ມື້1ຜ່ານໄປຍັງບໍ່ໄດ້ຄຳຕອບ! ສະມາຊິກ PS ປະກາດສູ້ຕໍ່ອີກມື້ນີ້ "ຖ້າບໍ່ໄດ້ເງິນ ບໍ່ກັບ"

ສະມາຊິກ PS ນັບພັນຄົນມາລວມຕົວຕໍ່ໜ້າບໍລິສັດ PS ໃນຕອນເຊົ້າວັນທີ 11 ກັນຍາ 2017ຕາມທີ່ໄດ້ແຈ້ງການນັດໝາຍ ຕໍ່ບໍລິສັດPS ຫວັງພົບປະທານ ເພື່ອເຈລະຈາ ຖອນເງິນຄືນຈາກບໍລິສັດ.

ຢ່າງໃດກໍຕາມ ກວ່າທີ່ ນາງສຸກນາລີ ກັບປໍເຮີ ຈະປະກົດຕົວ ແລະ ຍອມໄຂປະຕູຮົ້ວໃຫ້ສະມາຊິກ

ເຂົ້າບໍລິສັດ ກໍບ່າຍໂມງແລ້ວ.

ສ່ວນການເຈລະຈາ ໂດຍລວມກໍເປັນການໂຕ້ຖຽງກັນ ໂດຍທີ່ບໍ່ມີຄວາມຄືບຫນ້າຫຍັງ ເມື່ອສິ່ງທີ່ສະມາ
ຊິກຖາມ ເມື່ອໃດຈະສົ່ງເງິນຄືນ? ເຊິ່ງ ທ່ານ ນາງ ສຸກນາລີ ເທບສີເມືອງ ປະທານ ບໍລິສັດພີເອັສ
ບໍ່ຍອມສົ່ງເງິນຕາມສັນຍາ ແມ່ນແຕ່ຜູ້ທີ່ຖອນໄປແລ້ວກໍ່ຕາມ ຖ້າໃຜຢາກໄດ້ເງີນໃຫ້ຜ່ານ
ຂະບວນຍຸຕິທຳ . ຂະນະທີ່ສະມາຊິກ ກໍບໍ່ຍອມ ຍັງຢືນຢັນຄຳເດີມ ຖ້າບໍ່ໄດ້ເງິນ ຂໍໃຫ້ເຈົ້າຫນ້າ ດຳເນີນຄະດີ ນຳ ທ່ານ ນາງ ສຸກນາລີ ເທບສີເມືອງ.

ຫລ້າສຸດກຸ່ມທວງເງິນຄືນຈາກ PS ໄດ້ອອກມາປະກາດໃນຕອບກາງຄືນວັັນທີ11 ກັນຍາ ວ່າ: ຈະສືບຕໍ່
ປັກຫລັກສູ້ຕໍ່ ຖ້າບໍ່ໄດ້ເງິນ ພວກເຮົາບໍ່ກັບ, ວັນທີ່12/9/17 ເວລາ 8:00 ມາທີ່ ບໍລິສັດ ps ເດີ ສະມາຊິກທຸກຄົນ; ພ້ອມວອນລັດຖະບານ ຊ່ວຍແກ້ໄຂບັນຫາ ນີ້ດ່ວນ.

ກ່ອນໜ້ານີ້ ທະນາຄານແຫ່ງ ສປປລາວ (ທຫລ) ໄດ້ອອກແຈ້ງການສະບັບເລກທີ 335/ຫກ ລົງວັນທີ 2 ມິຖຸນາ 2017 ເຖິງຜູ້ຈັດການບໍລິສັດພີເອັສ ສົ່ງເສີມກະສິກຳ ແລະອຸດສະຫະກຳຄົບວົງຈອນ ຂາເຂົ້າ-ຂາອອກຈຳກັດຜູ້ດຽວ, ເລື່ອງໃຫ້ບໍລິສັດສົ່ງເງິນຄືນທັງໝົດແກ່ປະຊາຊົນທີ່ເປັນສະມາຊິກຮ່ວມທຶນນຳບໍລິສັດ ກຳນົດເວລາສົ່ງຄືນແມ່ນໄລຍະ 1 ເດືອນ, ເລີ່ມແຕ່ວັນທີ 6 ມິຖຸນາ - 6 ກໍລະກົດ 2017 ແລະ ໃຫ້ບໍລິສັດຢຸດການແອບອ້າງເຖິງຂະແໜງການລັດຕ່າງໆ.

ແຕ່ເມື່ອເຖິງກຳນົດໃນວັນທີ 6 ກໍລະກົດ 2017 ທາງ ບໍລິສັດ ພີເອັສ ກໍ່ບໍ່ໄດ້ສົ່ງເງິນຄືນ ຫຼື ມີການແກ້ໄຂໃຫ້ແກ່ປະຊາຊົນ, ມີພຽງສະມາຊິກທີ່ຕ້ອງການຖອນເງິນຄືນໄດ້ເດີນທາງໄປບໍລິສັດພີເອັສຕາມແຈ້ງການຂອງ ທຫລ ແຕ່ກໍ່ຕ້ອງກັບບ້ານດ້ວຍຄວາມຜິດຫວັງ ແລະ ບໍ່ມີຄຳຕອບໃດໆຈາກບໍລິສັດ ມີພຽງແຕ່ພະນັກງານທີ່ອອກມາຮັບໜ້າ ໂດຍແຈ້ງວ່າບໍ່ສາມາດສົ່ງເງິນຄືນໄດ້ ເນື່ອງຈາກເງິນທັງໝົດແມ່ນໄດ້ນຳໄປລົງທຶນໝົດແລ້ວ.