ແຂວງບໍ່ແກ້ວເປັນທີ່ຮັບຮູ້ດີຂອງຄົນລາວທຸກຄົນ ແຕ່ຄົງມີໜ້ອຍຄົນທີ່ຮູ້ວ່າບໍ່ແກ້ວສ້າງຂຶ້ນແຕ່ເມືອງໃດ ມາຮອດປະຈຸບັນເປັນແນວໃດແທ້ ມື້ນີ້ຈິ່ງຍິບຍົກເອົາຂໍ້ມູນທີ່ເປີດເຜີຍໃນງານໂຮມຊຸມນຸມໃຫຍ່ເພື່ອສະເຫຼີມສະຫຼອງວັນສ້າງຕັ້ງແຂວງບໍ່ແກ້ວຄົບຮອບ 35 ປີ ໄດ້ຈັດຂຶ້ນທີ່ສະໜາມກິລາບ້ານປ່າອ້ອຍ ເມືອງຫວ້ຍຊາຍແຂວງບໍ່ແກ້ວ ໃນວັນທີ 26/03/2018 ນີ້ມາຝາກທ່ານຜູ້ອ່ານ.
ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວໃຫ້ຮູ້ວ່າ: ແຂວງບໍ່ແກ້ວໄດ້ຮັບການສ້າງຕັ້ງຂຶ້ນໃນວັນທີ 26/03/1983 ປະກອບມີ 3 ເມືອງ ທີ່ແບ່ງອອກຈາກແຂວງຫລວງນ້ຳທາຄື: ເມືອງຫ້ວຍຊາຍ, ເມືອງຕົ້ນເຜີ້ງ ແລະເມືອງເມິງ. ມີ 22 ຕາແສງ, 265 ບ້ານ, ມີ 13.843 ຄອບຄົວ ແລະມີພົນລະເມືອງ ທັງໝົດ 54.441 ຄົນ. ມາຮອດ ວັນທີ 2/07/1992 ສູນກາງພັກໄດ້ຕົກລົງ ໂອນເມືອງປາກທາ ແລະເມືອງຜາອຸດົມ ແຂວງອຸດົມໄຊ ໃຫ້ຂຶ້ນກັບແຂວງບໍ່ແກ້ວ. ປະຈຸບັນແຂວງບໍ່ແກ້ວປະກອບມີ 5 ເມືອງ 1 ເຂດເສດຖະກິດພິເສດສາມລ່ຽມຄຳ, ມີ 255 ບ້ານ ຈັດເປັນ 45 ກຸ່ມບ້ານ, ປະກອບມີ 13 ເຜົ່າ ມີພົນລະເມືອງທັງໝົດ 183.126 ຄົນ.
ນັບແຕ່ມື້ສ້າງຕັ້ງແຂວງບໍ່ແກ້ວມາຮອດປະຈຸບັນ ຄະນະນຳ ໄດ້ອອກແຮງເຄື່ອນໄຫວຊີ້ນຳ-ນຳພາໃນທຸກຂົງເຂດວຽກງານ ເຮັດໃຫ້ແຂວງບໍ່ແກ້ວເຂັ້ມແຂງ ມີຄວາມສະຫງົບສຸກ, ຊີວິດການເປັນຢູ່ຂອງປະຊາຊົນ ກໍ່ໄດ້ຮັບການພັດທະນາໄປທາງທີ່ດີ, ການພັດທະນາເສດຖະກິດສັງຄົມ ມີການຂະຫຍາຍຢ່າງຕໍ່ເນື່ອງ ສະແດງແດງອອກໃນປີ 2017 ຍອດຜະລິດຕະພັນພາຍໃນ ຫຼື GDP ບັນລຸໄດ້ 2.770,33 ຕື້ກີບ ຂະຫຍາຍຕົວຢູ່ໃນລະດັບ 7,7% ສະເລຍລາຍຮັບຕໍ່ຫົວຄົນ 1.776 ໂດລາຕໍ່ຫົວຄົນ.
ໂອກາດເຂົ້າຮ່ວມ ງານໂຮມຊຸມນຸມໃຫຍ່ສະເຫຼີມສະຫລອງວັນສ້າງຕັ້ງແຂວງບໍ່ແກ້ວຄົບຮອບ 35 ປີ ທ່ານ ພັນຄຳ ວິພາວັນ ຮອງປະທານປະເທດ ໄດ້ຂຶ້ນມີຄວາມເຫັນຕໍ່ພິທີ ທ່ານ ໄດ້ຍົກໃຫ້ເຫັນວ່າ: ຕະຫລອດ 35 ປີແຫ່ງການປົກປັກຮັກສາ ແລະພັດທະນາແຂວງບໍ່ແກ້ວ ຜ່ານມາ ດ້ວຍຄວາມບຸກບືນສູ້ຊົນຂອງປະຊາຊົນລາວບັນດາເຜົ່າຊາວແຂວງບໍ່ແກ້ວ ພາຍໃຕ້ການ ນຳພາຂອງອົງຄະນະພັກແຂວງໄດ້ເຮັດໃຫ້ແຂວງບໍ່ແກ້ວສາມາດຍາດຜົນງານອັນໃຫຍ່ຫລວງທີ່ພາກພູມໃຈ.
ແຕ່ທຽບໃສ່ຄວາມຮຽກຮ້ອງຕ້ອງການໃນໄລຍະໃໝ່ແຂວງບໍ່ແກ້ວຕ້ອງອອກແຮງບຸກບືນສູ້ຊົນໃຫ້ສູງຂຶ້ນ, ຕ້ອງເພີ່ມທະວີຄວາມສາມັກຄີເປັນປຶກແຜ່ນພາຍໃນ, ເສີມຂະຫຍາຍນ້ຳໃຈຮັກຊາດ, ຮັກລະບອບໃໝ່, ເຊີດຊູຈິດໃຈເອກະລາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ພ້ອມກັນຂຸດຄົ້ນທ່າແຮງຢູ່ພາຍໃນຢ່າງແຂງແຮງ ໃນການຊຸກຍູ້ການຜະລິດເປັນສິນຄ້າ, ຫັນປ່ຽນຈາກເສດຖະກິດທຳມະຊາດໄປສູ່ເສດຖະກິດຕະຫລາດ, ປັບປຸງແບບແຜນການ ຊີ້ນຳນຳພາ ກົນໄກວິທີການຈັດຕັ້ງປະຕິບັດໜ້າທີ່ວຽກງານໃຫ້ເຂົ້າສູ່ລະບຽບ, ສ້າງຖ່ວງທ່າ ແລະ ພື້ນຖານອັນໜັກແໜ້ນ ເພື່ອນຳເອົາແຂວງບໍ່ແກ້ວຫຼຸດພົ້ນ ອອກຈາກສະຖານະພາບຄວາມດ້ອຍພັດທະນາໃນປີ 2020.
ໂດຍເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດ, ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ, ມີການນຳພັກລັດ, ແຂກຮັບເຊີນ ພ້ອມດ້ວຍພະນັກງານ ທະຫານ-ຕຳຫລວດ ແລະປະຊາຊົນ ອ້ອມຂ້າງແຂວງ ເຂົ້າຮ່ວມຢ່າງຫຼວງຫລາຍ.
ຂອບໃຈແຫຼ່ງຂ່າວຈາກວິທະຍຸກະຈາຍສຽງແຫ່ງຊາດ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment