ອີງຕາມການລາຍງານຂອງເວັບໄຊກະຊວງໂຍທາທິການແລະຂົນສົ່ງໃຫ້ຮູ້ວ່າ: ໃນຕອນເຊົ້າເວລາ 8:30 ໂມງ ຂອງວັນທີ 19 ມີນາ 2018 ຢູ່ທີ່ ສູນຝຶກອົບຮົມ ICTC ( ຫຼັກ 5 ) ໄດ້ມີພິທີເປີດສຳມະ ນາວ່າດ້ວຍການສົ່ງເສີມວຽກງານຮັບປະກັນຄຸນນະພາບໂຄງການກໍ່ສ້າງພື້ນຖານໂຄງລ່າງ ແລະ ເຕັກໂນໂລຊີກໍ່ສ້າງ ຂົວທາງ ຂຶ້ນ ໂດຍໃຫ້ກຽດເປັນປະທານຮ່ວມນຳໂດຍ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກະຊວງກະຊວງໂຍທາທິການແລະຂົນສົ່ງ( ຍທຂ), ທ່ານ Takeshi HIKIHARA, ເອກອັກຄະລັດຖະທູດ ຍີ່ປຸ່ນ ປະຈຳ ສປປ ລາວ, ທ່ານ Tadashi OKUTANI ຮອງຫົວໜ້າກົມສັງລວມນະໂຍບາຍ, ກະຊວງ ທີ່ດິນພື້ນຖານໂຄງລ່າງ ຂົນສົ່ງ ແລະ ການທ່ອງທ່ຽວ ( MLIT ) ຂອງຍີ່ປຸ່ນ, ທ່ານ ແສງດາລິດ ກັດຕິຍະສັກ ຫົວໜ້າກົມແຜນການ ແລະ ການຮ່ວມມື ກະຊວງ ຍທຂ.
ມີບັນດາທ່ານ ຫົວໜ້າກົມ, ທ່ານຮອງຫົວໜ້າກົມ, ບັນດາທ່ານຜູ້ຕາງໜ້າຈາກລັດວິສາຫະກິດອ້ອມຂ້າງກະຊວງ ຍທຂ, ທ່ານຜູ້ຕາງ ໜ້າຈາກບັນດາບໍລິສັດ, ທ່ານຜູ້ຕາງໜ້າອົງການ JICA ປະຈຳ ສປປ ລາວ ເຂົ້າຮ່ວມລວມທັງໝົດ 112 ທ່ານ.
ລັດຖະບານຍີ່ປຸ່ນໄດ້ສະໜັບສະໜູນລັດຖະບານລາວ ໃນການປະຕິບັດນະໂຍບາຍເຊື່ອມໂຍງ ແລະ ເຊື່ຶອມຈອດ ດ້ານຄົມມະນາຄົມ-ຂົນສົ່ງ ກັບບັນດາປະເທດໃກ້ຄຽງ, ພາກພື້ນ ແລະ ສາກົນ. ໂດຍສະເພາະ ໄດ້ຊ່ວຍເຫຼືອດ້ານການ ພັດທະນາພື້ນຖານໂຄງລ່າງຂອງ ສປປ ລາວ ເພື່ຶອສະໜັບສະໜູນໂຍບາຍຫັນປະເທດ ທີ່ບໍ່ມີຊາຍແດນຕິດກັບທະເລ ມາເປັນປະເທດບໍລິການທາງຜ່ານ ຂອງອະນຸພາກພື້ນ ໃຫ້ປະກົດຜົນເປັນຈິງ.
ໃນຊຸມປີຜ່ານມາໄດ້ມີຫຼາຍໂຄງການ ທິີ່ຢັ້ງຢືນເຖີງຜົນສຳເລັດຂອງການຊ່ວຍເຫຼືອດັ່ງກ້າວເຊັ່ນ: ໂຄງການກໍ່ສ້າງຂົວ 51 ແຫ່ງ ຕາມເສັ້ນທາງເລກ 13 ໃຕ້, ໂຄງການກໍ່ສ້າງຂົວຂ້າມນ້ຳຂອງປາກເຊ, ໂຄງການຍົກລະດັບທາງເລກ 9 ໃຫ້ສາມມາດຮອງຮັບນ້ຳໜັກການບັນທຸກ 11 ໂຕນ/ເພົາ ຕາມມາດຕະຖານຂອງອາຊຽນ, ຂົວນ້ຳຂອງມິດຕະພາບລາວ-ໄທ ແຫ່ງທີ 2 ສະຫວັນນະເຂດ-ມຸກດາ ຫານ, ໂຄງການກໍ່ສ້າງຕະຝັ່ງເຈື້ອນ, ໂຄງການຂະຫຍາຍນ້ຳປະປາ ແລະ ອື່ນໆ.
ນັບແຕ່ປີ 2016 ເປັນຕົ້ນມາໄດ້ສຳ ເລັດ ແລະ ເປີດນຳໃຊ້ຂົວຂ້າມນ້ຳເຊກອງ ໃນວັນທີ 12 ກຸມພາ 2018 ຜ່ານມານີ້ ແລະ ໂຄງການຂະຫຍາຍອາຄານ ສະໜາມບິນສາກົນວັດໄຕ ໄລຍະ 2 ທີກຳລັງກໍ່ສ້າງ ໂດຍຄາດວ່າຈະສຳເລັດໃນທ້າຍເດືອນ 6/2018 ແລະ ໂຄງການ ກໍ່ສ້າງຂົວ 2 ແຫ່ງ ຕາມເສັ້ນທາງເລກ 9.
ຜົນສຳເລັດຂອງບັນດາໂຄງການດັ່ງກ່າວມານີ້ ໄດ້ເຮັດໃຫ້ການໄປມາຫາສູ່ ຂອງປະຊາຊົນ, ການແລກປ່ຽນສິນຄ້າ, ການທ່ອງທ່ຽວ ໄດ້ມີຄວາສະດວກຫຼາຍຂື້ນ, ທັງເປັນເງື້ອນໄຂພື້ນຖານໃນ ການດືງດູດການລົງທືນ ຂອງຕ່າງປະເທດ ມາສູ່ ສປປ ລາວ ແລະ ປະກອບສ່ວນອັນໃຫຍ່ຫຼວງໃຫ້ແກ່ການຍົກ ສູງລະດັບຊີວິດການເປັນຢູ່ ຂອງປະຊາຊົນລາວ ກໍ່ຄືການພັດທະນາເສດຖະກິດສັງຄົມ ຂອງ ສປປ ລາວ ໃຫ້ຫຼຸດພົ້ນ ອອກຈາກສະຖານະການດອຍພັດທະນາຕາມແຜນການທີ່ວາງໄວ້.
ແຫລ່ງທີ່ມາຈາກhttp://www.mpwt.gov.la
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment