ຄະນະຜູ້ແທນລາວ ຊຶ່ງນຳໂດຍທ່ານ ສະຫວັນຄອນ ຣາຊະມຸນຕີ ໄດ້ສຳເລັດການເຂົ້າຮ່ວມກອງປະຊຸມລັດຖະມົນຕີວັດທະນະທຳອາຊີ-ເອີຣົບ ຫຼື ອາເຊັມຄັ້ງທີ8(8th ASEM Culture Minister's Meeting ) ໃນລະຫວ່າງວັນທີ 1-2 ມີນາ 2018 ທີ່ຜ່ານມານີ້ ຢູ່ທີ່ນະຄອນຫຼວງໂຊເຟຍ ປະເທດບຸນກາລີ ໂດຍມີບັນດາທ່ານລັດຖະມົນ, ຮອງລັດຖະມົນຕີ ພ້ອມດ້ວຍເຈົ້າໜ້າທີ່ອາວຸໂສດ້ານວັດທະນະທຳ ຈະນວນ 125 ກວ່າຄົນ ຈາກ 43 ປະເທດອາຊີ ແລະ ເອີລົບ ຂຶ້ນເວທີປາໄສ.
ກອງປະຊຸມລັດຖະມົນຕີວັດທະນະທຳອາເຊັມ ຄັ້ງທີ 8 ຈັດຂື້ນພາຍໃຕ້ຫົວຂໍ້ "The Role of Culture in International Relations: The Road Forward" ບົດບາດວັດທະນະທຳ ກັບການພົວພັນສາກົນ: ເສັ້ນທາງແຫ່ງອະນາຄົດ. ໃນກອງປະຊຸມ ASEM ຄັ້ງທີ 8 ທີ່ບຸນກາລີເປັນເຈົ້າພາບໃນຄັ້ງນີ້ ຍັງໄດ້ຈັດໃຫ້ມີເວທີປາໄສ ເພື່ອແລກປ່ຽນຄຳຄິດເຫັນ ທັດສະນະ ກ່ຽວກັບບົດບາດຄວາມໝາຍຄວາມສຳຄັນຂອງວັດທະນະທຳ ຕໍ່ກັບການພັດທະນາເສດຖະກິດສັງຄົມຂອງແຕ່ລະປະເທດ ເວົ້າສະເພາະ ແລະ ເວົ້າລວມທົ່ວໂລກ ໃນຍຸກສະໄໝປະຈຸບັນ.
ບັນດາຫົວຂໍ້ທີ່ໜ້າສົນໃຈໄດ້ຖືກນຳມາສະເໜີໃນເວທີປາໄສຈາກຜູ້ແທນບັນດາປະເທດຕ່າງໆ ທີ່ເຂົ້າຮ່ວມປະຊຸມ ເປັນຕົ້ນ:
- ສະໜັບສະໜູນບົດບາດຂອງວັດທະນະທຳຢ່າງແຂງແຮງເຂົ້າໃນການພັດທະນາເສດຖະກິດ-ສັງຄົມ
- ສົ່ງເສີມບົດບາດວັດທະນະທຳ ແລະ ການຮ່ວມມືວັດທະນະທະໃນເວທີສາກົນ ເພື່ອສັນຕິພາບໃນການພົວພັນຂອງບັນດາປະຊາຊາດໃນໂລກ
- ສົ່ງເສີມການຮ່ວມມືທາງດ້ານມໍລະດົກວັດທະນະທຳ
ທ່ານ ທອງໃບ ໂພທິສານ ຫົວໜ້າກົມມໍລະດົກ ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ໄດ້ສະແດງທັດສະນະວ່າ: ໃນຖານະເປັນນັກຮົບຖັນແຖວວັດທະນະທຳຜູ້ໜຶ່ງ ຮູ້ສຶກເປັນທີ່ໜ້າສົນໃຈ ແລະ ດີໃຈເປັນຢ່າງຍິ່ງ ທີ່ມາເຖິງຍຸກສະໄໝການຈະເລີນເຕີບໂຕທາງດ້ານເສດຖະກິດ ທ່າມກາງກະແສຄວາມກ້າວໄກຂອງວິທະຍາສາດ ແລະ ເທັກໂນໂລຊີທີ່ທັນສະໄໝ ແຕ່ລະປະເທດໃນໂລກ ບໍ່ວ່າຈະເປັນອາຊີ ແລະ ເອີລົບ ໄດ້ຫັນມາເຂົ້າໃຈ ແລະ ຍົກສູງບົດບາດຂອງວຽກງານວັດທະນະທຳ ພ້ອມທັງທັງໄດ້ຍົກສູງເປັນປະເດັນສຳຄັນໃນເວທີໂລກ.
ແລ້ວ ສປປ ລາວ ເຮົາລະ...?
ຂອບໃຈແຫຼ່ງຂ່າວຈາກ ສາລາກະວີງົວ ແລະກວຽນ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment