ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ວ່າ: ເພື່ອຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2018 ໃຫ້ບັນລຸຕາມຄາດໝາຍຂອງແຜນການ ທີ່ສະພາແຫ່ງຊາດໄດ້ຮັບຮອງໄວ້ກໍ່ຄື: ອັດຕາການຂະຫຍາຍຕົວຂອງເສດຖະກິດມະຫາພາກ ໃນປີ 2018 ເຕີບໂຕໃນລະດັບ 7% ຕໍ່ປີ; ດັ່ງນັ້ນນປີ 2018 ລັດຖະບານຈະສຸມໃສ່ 7 ວຽກງານທີ່ເປັນພື້ນຖານຕົ້ນຕໍແມ່ນ:
1. ສືບຕໍ່ຮັກສາສະຖຽນລະພາບທາງການເມືອງ ແລະ ຄວາມເປັນລະບຽບຮຽບຮ້ອຍ ທາງສັງຄົມ.
2. ສືບຕໍ່ເສີມຂະຫຍາຍ ແລະ ຫັນເອົາທິດ, ມາດຕະການກ່ຽວກັບ ການຊຸກຍູ້ການພັດທະນາເສດຖະກິດໃຫ້ເປັນແຜນວຽກລະອຽດ, ມີແຜນຕິດຕາມ-ຊຸກຍູ້ ແລະ ກວດກາການຈັດຕັ້ງປະຕິບັດເປັນແຕ່ລະໄລຍະເປັນຕົ້ນແມ່ນ: ສືບຕໍ່ຄຸ້ມຄອງເສດຖະກິດມະຫາພາກໃຫ້ຢູ່ໃນຂອບທີ່ສະພາແຫ່ງຊາດໄດ້ຮັບຮອງ ໃນປີ 2018; ສືບຕໍ່ຈັດສັນລາຍຈ່າຍ ປີ 2018 ຢ່າງມີຈຸດສຸມ, ພ້ອມນີ້ກໍ່ເອົາໃຈໃສ່ຈັດສັນໃຫ້ຂະແໜງສຶກສາ, ສາທາລະນະສຸກ ແລະ ການຈັດສັນໃຫ້ການວິໄຈຄົ້ນຄວ້າວິທະຍາສາດໃຫ້ສົມເຫດສົມຜົນ;
3. ສືບຕໍ່ເອົາໃຈໃສ່ປະຕິບັດມາດຕະການປະຢັດ-ຕ້ານການຟູມເຟືອຍຢ່າງເຂັ້ມງວດ.
4. ສືບຕໍ່ຜັນຂະຫຍາຍມະຕິຄະນະບໍລິຫານງານສູນກາງພັກຄັ້ງທີ 4 ວ່າດ້ວຍການເພີ່ມທະວີ ວຽກງານ ຄຸ້ມຄອງ ແລະ ພັດທະນາທີ່ດິນໃນໄລຍະໃໝ່.
5. ຍູ້ແຮງການເຄື່ອນໄຫວ ແລະ ສ້າງຂະບວນການ ເພື່ອໂຄສະນາປີທ່ອງທ່ຽວປີ 2018 ໃຫ້ປະສົບຜົນສຳເລັດເປັນຢ່າງດີ, ດຶງດູດນັກທ່ອງທ່ຽວເຂົ້າມາປະເທດໃຫ້ໄດ້ຕາມຄາດໝາຍ ແລະ ໃຫ້ຫຼາຍຂຶ້ນໃນປີ 2018, ນຳໃຊ້ແມ່ແຮງໃນການສົ່ງເສີມການທ່ອງທ່ຽວໃຫ້ເປັນເຄື່ອງມືທີ່ມີປະສິດທິຜົນໃນການແກ້ໄຂບັນຫາເສດຖະກິດຂອງປະເທດ.
6. ປັບປຸງກົນໄກການຈັດຕັ້ງບໍລິຫານ ແລະ ຄຸ້ມຄອງລັດ ໃຫ້ມີຄວາມເຂັ້ມແຂງ, ໂປ່ງໃສ, ມີປະສິດທິພາບ ແລະ ມີປະສິດທິຜົນກວ່າເກົ່າ, ປັບປຸງຊັບຊ້ອນບຸກຄະລາກອນ ໃຫ້ສາມາດຮັບຮອງການຈັດຕັ້ງປະຕິບັດໜ້າທີ່ວຽກງານໃຫ້ມີປະສິດທິຜົນສູງຂຶ້ນ ແລະ ແບ່ງຂັ້ນຄຸ້ມຄອງ ລະຫວ່າງ ຂະແໜງການສູນກາງ ແລະ ທ້ອງຖິ່ນ ໃຫ້ຈະແຈ້ງ ສາມາດຈັດຕັ້ງປະຕິບັດໄດ້.
7. ຍົກສູງຕໍ່ສະຕິກົດໝາຍ ແລະ ລະບຽບການ, ສະຕິຄວາມຮັບຜິດຊອບ ແລະ ນ້ຳໃຈຮັບໃຊ້ປະຊາຊົນ ຂອງການຈັດຕັ້ງ ແລະ ພະນັກງານ, ສະກັດກັ້ນຕໍ່ຕ້ານການສໍ້ລາດບັງຫຼວງ ທີ່ເປັນໄພອັນຕະລາຍຕໍ່ການນຳພາ ແລະ ການຄຸ້ມຄອງບໍລິຫານລັດ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment