ສະໜາມບິນໜອງຄ້າງ ແຂວງຫົວພັນທີ່ໄດ້ເລີ່ມການກໍ່ສ້າງມາແຕ່ປີ 2013 ຮອດໄລຍະໜຶ່ງໄດ້ຢຸດສະງັກລົງເນື່ອງຈາກຫຼາຍປັດໄຈປິ່ນອ້ອມ ແຕ່ລັດຖະບານຍັງບໍ່ລົດລະຄວາມພະຍາຍາມ ແລະກຳລັງໃຫ້ບໍລິສັດດຳເນີນການກໍ່ສ້າງຕໍ່ໃຫ້ສຳເລັດຕາມລະດັບຄາດໝາຍ ປະຈຸບັນເວົ້າໄດ້ວ່າຫຼາຍໜ້າວຽກເລີ່ມມີຄວາມຄືບໜ້າ.
ຕາມຂໍ້ມູນລາຍງານໃນໂອກາດທີ່ທ່ານຮອງນາຍົກ ບຸນທອງ ຈິດມະນີ ເດີນທາງໄປຢ້ຽມຢາມໂຄງການເພື່ອກວດກາຄວາມຄືບໜ້າການກໍ່ສ້າງສະໜາມບິນໜອງຄ້າງ ແຂວງຫົວພັນເມື່ອວັນທີ 19-20 ມີນາ 2018 ຜ່ານມາໃຫ້ຮູ້ວ່າ: ບໍລິສັດໄດ້ເລີ່ມລົງມືກໍ່ສ້າງມາແລ້ວໄລຍະໜຶ່ງ.
ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ໄດ້ລາຍງານຄວາມຄືບໜ້າຂອງໂຄງການກໍ່ສ້າງສະໜາມບິນໜອງຄ້າງ ແຂວງຫົວພັນ, ເຊິ່ງເປັນໂຄງການໜຶ່ງທີ່ສໍາຄັນຂອງແຂວງ ໂດຍແມ່ນບໍລິສັດພັດທະນາກະສິກໍາຮ່ວງແອັງ ອັດຕະປື ຮັບເໝົາກໍ່ສ້າງ ເລີ່ມຈັດຕັ້ງມາຕັ້ງແຕ່ວັນທີ 7 ຕຸລາ 2013 ແລະ ໄດ້ສິ້ນສຸດສັນຍາໂຄງການໃນ 24 ເດືອນ ກໍຄືປີ 2015 ແຕ່ໂຄງການບໍ່ສາມາດປະຕິບັດສໍາເລັດໄດ້ຕາມແຜນ ເນື່ອງຈາກຫຼາຍປັດໄຈເຊັ່ນ: ໂຄງການຕັ້ງຢູ່ເຂດຫ່າງໄກສອກຫຼີກ ເຮັດໃຫ້ການຂົນສົ່ງວັດສະດຸ, ພາຫະນະກົນຈັກ ເພື່ອມາຮັບໃຊ້ໂຄງການພົບຄວາມຫຍຸ້ງຍາກ ລວມທັງໄພທໍາມະຊາດທີ່ເປັນອຸປະສັກ ແລະອື່ນໆ ຈິ່ງໄດ້ຢຸດເຊົາການກໍ່ສ້າງເປັນການຊົ່ວຄາວ.
ແນວໃດກໍ່ດີ ເພື່ອເປັນການສືບຕໍ່ໂຄງການດັ່ງກ່າວໃຫ້ສໍາເລັດພາກສ່ວນທີ່ກ່ຽວຂ້ອງ ເປັນຕົ້ນແມ່ນການນຳແຂວງຫົວພັນ, ກະຊວງໂຍທາທິການ-ຂົນສົ່ງ ແລະ ບໍລິສັດຜູ້ຮັບເໝົາ ໄດ້ເປັນເອກະພາບເຫັນດີໃຫ້ເລີ່ມສືບຕໍ່ຈັດຕັ້ງປະຕິບັດໂຄງການດັ່ງກ່າວ ເລີ່ມແຕ່ວັນທີ 26 ກຸມພາ 2018 ເປັນຕົ້ນໄປ ມາຮອດປັດຈຸບັນແມ່ນເຂົ້າສູ່ການລົງມືຈັດຕັ້ງປະຕິບັດແລ້ວ ສໍາຫຼັບໜ້າວຽກແມ່ນ: ປັບປຸງແຜນຈັດຕັ້ງປະຕິບັດໂຄງການ ເພື່ອໃຫ້ສອດຄ່ອງກັບສະພາບຕົວຈິງ; ວຽກອານະໄມ ແລະ ບຸກເບີກພື້ນທີ່ການກໍ່ສ້າງ ເຊັ່ນ: ທາງຂຶ້ນ-ລົງເຮືອບິນ, ທາງຂັບເຄື່ອນ, ລານຈອດເຮືອບິນ, ເຂດປອດໄພທາງຂ້າງ ແລະອື່ນໆ; ກໍ່ສ້າງທາງລົດມອດໄຟສະໜາມບິນ ແລະ ເຂດປອດໄພທາງຂ້າງຂອງທາງຂຶ້ນ-ລົງເຮືອບິນ; ວຽກກໍ່ສ້າງທາງຍ່າງຢູ່ໜ້າອາຄານຜູ້ໂດຍສານ ແລະ ວຽກດິນຖົມຫຼັງທໍ່ຂ້າມທາງຂຶ້ນລົງ ແລະອື່ນໆ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment