ເອົາໃຈຊ່ວຍ! ທີມວີຣັນລາວ ແລ່ນຈາກ ນວ - ຫຼວງພະບາງ ລະດົມທຶນຊ່ວຍໂຮງໝໍເດັກນ້ອຍ, ຫຼາຍພາກສ່ວນຊ່ວຍອຸປະຖໍ້າ

ທີມວີຣັນລາວ ຮ່ວມກັບ ສະຖານທູດອົດສະຕຣາລີ ຈັດແລ່ນ 385 ກິໂລແມັດ ຈາກນະຄອນຫຼວງວຽງຈັນ-ຫຼວງພະບາງ ຂຶ້ນໃນວັນທີ 16-20 ຕຸລາ 2017 ເພື່ອລະດົມທຶນຊ່ວຍເຫຼືອ ໂຮງໝໍເພື່ອລາວ ສໍາລັບເດັກນ້ອຍ ໃນແຂວງຫຼວງພະບາງ ແລະ ບັນດາແຂວງທີ່ຢູ່ພາກເໜືອ. ທັງນີ້, ກໍ່ເພື່ອເປັນການສືບຕໍ່ໂຄງການໃຫ້ເດັກນ້ອຍລາວ ໄດ້ຮັບການປິ່ນປົວທີ່ດີ ແລະ ທັງເປັນການປະກອບສ່ວນຊ່ວຍເຫຼືອການຫຼຸດຜ່ອນອັດຕາການຕາຍຂອງເດັກນ້ອຍໃນປະເທດອີກດ້ວຍ.

ທ່ານ ນາງ ມານິດາ ສິດທິມໍລະດາ ຜູ້ກໍ່ຕັ້ງທີມວີຣັນ ເປີດເຜີຍວ່າ: ໂຄງການດັ່ງກ່າວ ແມ່ນເລີ່ມມາຕັ້ງແຕ່ປີ 2014 ຜ່ານມາ ເຊິ່ງປີນີ້ ຈະມີນັກແລ່ນເຂົ້າຮ່ວມໂຄງການຫຼາຍຂຶ້ນ ທີ່ມາຈາກຫຼາຍສາຂາອາຊີບ ຖືວ່າເປັນການຮ່ວມຈິດ ຮ່ວມໃຈກັນ ຈາກຫຼາຍພາກສ່ວນ ສະນັ້ນ ໃນນາມຜູ້ຈັດໂຄງການແລ່ນເພື່ອການກຸສົນຄັ້ງນີ້ ຂໍເຊີນຊວນຮ່ວມບໍລິ ຈາກປັດໃຈ ເພື່ອຊ່ວຍໂຮງໝໍເພື່ອລາວສໍາລັບເດັກນ້ອຍ ຜ່ານໂຄງການແລ່ນ 385 ກິໂລແມັດ ວຽງຈັນ-ຫຼວງພະບາງ ເຊິ່ງການຊ່ວຍເຫຼືອຂອງທ່ານ ບໍ່ວ່າຈະນ້ອຍ ຫຼື ໃຫຍ່ ແມ່ນສາມາດຊ່ວຍເຫຼືອຊີວິດເດັກ ແລະ ຊ່ວຍພັດທະນາຊຸມຊົນຂອງເຂົາເຈົ້າໄດ້.

ສໍາລັບການແລ່ນຄັ້ງນີ້ ແບ່ງອອກເປັນ 2 ກຸ່ມ ໂດຍເລີ່ມອອກເດີນທາງໃນມື້ນີ້ໄປຈົນເຖິງວັນທີ 20 ຕຸລານີ້ ໂດຍກຸ່ມທໍາອິດມີນັກແລ່ນຫຼັກ 3 ທ່ານຄື: ທ່ານ ຄາໂລ ບາຄາລາ ນັກແລ່ນມາຣາທອນ ຊາວຟິລິບປິນ, ທ່ານ ດານຽວ ໂອເຊ ນັກແລ່ນວິບາກ ແລະ ອັນຕຣາ ມາຣາທອນ ຊາວເຢຍລະມັນ ແລະ ທ່ານ ອິນທີ ເດືອນສະຫວັນ ນັກທຸລະກິດ ທັງເປັນນັກກີລາໄອຣອນແມນ ຫຼື ໄຕກີລາຊາວລາວ ເຊິ່ງນັກແລ່ນທັງ 3 ທ່ານ ຈະແລ່ນດ້ວຍໄລຍະທາງສະເລ່ຍ 75-80 ກິໂລແມັດ.

ສ່ວນກຸ່ມທີສອງ ປະກອບມີ 4 ຄົນ ຄື: ນາງ ສົມເພັດ ວຽງດາລາ ນາງ ຈູບີ່ ດາລູວັນ ສະມາຊິກທີມວີຣັນ ທ້າວ ພູເຂົາ ພົມມາ ພະນັກງານບໍລິສັດ ລາວໂທລະຄົມ ແລະ ທ້າວ ບັນເດີ ນັກແລ່ນຊາວຟິລິບປິນ ເຊິ່ງທັງ 4 ຄົນ ຈະແລ່ນ 20 ກມ ຕໍ່ຄົນ ຫຼື ແລ່ນຜັດປ່ຽນກັນໃນໄລຍະທາງ 80 ກມ ຕໍ່ມື້.