງທ່ອງ ທ່ຽວ ທາງທຳມະຊາດ ຄຽງຄູ່ກັັບ ວັດທະນະທຳຄື: ຖ້ຳຫ້ວຍງາມ-ຕົ້ນແຕ້ຂ່າໃຫຍ່ ບ້ານປາກງື່ມ, ຕາດ ຄຳແສນ ບ້ານແກ້ງແອນ ແລະ ກ້ອນຊວ່າງ ບ້ານທ່າຊວ່າງ, ເນື່ອງໃນໂອກາດ ປີທ່ອງທ່ຽວລາວ 2018. ໃຫ້ກຽດເຂົ້າຮ່ວມ ຂອງທ່ານ ພອນສະຫວັນ ໄຊສົມພັນ ຮອງເຈົ້າເມືອງຫົງສາ, ມີການນຳ ຂອງເມືອງ, ຫົວໜ້າຫ້ອງການ, ພະນັກງານວິຊາການ, ການຈັດຕັ້ງບ້ານ ຕະຫລອດຮອດ ພໍ່ແມ່ປະ ຊາຊົນເຂົ້າຮ່ວມ ຢ່າງຫລວງຫລາຍ.
ໃນໂອກາດນີ້, ທ່ານ ສົມຍົດ ອານຸວົງ ຫົວໜ້າ ຫ້ອງການຖະແຫລງຂ່າວ ວັດທະນະທຳ ແລະ ທ່ອງທ່ຽວ ເມືອງຫົງສາ ໄດ້ເລົ່າເຖິງປະຫວັດຄວາມເປັນມາ ຂອງຖ້ຳຫ້ວຍງາມ-ຕົ້ນແຕ້ ຂ່າໃຫຍ່ ບ້ານປາກງື່ມ ເຊິ່ງແຫລ່ງທ່ອງທ່ຽວດັ່ງກ່າວ ໄດ້ຕັ້ງຢູ່ຫ່າງຈາກ ບ້ານປະຊາຊົນ ອອກໄປ ປະມານ 11 ກິໂລແມັດ, ສາມາດ ເຂົ້າໄປເຖິງດ້ວຍລົດ ຫລື ຍ່າງ. ຖ້ຳຫ້ວຍງາມ ແມ່ນຕັ້ງຢູ່ເຂດ ໄຮ່ນາຂອງຊາວບ້ານ, ມີມື້ໜຶ່ງ ໄດ້ມີຄົນໄປເລາະລ່າສັດ ຈິ່ງ ໄປພົບເຫັນ ຮູຖ້ຳດັ່ງກ່າວ, ຢູ່ພາຍໃນຖ້ຳ ມີຫີນງອກເປັນ ຊວດຊົງຮູບຮ່າງຕ່າງໆ ທີ່ສວຍງາມ. ສຳລັບຕົ້ນໄມ້ແຕ້ຂ່າໃຫຍ່ ບ້ານປາກງຶ່ມ ຕາມການບອກເລົ່າໃຫ້ ຮູ້ວ່າ: ແມ່ນເກີດກ່ອນ ຕັ້ງບ້ານປາກງື່ມ ຄາດວ່າມີອາຍຸຫລາຍກວ່າ 100 ປີ. ສ່ວນຕາດຄຳແສນ ບ້ານແກ້ງແອນ ຕັ້ງຢູ່ຫ່າງ ຈາກຕົວເມືອງຫົງສາປະມານ 31 ກິໂລແມັດ, ຕັ້ງຢູ່ເຂດບ້ານແກ້ງແອນເຊິ່ງ ຕາດມີຄວາມສູງ 15 ແມັດ, ກວ້າງ 20 ແມັດ, ສາມາດລົງຫລິ້ນນ້ຳໄດ້.
ໃນຂະນະທີ່ກ້ອນຊ່ວາງ ເປັນກ້ອນຫີນທີ່ໃຫຍ່ ຕັ້ງຢູ່ກາງແມ່ນຳຂອງ ເຂດບ້ານທ່າຊວ່າງ ຫ່າງຈາກເທດສະບານເມືອງ ຫົງສາປະມານ 25 ກິໂລແມັດ. ກ້ອນຊ່ວາງ ຕາມນິທານເຈົ້າຫູດ ແຕ່ບໍ່ ມີເອກະສານ ຢັ້ງຢືນໄດ້ຍິນຜູ້ເຖົ້າເລົ່າສູ່ຟັງວ່າ: ເຈົ້າຫູດ ໄດ້ຄ້ອງສັກສິດໜ່ວຍໜຶ່ງນໍາລີງ, ເມື່ອໄດ້ຄ້ອງສັກສິດແລ້ວ ກໍ່ຄິດວ່າຈະໄປຕີເອົານໍ້າຂອງ ມາເປັນບ່ອນທີ່ຕົນຈະສ້າງເມືອງ ຄືເມືອງເຫລືອກ, ແຕ່ຂ້ອນຄ້ອງພັດລຸດມື ເມື່ອບໍ່ມີຂ້ອນແລ້ວ, ກໍຄິດວ່າຈະບໍ່ສັກສິດຫຍັງ ກໍເລີຍ ຈັບຄ້ອງແກ່ວງຖິ້ມລົງນ້ຳຂອງ ແລ້ວ ຮ້ອງຂຶ້ນວ່າ: ຊ່ວງມົກຊ່ວງໃຈສາເຢີ. ນັບແຕ່ນັ້ນມາ ກໍເອີ້ນວ່າ: ກ້ອນຊ່ວາງ.
ທ່ານ ພອນສະຫວັນ ໄຊສົມພັນ ຍັງໄດ້ກ່າວວ່າ: ການທ່ອງທ່ຽວ ໝາຍເຖິງ ການເດີນທາງ ເພື່ອພັກຜ່ອນຢ່ອນໃຈ ຫລື ເພື່ອຄວາມມ່ວນຊື່ນ ຕື່ນເຕັ້ນ ທັງເປັນການຫາຄວາມຮູ້ ເຊິ່ງສອດຄ່ອງກັບຄຳຂວັນ ປີທ່ອງທ່ຽວລາວ 2018 ນີ້ວ່າ: ທ່ອງທ່ຽວເມືອງລາວ ຮຽນຮູ້ ປະຫວັດສາດ ຊື່ນຊົມທຳມະຊາດ ແລະ ອານຸລັກວັດທະນະທຳ. ສະນັນ, ຈຶ່ງເຊີນຊວຍນັກທ່ອງທ່ຽວ ທັງພາຍໃນ ແລະ ຕ່າງປະເທດ ຈົ່ງຫາໂອກາດ ໄປຢ້ຽມຢາມຊົມ ແລະ ສຳພັດ ກັບສະຖານທີ່ທ່ອງທ່ຽວດັ່ງກ່າວ ໃຫ້ມ່ວນຊື່ນ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment