ເພື່ອສົ່ງເສີມການສ້າງວຽກເຮັດງານທຳແກ່ປະຊາຊົນ ແຂວງບໍ່ແກ້ວໄດ້ຈັດຝຶກອົບຮົມໃຫ້ແມ່ຍິງ ເຜົ່າມູເຊີຂາວຈຳນວນ 16 ຄົນ ວິທີຖັກແສ່ວຜ້າຖົງ ເຜົ່າມູເຊີຂາວ ທີ່ບ້ານຫ້ວຍລົມ ເມືອງຕົ້ນເຜີ້ງ ຊຶ່ງໄດ້ມີພິທີມອບໃບຢັ້ງຢືນໃນວັນທີ16 ມີນາ 2018 ທີ່ພະແນກ ແຮງງານ ແລະສະຫວັດດີການສັງຄົມ(ຮສສ) ແຂວງບໍ່ແກ້ວ.
ການມອບໃບຢັ້ງຢືນເທື່ອນີ້ ກໍ່ເພື່ອຢັ້ງຢືນເຖິງຜົນສຳເລັດໃນການຈັດຕັ້ງປະຕິບັດວຽກງານຝຶກອາຊີບແກ່ເອື້ອຍນ້ອງຍິງກຸ່ມດັ່ງກ່າວ ເຂົາເຈົ້າມີວິຊາຊີບຕິດຕົວໄປອີກໜຶ່ງຢ່າງຖັດຈາກການເຮັດໄຮ່ໄຖນາທີ່ເປັນກິດຈະວັດປະຈຳວັນ.
ໃນພິທີທ່ານ ຄຳມ່ວນ ລໍມີໄຊ ຮອງຫົວໜ້າຫ້ອງການ ຮສສ ເມືອງຕົ້ນເຜີ້ງ ໄດ້ຍົກໃຫ້ເຫັນການຝຶກອົບຮົມວິທີຖັກແສ່ວຜ້າຖົງ ໄລຍະສັ້ນ 1 ເດືອນ ເພື່ອປະກອບເປັນອາຊີບ ເຖິງຈະໃຊ້ເວລາສັ້ນແຕ່ເຊື່ອວ່າຈະມາດສ້າງລາຍຮັບໃຫ້ແກ່ຕົນເອງ ແລະ ຄອບຄົວໄດ້ ຖ້າຫາກຜູ້ທີ່ມາຮຽນຮູ້ນຳໄປຈັດຕັ້ງຜັນຂະຫຍາຍໃຫ້ຄົນຮອບຂ້າງ ພັດທະນາສີມື ໃຫ້ງົດງາມຂຶ້ນມີຄວາມຫຼາກຫຼາຍ ຜ້າຖົງທີ່ເປັນເອກະລັກຂອງຊົນເຜົ່າມູເຊີຂາວຈະຮຸ່ງເຮືອງເມືອໜ້າ.
ເຊັ່ນດຽວກັບທ່ານແສງວອນ ບຸນເກີດ ຮອງຫົວໜ້າພະແນກ ຮສສ ແຂວງບໍ່ແກ້ວກໍ່ກ່າວວ່າ ເມື່ອຜ່ານການຝືກສີມືແຮງງານ ແລ້ວໃຫ້ເອົາໃຈໃສ່ສືບຕໍ່ ນຳໄປຈັດຕັ້ງປະຕິບັດ ພ້ອມທັງສະເໜີໃຫ້ພະນັກງານກໍ່ສ້າງຮາກຖານ ແລະ ອຳນາດການປົກຄອງບ້ານ ຊ່ວຍສ້າງເງື່ອນໄຂ ພ້ອມທັງເປັນເຈົ້າການ ສົ່ງເສີມຊຸກຍູ້ ເສີມຂະຫຍາຍກຸ່ມຖັກແສ່ວຜ້າຖົງ ແລະ ຜະລິດອອກຈຳໜ່າຍສູ່ຕະຫລາດ ແລະ ສ້າງເປັນກອງທຶນເພື່ອພັດທະນາກຸ່ມຖັກແສ່ວໃຫ້ໄດ້ຫລາຍຂື້ນກວ່າເກົ່າ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment