ຊຽງຂວາງເປັນແຂວງໜຶ່ງທີ່ມີນັກຮຽນເກ່ງຫຼາຍ ແຕ່ລະປີຕິດລະດັບຊາດບໍ່ເຄີຍຂາດ ສະນັ້ນເພື່ອຝຶກຝົນນ້ອງໆນັກຮຽນເຫຼົ່ານັ້ນໃຫ້ກາຍເປັນບຸກຄົນທີ່ມີຄຸນນະພາບຂອງຊາດ ລັດຖະບານຫວຽດນາມໄດ້ຊ່ວຍສ້າງໂຮງຮຽນພອນສະຫວັນແຫ່ງໜຶ່ງໃຫ້ນ້ອງນັກຮຽນໄດ້ມາສຶກສາຮ່ຳຮຽນກ່ອນກ້າວເຂົ້າສູ່ວິຊາອາຊີບ.
ພິທີວາງສີລາລຶກກໍ່ສ້າງໂຮງຮຽນພອນສະຫວັນ ແຂວງຊຽງຂວາງ ຈັດຂຶ້ນໃນວັນທີ 17 ມີນາ 2018 ນີ້ ທີ່ເດີ່ນໂຮງຮຽນ
ປະຖົມໂພນມີໄຊ ບ້ານໂພນມີໄຊ ເມືອງແປກ ແຂວງ ຊຽງຂວາງ ໂດຍໃຫ້ກຽດເຂົ້າຮ່ວມຂອງທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ ເຈົ້າແຂວງຊຽງຂວາງ, ທ່ານ ພົນຈັດຕະວາ(ພົຈວ) ຫງວຽນ ຈິ ເຫືອງ ຮອງກອງບັນຊາການທະຫານເຂດ 04 ສສ ຫວຽດນາມ, ທ່ານ ຄໍາເຜີຍ ແກ້ວກິນາລີ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ຮສ ປອ ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ມີບັນດາທ່ານຄະນະນໍາຂອງແຂວງຊຽງຂວາງ, ຄະນະນໍາກອງບັນຊາການທະຫານເຂດ 04 ສສ ຫວຽດນາມ, ທ່ານເຈົ້າເມືອງ, ຫົວໜ້າພະແນກການ, ອໍານາດການປົກຄອງບ້ານ-ພໍ່ແມ່ປະຊາ ຊົນອ້ອມຂ້າງເທດສະບານແຂວງ, ພະນັກງານ-ຄູອາຈານສອນ ຕະຫຼອດຮອດແຂກທີ່ຖືກເຊີນເຂົ້າຮ່ວມ 200 ກ່ວາຄົນ.
ໂອກາດນີ້ ທ່ານ ຫງວຽນ ຫວຽດອຽດ ຫົວໜ້າພະແນກເສດຖະກິດ ທະຫານເຂດ 04 ສສ ຫວຽດນາມ ໄດ້ຂຶ້ນລາຍງານລາຍລະອຽດກ່ຽວກັບໂຄງການກໍ່ສ້າງໂຮງຮຽນພອນສະຫວັນ ແຂວງຊຽງຂວາງ, ເຊິ່ງໂຮງຮຽນແຫ່ງດັ່ງກ່າວ ລັດຖະບານ ສສ ຫວຽດ ນາມ ໄດ້ມອບໝາຍໃຫ້ກະຊວງປ້ອງກັນປະເທດ(ກອງບັນຊາການທະຫານເຂດ 04 ) ເປັນເຈົ້າຂອງໂຄງການກໍ່ສ້າງ ດ້ວຍມູນຄ່າການກໍ່ສ້າງທັງໝົດ 137.480.086.000 ດົ່ງ(ໜຶ່ງຮ້ອຍສາມສິບເຈັດຕື້, ສີ່ຮ້ອຍແປດສິບລ້ານ, ແປດສິບຫົກພັນດົ່ງ) ໃນນັ້ນ ທຶນຊ່ວຍເຫຼືອຂອງລັດຖະບານ ສສ ຫວຽດນາມ 134.767.069.000 ດົ່ງ(ໜຶ່ງຮ້ອຍສາມສິບສີ່ຕື້, ເຈັດຮ້ອຍຫົກສິບເຈັດລ້ານ, ຫົກສິບເກົ້າພັນ ດົ່ງ) ແລະ ທຶນສົມທົບຂອງລັດຖະບານ ສປປ ລາວ 2.713.017.000 ດົ່ງ( ສອງຕື້, ເຈັດຮ້ອຍສິບສາມລ້ານ, ສິບເຈັດພັນ ດົ່ງ).
ສໍາລັບຕຶກອາຄານທີ່ຈະດໍາເນີນການກໍ່ສ້າງມີທັງໝົດ 07 ຕຶກຄື: ຕຶກອາຄານບໍລິຫານ-ຄະນະອໍານວຍການ-ຫ້ອງອ່ານ 02 ຊັ້ນ ເນື້ອທີ່ 560 m2, ຕຶກອາຄານຮຽນຊັ້ນມັດທະຍົມຕອນປາຍ(ມ.5 ຫາ ມ.7) 02 ຊັ້ນ ເນື້ອທີ່ 1,650 m2, ຕຶກອາຄານຮຽນຊັ້ນມັດທະຍົມຕອນຕົ້ນ(ມ.1 ຫາ ມ.4) 02 ຊັ້ນ ເນື້ອທີ່ 1,195 m2, ຕຶກອາຄານ ຮ້ານອາຫານ-ສະໂມ ສອນ 02 ຊັ້ນ ເນື້ອທີ່ 815 m2, ຕຶກຫໍພັກນັກຮຽນ-ຄູອາຈານ 04 ຊັ້ນ 02 ຫຼັງ ເນື້ອທີ່ 2,660 m2, ຕຶກອາເນກປະສົງ 01 ຊັ້ນ ເນື້ອທີ່ 855 m2, ນອກນັ້ນ ຍັງມີກໍາແພງອ້ອມຮອບໂຮງຮຽນ, ປະຕູໂຂງ, ສະຖານທີ່ຈອດລົດ, ອ່າງເກັບນໍ້າ, ໝໍ້ເກັບໄຟ, ຫ້ອງນໍ້າ, ລະບຽງ, ເດີ່ນຫຼີ້ນອອກກໍາລັງກາຍ ແລະ ປູກຕົ້ນໄມ້ປະດັບປະດາອ້ອມບໍລິເວນໂຮງຮຽນຕື່ມອີກ, ຄາດວ່າການກໍ່ສ້າງຈະໃຫ້ສໍາເລັດໃນປີ 2020 ແລະ ສາມາດຮອງຮັບນັກຮຽນໄດ້ 500 ກ່ວາຄົນ.
ໂອກາດດຽວກັນ ທ່ານ ບົວສອນ ສີນວນທອງ ຮອງເຈົ້າແຂວຊຽງຂວາງ ແລະ ທ່ານ ຮອງຫົວໜ້າກອງບັນຊາການທະ ຫານເຂດ 04 ສສ ຫວຽດນາມ ກໍໄດ້ພັດປ່ຽນກັນຂຶ້ນມີຄໍາຄິດຄໍາເຫັນ, ເຊິ່ງຄໍາຄິດຄໍາເຫັນນັ້ນ ລ້ວນແລ້ວແຕ່ສ່ອງແສງເຖິງສາຍພົວພັນມິດຕະພາບແບບພິເສດລະຫ່ວາງສອງປະເທດອ້າຍນ້ອງ ລາວ-ຫວຽດນາມ ຍາມໃດກໍ່ໄດ້ພ້ອມກັນຮັກສາມູນເຊື້ອ ເພີ່ມພູນຄູນສ້າງ ແລະ ເບັ່ງບານຕະຫຼອດມາ, ການກໍ່ສ້າງໂຮງຮຽນພອນສະຫວັນແຫ່ງນີ້ ຍິ່ງມີຄວາມສໍາຄັນຕໍ່ກັບແຜນຍຸດທະສາດການກໍ່ສ້າງສະຖານທີ່ການສຶກສາ ແລະ ການສ້າງຊັບພະຍາກອນມະນຸດທີ່ເກັ່ງກ້າໃຫ້ແກ່ ສປປ ລາວ ໃນພາລະກິດສ້າງສາ ແລະ ພັດ ທະນາປະເທດຊາດ ໃຫ້ນັບມື້ຈະເລີນຮຸ່ງເຮືອງ, ເປັນການຍົກລະດັບອີກຂີດໝາຍໜຶ່ງ ຂອງສາຍພົວພັນມິດຕພາບ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ ເວົ້າສະເພາະ ກອງບັນຊາການທະຫານເຂດ 04 ແລະ ປະຊາຊົນຊາວແຂວງຊຽງຂວາງ ໃຫ້ນັບມື້ໝັ້ນຄົງ ຍືນຍົງຕະຫຼອດໄປ. ຫຼັງຈາກນັ້ນ ຜູ້ແທນທັງສອງຝ່າຍກໍໄດ້ພ້ອມກັນເປີດພິທີວາງສີລາລຶກການກໍ່ສ້າງໂຮງຮຽນພອນສະຫວັນ ແຂວງຊຽຂວາງຢ່າງເປັນທາງການ.
ໂດຍ: ຄານສີສະຫວັນ ພົງພັກດີ
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment