ມີກິດຈະກຳທີ່ຫຼາກຫຼາຍໃນງານເປີດໂຕສູນການຄ້າທົ່ງຂັນຄຳ

ສູນການຄ້າທົ່ງຂັນຄໍາ ແມ່ນສູນການຄ້າທີ່ໄດ້ຮັບການພັດທະນາມາຕະຫລອດ ແລະ ເພື່ອໃຫ້ທຸກພາກສ່ວນຮັບຮູ້ ໂດຍສະເພາະພໍ່ຄ້າຊາວຂາຍປວງຊົນລາວທັງພາຍໃນ ແລະຕ່າງປະເທດໄດ້ເຂົ້າມາຊື້ຂາຍ ໃນຕອນເຊົ້າວັນທີ 19 ມີນານີ້, ທີ່ນະຄອນຫລວງວຽງຈັນ ບໍລິສັດລາວເວີນ ມະຫາຊົນ ໄດ້ງານເປີດການບໍລິການສູນການຄ້າ ທົ່ງຂັນຄໍາ ໂດຍເປັນກຽດເຂົ້າຮ່ວມທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ທ່ານ ທັດນະຄອນ ທໍາມະວົງ ປະທານສະພາບໍລິຫານ ບໍລິສັດລາວເວີນມະຫາຊົນ, ທ່ານນາງ ບົວລອນ ວົງດາລາແສນ ເຈົ້າເມືອງ ເມືອງຈັນທະບູລີ ພ້ອມດ້ວຍພໍ່ຄ້າແມ່ຄ້າ ເຂົ້າຮ່ວມຢ່າງຫຼວງຫຼາຍ.

ໂອກາດນີ້ທ່ານ ສີບຸນທໍາ ສີບຸນມີ ຮອງຜູ້ອໍານວຍການໃຫຍ່ ບໍລິສັດລາວເວີນ ມະຫາຊົນ ໄດ້ກ່າວວ່າ: ສູນການຄ້າທົ່ງຂັນຄໍາ ໄດ້ເລີ່ມກໍ່ສ້າງຂຶ້ນໃນວັນທີ 15 ມັງກອນ 2015 ໂດຍມີມູນຄ່າການກໍ່ສ້າງ 105.098.956.200 ກີບ ເພື່ອສ້າງໃຫ້ເປັນສູນການຄ້າທີ່ຄົບວົງຈອນ ແລະ ທັນສະໄຫມ ເຊິ່ງລວມມີ 3 ພື້ນທີ່ໃຫຍ່ຄື: ອາຄານທົ່ງຂັນຄໍາມໍ ມີທັງໝົດ 7 ຊັ້ນ, ອາຄານພານິດ ລວມມີ 4 ຕຶກ ແລະ ອາຄານຕະຫຼາດສົດ. ໂດຍມີຈຸດປະສົງໃຫ້ເປັນແຫຼ່ງລວມສິນຄ້າທີ່ຕັ້ງຢູ່ໃຈການເມືອງ ເພື່ອຕອບສະໜອງຄວາມຕ້ອງການຂອງປະຊາຊົນ ໃນເຄື່ອງໃຊ້ຄົວເຮືອນ ຢ່າງຄົບຊຸດ ລວມມີທັງຮ້ານຄ້າ, ສູນອາຫານ, ຊຸບເປີມາເກັດ ແລະ ຕະຫຼາດສົດ ເຊິ່ງໄດ້ເປີດໃຫ້ບໍລິການທຸກມື້ ເລີ່ມແຕ່ເວລາ 9:00-21:00 ໂມງ.

ພິເສດພາຍ ໃນງານເປີດບໍລິການສູນການຄ້າທົ່ງຂັນຄໍາ ຍັງມີກິດຈະກໍາ ການສອນເຮັດອາຫານນານາຊາດ ແລະ ການຫຼິ້ນກິດຈະກໍາແຈກຂອງລາງວັນ ທີ່ສູນການຄ້າທົ່ງຂັນຄໍາ ທຸກທ່ານສາມາດເຂົ້າຮ່ວມມ່ວນຊື້ນໄດ້ນັບແຕ່ວັນທີ 19 ຈົນຮອດວັນທີ 25 ມີນານີ້.