ປີ 2017 ກວດພົບການສໍ້ລາດບັງຫຼວງ 994 ກໍລະນີ ສ້າງຄວາມເສຍຫາຍຫຼາຍຮ້ອຍຕື້ກີບ

ປີກາຍນີ້ ມີການກວດກາພຶດຕິກຳທີ່ເປັນການສໍ້ລາດບັງຫຼວງ 146 ກໍລະນີ ພົບເຫັນຜົນເສຍຫາຍທັງໝົດ 593,97 ຕື້ກວ່າກີບ, 5,53 ລ້ານບາດ, 4,67 ລ້ານໂດລາສະຫະລັດ ແລະ 20 ລ້ານດົ່ງ ເກັບກູ້ຄືນໄດ້ແລ້ວ 357,15 ຕື້ກີບ, 956.500 ບາດ, 1,21 ລ້ານໂດລາ ແລະ 20 ລ້ານດົງ.

ໃນບົດສະຫຼຸບຫຍໍ້ການເຄື່ອນໄຫວວຽກງານກວດກາປີ 2017 ຂອງຄະນະກວດກາສູນກາງພັກໃຫ້ຮູ້ວ່າ ທາງຄະນະກວດກາສູນກາງພັກໄດ້ກວດ ພົບເຫັນພະນັກງານລັດ ແລະ ຜູ້ປະກອບການທີ່ມີພຶດຕິກຳສໍ້ລາດບັງຫຼວງ 994 ຄົນ ໃນນັ້ນເປັນພະນັກງານລັດ 908 ຄົນ ແລະ ຜູ້ປະກອບການ 86 ຄົນ ໃນນີ້ກຳລັງດຳເນີນການກວດກາ 420 ຄົນ, ໄດ້ປະຕິບັດວິໄນດ້ານບໍລິຫານ 414 ຄົນ, ກຳລັງດຳເນີນຄະດີ 84 ຄົນ, ສະຫຼຸບຄະດີສົ່ງໃຫ້ໄອຍະການປະຊາຊົນແລ້ວ 62 ຄົນ ແລະ ສານຕັດສິນແລ້ວ 14 ຄົນ.

ການສໍ້ລາດບັງຫຼວງແມ່ນສະພາບຫຍໍ້ທໍ້ໜຶ່ງໃນກົງຈັກການຈັດຕັ້ງ, ເປັນໄພອັນຕະລາຍຮ້າຍແຮງ ເຊິ່ງສົ່ງຜົນກະທົບ ແລະ ກົດໜ່ວງຖ່ວງດຶງການພັດທະນາເສດຖະກິດ-ສັງຄົມຂອງແຕ່ລະປະເທດໃນໂລກ ບໍ່ວ່າຈະເປັນປະເທດນ້ອຍຫຼືໃຫຍ່, ທຸກຍາກຫຼືຮັ່ງມີ ກໍລ້ວນແຕ່ມີຜົນກະທົບເຊັ່ນດຽວກັນ, ການສໍ້ລາດບັງຫຼວງພວມເປັນໄພຂົ່ມຂູ່ເຖິງຄວາມມີສະຖຽນລະພາບຂອງການຈັດຕັ້ງທັງພາກລັດ ແລະ ເອກະຊົນ, ສ້າງໃຫ້ເກີດມີຄວາມບໍ່ສະຫງົບ ຄວາມບໍ່ຍຸດຕິທຳໃນສັງຄົມ ເປັນການບັ່ນທອນກຳລັງແຮງ ກໍຄືຄວາມເຊື່ອໝັ້ນ ແລະ ຄ່ານິຍົມຂອງສັງຄົມຕໍ່ສະຖາບັນການປົກຄອງ.