ເມືອງມໍລະດົກໂລກ ກຽມສະຫລອງບຸນປີໃໝ່ລາວ ປີນີ້ໃຫ້ຄັກກວ່າທຸກປີ ສົມເປັນປີທ່ອງທ່ຽວລາວ

ຂປລ. ບຸນປີໃໝ່ລາວປີນີ້ ຫລວງພະບາງ ເມື່ອງມໍລະດົກໂລກ ກຽມສະເຫລີມສະຫລອງ ບຸນປີໃໝ່ລາວຢ່າງຍິ່ງໃຫຍ່, ພ້ອມເປີດ ປີທ່ອງທ່ຽວລາວ 2018 ມີຫລາຍກິດຈະກຳ ເພື່ອຕ້ອນຮັບ ນັກທ່ອງທ່ຽວ. ບັນດາໂຮງແຮມ ແລະ ບ້ານພັກ ຫລາຍກວ່າ 400 ແຫ່ງສາມາດ ຮອງຮັບຈໍານວນທ່ອງທ່ຽວ ໄດ້ຢ່າງພຽງພໍ, ເຊິ່ງຄາດວ່າປີນີ້ ຈະມີນັກທ່ອງທ່ຽວ ເຂົ້າຮ່ວມງານດັ່ງກ່າວ, ປະມານ 5-6 ພັນຄົນ.

ໃນວັນທີ 14 ມີນາ 2018 ທ່ານ ວົງດາວອນ ວົງໄຊຍະລາດ ຫົວໜ້າ ຂະແໜງໂຄສະນາການ ທ່ອງທ່ຽວ ແຂວງ ຫລວງພະບາງ ໄດ້ເປີດເຜີຍໃຫ້ຮູ້ວ່າ: ບຸນປີໃໝ່ລາວ ປະຈໍາປີ 2018 ຢູ່ແຂວງ ຫລວງ ພະບາງ ຈະເລີມ ແຕ່ ວັນທີ 11-20 ເມສາ, ເຊິ່ງ ໃນວັນທີ 11-12 ຈະມີງານປະກວດນາງສັງຂານ ປະຈຳປີ ພສ 2561 ຢູ່ເດີນທາດຫລວງ, ວັນທີ 13 ມີພິທີແຫ່ຊ້າງຮຽງເກີຍ ຈາກເດີ່ນທາດຫລວງ ຫາວັດໃໝ່ ສຸວັນນະພູມາຣາມ ແລະ ວັດຊຽງທອງ.

ຫລັງຈາກນັ້ນ, ຈະມີງານເປີດຕະຫລາດນັດ ຫັດຖະກຳ ງານສີມື ຂອງປະຊາຊົນຫລວງພະບາງ ແລະ ງານເທດສະການ ອາຫານລາວ;

+ວັນທີ 14 ຈະມີການໂລະລາດ ແບບມວນຊົນແຕ່ 3 ແຍກ ບ້ານຈຸມຄ້ອງ ຫາ 3 ແຍກພະແນກໂຍທາແຂວງ, ຊົມການວາງສະແດງ ຜະລິດຕະພັນສິນຄ້າພາຍໃນ ແລະ ຕ່າງປະເທດ.

ຈາກນັ້ນ, ຈະມີພິທີອັນເຊີນ ອາລາດທະນາ ພະພຸດທະຮູບລົງຫົດ ສົງຢູ່ຕາມວັດຕ່າງໆ ພາຍໃນເມືອງຫລວງພະບາງ, ຕົບພະທາດຊາຍ ທີ່ດອນຊາຍມຸງຄຸນ, ບູຊາພະທາດຊາຍ, ບາສີ, ສະແດງ ສິລະປະວັນນະຄະດີ, ກິລາພື້ນເມືອງ, ຈູດບັ້ງໄຟຫາງ, ທ່ອງຊົມ ສະຖານທີ່ທ່ອງທ່ຽວ ເມືອງຈອມເພັດ, ສົງນ້ຳພະຢູ່ວັດຕ່າງໆ ແລະ ມີຈະມີພິທີໂຮມຊຸມນຸມ ເພື່ອປະກາດ ການສ້າງຕັ້ງ ນະຄອນຫລວງພະບາງ ທີ່ເດີ່ນທາດຫລວງ;

+ວັນທີ 15 ມີການທ່ຽວຊົມ ບ້ານວັດທະນະທຳ ເຜົ່າລື້ຜານົມ, ຊົມການ ສະແດງ ສີລະປະວັນນະຄະດີ ທີ່ເປັນເອກະລັກຂອງເຜົ່າລື້, ບາສີໃຫ້ແກ່ບັນດາການນຳ ຫລັງຈາກນັ້ນ ກໍຈະມີການສະຫລອງ ປີທ່ອງທ່ຽວລາວ ທີ່ແຂວງ ຫລວງພະບາງ 2018 ທີ່ດ້ານໜ້າຫໍພິພິທະພັນ, ເຊິ່ງຈະເລີ່ມ ຕົ້ນຂະບວນ ແຫ່ຫວໍ່ ໄປຕາມເສັ້ນທາງຖະໜົນ ສີສະຫວ່າງວົງ, ແຕ່ວັດທາດນ້ອຍ ຫາ ວັດຊຽງທອງ ພ້ອມກັບສົງນ້ຳ ພະເພື່ອເປັນສິລີມຸງຄຸນ ຕາມວັດຕ່າງໆ,

+ວັນທີ 16 ຈະມີພິທີໃສ່ບາດ ຢູ່ໜ້າວັດແສນ ແລະ ຂຶ້ນບູຊາພະທາດຈອມສີ, ຊົມຂະບວນແຫ່ຫວໍ່ ຢູ່ຕາມເສັ້ນທາງ ສີສະຫວ່າງວົງ ແຕ່ຊຽງທອງ ຫາ ວັດທາດນ້ອຍ, ຊົມຂະບວນແຫ່ ພະຍານາກ, ໂຄມໄຟ ແຕ່ພະທາດຈອມສີ ລົງມາເຂົ້າສູ່ ຫໍພິພິທະພັນ (ພະລາດຊະ ວັງເກົ່າ) ແລະ ຊົມການສະແດງ ລະຄອນພະລັກ-ພະລາມ, ຟ້ອນຍັກ, ຟ້ອນລິງ ແລະ ຟ້ອນນາງແກ້ວ,

+ວັນທີ 17 ຈະມີພິທີ ອາລາດທະນາອັງເຊີນ ພະບາງລົງປະດິດສະຖານໄວ້ວັດໃໝ່ ສຸວັນນະພູມມາຣາມ ແລະ ຈັດຕັ້ງພິທີຫົດສົງ ຫລັງຈາກນັ້ນ ການນຳພັກ-ລັດ ແລະ ນາງສັງຂານທັງ 7 ກໍຈະໄປສົງນ້ຳພະພຸດທະຮູບ ຢູ່ຖໍ້າຕິ່ງ ຕາມຮິດຄອງປະເພນີ,