ນະຄອນຫຼວງວຽງຈັນ ໃຫ້ເວລາ 3 ເດືອນ ຂຶ້ນທະບຽນ ແລະ ອອກບັດເຄື່ອນໄຫວຊົ່ວຄາວແກ່ແຮງງານຕ່າງປະເທດ

ພະແນກແຮງງານ ແລະສະຫວັດດີການສັງຄົມ ນະຄອນຫຼວງວຽງຈັນ (ຮສສ ນວ) ໄດ້ເລີ່ມຂຶ້ນທະບຽນ ແລະອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດຢູ່ນະຄອນຫຼວງວຽງຈັນ ນັບແຕ່ວັນທີ 1 ກັນຍາ ຫາ 30 ພະຈິກ 2017, ທັງນີ້ກໍເພື່ອເກັບກຳຂໍ້ມູນ, ຂຶ້ນບັນຊີຄົນຕ່າງປະເທດທີ່ເຄື່ອນໄຫວ ແລະອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ອາໄສຢູ່ນະຄອນຫຼວງ.

ທ່ານນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະສະຫວັດດີການສັງຄົມ ນະ ຄອນຫຼວງວຽງຈັນ (ຮສສ ນວ)ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 7 ກັນຍາ 2017, ທີ່ຫ້ອງການພະແນກ ຮສສ ນວ ວ່າ: ການຂຶ້ນທະບຽບ ແລະອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດໃນຄັ້ງນີ້ ແມ່ນເພື່ອປະຕິບັດຕາມຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການອຳນວຍຄວາມສະດວກ ແລະການໃຫ້ຄວາມຮ່ວມມືໃນການຂຶ້ນທະບຽນ ແລະອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງ ປະເທດ ສະບັບແລກທີ 62/ນຍ ລົງວັນທີ 13 ພະຈິກ 2015 ແລະຂໍ້ຕົກລົງຂອງທ່ານເຈົ້າຄອນນະຄອນ ຫຼວງວຽງຈັນ ວ່າດ້ວຍການແຕ່ງຕັ້ງຄະນະຮັບຜິດຊອບການຂຶ້ນທະບຽນ ແລະອອກບັດເຄື່ອນໄຫວຊົ່ວຄາວໃຫ້ຄົນຕ່າງປະເທດຢູ່ນະຄອນຫຼວງວຽງຈັນ ເລກທີ 0602/ຈນວ ລົງວັນທີ 28 ມີຖຸນາ 2016, ແຈ້ງການຂອງກະຊວງ ແຮງງານ ແລະສະຫວັດດີການສັງຄົມ ແລະກະຊວງປ້ອງກັນຄວາມສະຫງົບ ເລື່ອງການສືບຕໍ່ຂຶ້ນທະບຽນ ແລະອອກບັດອະ ນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວຢູ່ ສປປ ລາວ.

ການຂຶ້ນທະບຽນໃນຄັ້ງນີ້ ແມ່ນຍັງສຸມໃສ່ຄົນຕ່າງປະເທດທັງໝົດຜູ້ທີ່ຂຶ້ນທະບຽນແລ້ວ ແລະຜູ້ທີ່ມາຢູ່ນະຄອນຫຼວງໃໝ່ທັງມີບັດ ແລະບໍ່ມີບັດ. ດັ່ງນັ້ນ ເພື່ອອຳນວຍຄວາມສະດວກໃຫ້ແກ່ຫົວໜ່ວຍແຮງງານ ກໍຄື ຫົວໜ່ວຍທຸລະກິດ ແລະພາກສ່ວນຕ່າງໆ, ທາງຄະນະຮັບຜິດຊອບຈຶ່ງໄດ້ແບ່ງຈຸດອອກເປັນ 9 ຈຸດໃນ 9 ຕົວເມືອງຂອງນະຄອນຫຼວງ ຄື: ເມືອງຈັນທະບູລີ, ເມືອງສີສັດຕະນາກ, ສີໂຄດຕະບອງ, ໄຊເສດຖາ, ນາຊາຍທອງ, ໄຊທານີ, ສັງທອງ, ຫາດຊາຍຟອງ ແລະເມືອງປາກງື່ມ ໂດຍແຕ່ລະເມືອງ ແມ່ນຈະໃຫ້ມາຂຶ້ນຢູ່ຫ້ອງການແຮງງານ ແລະສະຫວັດດີການສັງຄົມຂອງເມືອງ, ໂດຍເລີ່ມແຕ່ວັນທີ 1 ກັນຍາຫາ 30 ພະຈິກ 2017 ນີ້.

ທ່ານກ່າວຕື່ມວ່າ: ເພື່ອເຮັດໃຫ້ການຂຶ້ນທະບຽນມີຄວາມສະດວກ ຈຶ່ງຢາກຮຽກຮ້ອງມາຍັງອຳນາດການປົກຄອງທຸກພາກສ່ວນ ໂດຍສະເພາະ ອຳນາດການປົກຄອງບ້ານ, ຫົວໜ້າໜ່ວຍ, ຫົວໜ້າບໍລິສັດຫ້າງຮ້ານຫົວໜ່ວຍທຸລະກິດ, ຜູ້ມີເຮືອນເຊົ່າ ແລະຜູ້ໃຫ້ທີ່ພັກເຊົາ ທີ່ພັກອາໄສໃຫ້ແກ່ຄົນຕ່າງປະເທດ ແລະປະຊາຊົນຊາວນະຄອນຫຼວງວຽງຈັນ ໃຫ້ຊ່ວຍກັນປຸກລະດົມ, ຊຸກຍູ້ ແລະນຳພາຄົນຕ່າງປະເທດເຂົ້າມາຂຶ້ນທະບຽນ ແລະຂໍອະນຸຍາດເຄື່ອນໄຫວຊົ່ວຄາວນຳຄະນະຮັບຜິດຊອບຕາມຈຸດທີ່ໄດ້ກຳນົດໄວ້, ລວມທັງ ຊາວຕ່າງປະເທດທີ່ເຄື່ອນໄຫວຢູ່ນະຄອນຫຼວງວຽງຈັນ ຂໍໃຫ້ຄວາມຮ່ວມມື ແລເຂົ້າຮ່ວມຂຶ້ນທະບຽນນຳຄະນະຮັບຜິດຊອບດ້ວຍ.