ມື້ນີ້ແອັດມິນໂປ່ງນຳເອົາຂໍ້ຄິດດີໆຈາກ ອາຈານກາບແກ້ວ ທຳມະວົງ ນັກຂຽນ ແລະ ນັກເວົ້າສ້າງແຮງບັນດານໃຈ ກ່ຽວກັບຄວາມເຂົ້າໃຈໃນການກຽມຕົວຂອງນ້ອງນັກສຶກສາເວລາທີ່ຢູ່ນອກ ແລະໃນຮົ້ວ ມະຫາວິທະຍາໄລມີຄວາມແຕກຕ່າງກັນແນວໃດ ແລະເຮັດຈັ່ງໃດບໍ່ໃຫ້ຈົບອອກມາເຕະຝຸ່ນ.
ອາຈານກາບແກ້ວໄດ້ຝາກຂໍ້ຄິດວ່າ: ລະບົບການສຶກສາບ້ານເຮົາໃນຄວາມເປັນຈິງຄວນຕ້ອງມີການປັບຕົວແລ້ວ ໂດຍສະເພາະແມ່ນຜູ້ທີ່ຮຽນຢູ່ ແລະມີຄວາມໝາຍໝັ້ນຕັ້ງໃຈຢາກມີວຽກເຮັດງານທຳມີອາຊີບທີ່ດີ ພາຍຫຼັງຮຽນຈົບ ທີ່ສຳຄັນໃຫ້ເຂົ້າໃຈວ່າຍຸກນີ້ເປັນຍຸກດີຈີຕອນທີ່ມີການເຊື່ອມໂຍງ ບາງຢ່າງມີການປັບຕົວໄວຈົນຕັ້ງຕົວບໍ່ທັນ ສະນັ້ນນ້ອງນັກຮຽນຕ້ອງເລີ່ມຝຶກຕົນເອງແບບໃດໃຫ້ຈົບອອກມາມີບ່ອນຮອງຮັບ.
ຫວ່າງບໍ່ດົນມານີ້ມີກະແສກໍລະນີໃບປະກາດແດງຫາວຽກບໍ່ໄດ້ ຫຼື ແມ່ນແຕ່ວິທີການສອນລູກຂອງປະເທດຕ່າງໆຊຶ່ງເປັນທີ່ຮືຮາໃນທົ່ວສັງຄົມອອນລາຍນັ້ນ ຜ່ານບົດສຳພາດຂອງ ອາຈານກາບແກ້ວແລ້ວ ເພິ່ນໃຫ້ທັດສະນະວ່າ: ໃບປະກາດແດງເປັນຄວາມຕ້ອງການຂອງນັກຮຽນນັກສຶກສາ ແລະຕ້ອງເປັນຜູ້ຮຽນດີຮຽນເກ່ງຈິ່ງສາມາດຄວ້າມາໄດ້ ແຕ່ບາງຄັ້ງນັກສຶກສາຜູ້ມຸ້ງຫວັງຕັ້ງໃຈໃຫ້ປະສົບຜົນສຳເລັດໃນຫ້ອງຮຽນອາດລືມຄິດເຖິງອີກໜ້າວຽກໜຶ່ງທີ່ຢູ່ນອກຮົ້ວມະຫາວິທະຍາໄລ ຈິ່ງຕັ້ງໃຈໃສ່ໜ້າວຽກດຽວ ເພາະທີ່ຜ່ານມາມັກມີຄວາມເຊື່ອເລື່ອງໄດ້ໃບປະກາດແດງ ໄດ້ຄະແນນສູງຊິຈະໄດ້ວຽກດີ ນ້ອງໆຫຼາຍຄົນຈິ່ງທຸ່ມເທເຕັມທີ່ໃສ່ແຕ່ການຮຽນ ລືມປັດໃຈອື່ນທີ່ວຽກງານຕ້ອງການ.
ໃນຄວາມເປັນຈິງແລ້ວຍາມຮຽນຕ້ອງໃຫ້ໄດ້ຄະແນນສູງຖືເປັນໜ້າທີ່ຂອງນັກຮຽນທີ່ຕ້ອງເຮັດ ແຕ່ຄວບຄູ່ກັບການຮຽນໃນໂຮງຮຽນກໍ່ຄວນຮຽນຮູ້ການໃຊ້ຊີວິດນອກຮົ້ວໂຮງຮຽນກັບສັງຄົມດ້ວຍການເປັນອາສາສະໝັກ ເຖິງຈະບໍ່ໄດ້ເງິນເດືອນກໍ່ຕາມ ແຕ່ນັ້ນເປັນປະສົບການ ເປັນບົດຮຽນທີ່ຈະຊ່ວຍເສີມກັບຕຳລາທີ່ເລົ່າຮຽນນຳຄູອາຈານ, ເປັນຂົວກ່າຍໃຫ້ນ້ອງໆໄດ້ກ້າວສູ່ຈຸດໝາຍປາຍທາງຂອງການເປັນພະນັກງານໄດ້ງ່າຍກວ່າ ຜູ້ໄດ້ຄະແນນສູງຢ່າງດຽວແຕ່ບໍ່ມີປະສົບການ.
ອາຈານກາບແກ້ວຍັງບອກອີກວ່າ: ຄວາມແຕກຕ່າງຈາກການຮຽນໃນຫ້ອງ ແລະໂລກແຫ່ງຄວາມເປັນຈິງກໍ່ຄື ໃນໂຮງຮຽນໄດ້ຄະແນນສູງຄືເຈົ້າປະສົບຜົນສຳເລັດ ແຕ່ໃນໂລກແຫ່ງຄວາມເປັນຈິງຄືຜົນງານເທົ່ານັ້ນທີ່ຈະເປັນຕົວຊີ້ວັດວ່າເຈົ້າປະສົບຜົນສຳເລັດ ຊຶ່ງຕ້ອງລົງມືເຮັດ, ສ້າງຜົນງານ ຕ້ອງຮູ້ຈັກເຂົ້າກັບຄົນຈິ່ງຈະເກີດຜົນສຳເລັດຂຶ້ນ. ນັ້ນໝາຍຄວາມວ່າຖ້ານ້ອງໆຮຽນແລ້ວຢາກມີວຽກເຮັດຕ້ອງຮຽນເຮັດສອງໜ້າທີ່ໄປພ້ອມໆກັນ ຊຶ່ງວຽກທາງນອກຮົ້ວ ມະຫາວິທະຍາໄລຈະໄດ້ເງິນຫຼືບໍ່ ບໍ່ສຳຄັນແຕ່ແນ່ນອນເປັນປະສົບການທີ່ສາມາດຕໍ່ຍອດໄດ້.
ຄຽງຄູ່ກັບຄວາມຕ້ອງການທີ່ນັກຮຽນນັກສຶກສາ ຕ້ອງທັງຮຽນທັງຫາຄວາມຮູ້ ເປັນອາສາສະໝັກທາງນອກກໍ່ເພື່ອ ໃຫ້ຮູ້ຈັກການຢູ່ກັບສັງຄົມ, ຮູ້ຈັກຄວາມອົດທົນ, ຮູ້ວຽກ ແລະທີ່ສຳຄັນຕ້ອງຮູ້ພາສາຕ່າງປະເທດ ຕົວຢ່າງພາສາອັງກິດ ເພື່ອເປັນກະແຈ ເປັນເຄື່ອງມືສື່ສານຄົບຄ້າສະມາຄົມກັບຄົນຫຼາຍປະເທດໄດ້ ຊຶ່ງນີ້ຄືຈຸດໄດ້ປຽບໜຶ່ງທີ່ຫາວຽກໄດ້ງ່າຍກວ່າ.
ທັດສະນະຄະຕິອັນໜຶ່ງທີ່ນ້ອງໆຕ້ອງເຂົ້າໃຈກໍ່ຄືຢ່າຄາດຫວັງກັບຕົນເອງສູງເກີນໄປ ປະມານວ່າຕ້ອງໄດ້ເຮັດວຽກນຳລັດ, ເຮັດຢູ່ບ່ອນໃຫຍ່ໆມີຊື່ສຽງເທົ່ານັ້ນ ຖ້າຄິດແບບນີ້ອາດເຮັດໃຫ້ນ້ອງໆເສຍໂອກາດໄປ ເພາະຄວາມສຳເລັດບໍ່ໄດ້ເກີດຢູ່ບ່ອນໃຫຍ່ໆສະເໝີໄປ ອາຈານກາບແກ້ວແນະນຳວ່າ: ຖ້າຈົບອອກມາແລ້ວຍັງບໍ່ມີວຽກເຮັດກໍ່ລອງເປີດເຮັດຫຍັງກໍ່ໄດ້ເປັນທຸລະກິດນ້ອຍໆລອງເປັນນາຍໂຕເອງ ເພື່ອເອົາປະສົບການ ໂດຍບໍ່ຕ້ອງກັງວົນວ່າຕົນຮຽນຈົບ ມະຫາວິທະຍາໄລ ແຕ່ມາລ້ຽງງົວຊຶ່ງບໍ່ແມ່ນເລື່ອງແປກ ສຳຄັນຕ້ອງກ້າ ບໍ່ຄວນຢ້ານໝູ່ຈະເບິ່ງວ່າເຮົາບໍ່ປະສົບຜົນສຳເລັດ ຈະເຮັດຫຍັງກໍ່ຕາມໃຫ້ເປັນສິ່ງທີ່ຕົນມັກ ຮູ້ຈັກກັບມັນ ແລະສ້າງເປັນເງິນໄດ້ຄຳຕອບຂອງການປະສົບຜົນສຳເລັດກໍ່ຈະຊັດເຈນຂຶ້ນເອງ.
ກ່ອນຈະກ້າວສູ່ຈຸດນັ້ນໄດ້ໃນທັດສະນະຂອງອາຈານກາບແກ້ວແນະນຳວ່າ: "ນ້ອງໆຕ້ອງຮຽນທີ່ຈະຮູ້ໂຕເອງ ມີຄວາມຝັນ ຖະໜັດດ້ານໃດແລ້ວໄປຮຽນຕາມສາຍນັ້ນ ສິ່ງໜຶ່ງທີ່ຄວນຫຼີກລ້ຽງຄືຢ່າຮຽນຕາມກະແສເຫີ່" ຈຸດນີ້ສຳຄັນຫຼາຍ ບ້ານເຮົາຜ່ານມາມີຄົນຈຳນວນບໍ່ໜ້ອຍທີ່ຈົບອອກມາຫາວຽກບໍ່ໄດ້ຍ້ອນຮຽນຕາມກະແສ ຊຶ່ງລົ້ນຕະຫຼາດແຮງງານ ກົງກັນຂ້າມສາຍທີ່ບັນດາບໍລິສັດຜູ້ຈ້າງງານຢາກໄດ້ພັດວ່າຍັງຂາດເຂີນ ກາຍເປັນບັນຫາແຮງງານເຫຼືອບໍ່ພໍ ຍ້ອນຈຳນວນໜຶ່ງຮຽນໄປໂດຍບໍ່ຮູ້ຄວາມມັກຕົນເອງ ແລະບໍ່ຮູ້ຄວາມຕ້ອງການຂອງສັງຄົມ.
ສະຫຼຸບສັ້ນໆກໍ່ຄືຢ່າຮຽນຢ່າງດຽວຕ້ອງຮູ້ຈັກຊອກຫາຮຽນຈາກທາງນອກ, ຮຽນຫຼາຍຢ່າງ ບໍ່ເລືອກວຽກຈະບໍ່ຕົກວຽກຢ່າງແນ່ນອນ ເພາະທຸກບ່ອນຕ້ອງການຄົນເກ່ງ ແລະຮອບຮູ້ ນາຍຈ້າງສ່ວນໃຫຍ່ຕ້ອງການຄົນທີ່ຈົບອອກມາແລ້ວໃຫ້ສາມາດເຂົ້າສູ່ວຽກໄດ້ເລີຍ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment