ອີງຕາມ ກອງປະຊຸມຈັດຕັ້ງປະຕິບັດ ການຂື້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຂົ້າມາເຄື່ອນໄຫວບໍ່ຖືກຕ້ອງຢູ່ ແຂວງ ອັດຕະປື ຄັ້ງວັນທີ 8 ກັນຍາ 2017 ຜ່ານມາໃຫ້ຮູ້ວ່າ:
ກ່ຽວກັບການຕິດຕາມກວດກາສະພາບການເຄື່ອນໄຫວຂອງຜູ້ປະກອບການທຸລະກິດຂອງຄົນຕ່າງປະເທດທີ່ເຂົ້າມາເຄື່ອນໄຫວປະກອບອາຊີບຕ່າງໆຢູ່ພາຍໃນແຂວງອັດຕະປື ຍັງພົບຄວາມຫຍູ່ງຍາກ ຍ້ອນວ່າຜູ້ປະກອບການກໍ່ຄືບັນດາຫົວໜ່ວຍແຮງງານຍັງບໍ່ທັນມີຄວາມຮັບຮູ້ ແລະເຂົ້າໃຈຕໍ່ລະບຽບຫຼັກການເທົ່າທີ່ຄວນ ເຊິ່ງເປັນສາເຫດເຮັດໃຫ້ເຈົ້າໜ້າທີກ່ຽວຂ້ອງຢູ່ທ້ອງຖິ່ນພົບຄວາມລໍາບາກໃນການຄຸ້ມຄອງ.
ປັດຈຸບັນ ພະແນກແຮງງານສະຫວັດດີການ-ສັງຄົມແຂວງ ອັດຕະປືມີຕົວເລກກ່ຽວກັບຄົນຕ່າງປະເທດເຂົ້າມາເຄື່ອນໄຫວຢູ່ພາຍໃນແຂວງອັດຕະປືທັງໝົດ 1 ພັນ 6 ຮ້ອຍກວ່າຄົນ ຍິງ 179 ຄົນ ,ລວມມີ 14 ສັນຊາດ ເຊິ່ງສ່ວນໃຫຍ່ແມ່ນຄົນສັນຊາດ ສສ ຫວຽດນາມ ໃນຈໍານວນດັ່ງກ່າວ ມີເອກະສານຖືກຕ້ອງ ແລະບໍ່ຖືກຕ້ອງ, ນອກຈາກນີ້ແລ້ວຍັງມີຄົນຕ່າງປະເທດທີ່ລັກລອບແຕ່ງງານກັບຄົນລາວມີ 63 ຄົນ ຍິງ 3 ຄົນ ມີ 5 ສັນຊາດ ພ້ອມນີ້ ຍັງມີກໍາມະກອນລີ້ຊ້ອນຢູ່ຕາມບໍລິສັດ ໂຮງຈັກ ໂຮງງານອື່ນໆອີກຈຳນວນໜຶ່ງທີ່ເຄື່ອນໄຫວບໍ່ຖືກຕ້ອງ ແລະທາງການເຈົ້າໜ້າທີ່ທີ່ກ່ຽວຂ້ອງຂອງແຂວງຍັງສືບຕໍ່ດຳເນີນການຕິດຕາມກວດກາຕື່ມຢູ່.
ກອງປະຊຸມຄັ້ງນີ້ ແມ່ນມີຄວາມສຳຄັນຫຼາຍ ເພາະວ່າ ບັນດາຜູ້ເຂົ້າຮ່ວມກໍ່ໄດ້ປະກອບຄໍາຄິດຄໍາເຫັນປືກສາຫາລືຮ່ວມກັນຫຼາຍບັນຫາ ເພື່ອຊອກຫາວິທີທາງແກ້ໄຂຕໍ່ກັບການຂຶ້ນນທະບຽນ ແລະການອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ພາຍໃນແຂວງອັດຕະປືໃຫ້ຖືກຕ້ອງຕາມລະບຽບກົດໝາຍ ຄາດວ່າ ຈຳນວນຕົວເລກ ແລະເປົ້າໝາຍດັ່ງກ່າວຈະໄດ້ຮັບການຈັດຕັ້ງປະຕິບັດໃນໄວໆນີ້.
ກອງປະຊຸມແມ່ນໄດ້ຈັດຂຶ້ນ ຢູ່ທີ່ພະແນກແຮງງານ ສະຫວັດດີການ-ສັງຄົມແຂວງ ອັດຕະປື ໂດຍການເປັນປະທານຮ່ວມຂອງທ່ານ ສຸກສະໃໝ ຈັນທະມາດ ຮອງເຈົ້າແຂວງອັດຕະປື, ທ່ານ ບຸນຄົງ ຫຼ້າສຸກັນ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ມີພະແນກການອ້ອມຂ້າງແຂວງ, ພາກສ່ວນຫົວໜ່ວຍທຸລະກິດພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ແຫລ່ງຂ່າວຈາກແຂວງອັດຕະປື
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment