ຄວາມຢ້ານກົວ ທີ່ຈະສ້າງຄວາມຜິດຜາດເປັນສິ່ງທີ່ສາມາດເກີດຂຶ້ຶນໄດ້ກັບນັກກີລາທຸກຄົນ ແລະ ທຸກເວລາ ໂດຍສະເພາະໃນການແຂ່ງຂັນຄັ້ງສໍາຄັນ. ຂະນະທີ່ ນັກກີລາຫຼາຍຄົນພົບວ່າ ເມື່ອຕົວເອງມີຄວາມກັງວົນກ່ຽວກັບການສ້າງຜົນງານເຊັ່ນວ່າ ຈະເຮັດໄດ້ບໍ່ດີ, ຢ້ານທີ່ຈະບໍ່ສາມາດຍິງປະຕູ ຫຼື ປ້ອງກັນຄວາມຜິດຜາດ ແລະ ອື່ນໆ.
ຄວາມຢ້ານກົວເຫຼົ່ານີ້ ຈະສົ່ງຜົນໃຫ້ນັກກີລາພະຍາຍາມ ທີ່ຈະຄວບຄຸມການຫຼິ້ນຂອງຕົວເອງ, ພະຍາຍາມທີ່ຈະປະຄອງເກມການຫຼິ້ນໃຫ້ທຸກຢ່າງອອກມາສົມບູນແບບທີ່ສຸດເທົ່າທີ່ຈະເປັນໄປໄດ້ ແຕ່ສິ່ງທີ່ຕາມມາກໍ່ຄືຍິ່ງນັກກີລາພະຍາຍາມຄວບຄຸມຫຼາຍເທົ່າໃດ ຜົນງານທີ່ອອກມາ ກັບຍິ່ງຄວບຄຸມບໍ່ໄດ້ຍາກຂຶ້ນເທົ່ານັ້ນ.
ສາເຫດຂອງການຢ້ານການຜິດຜາດ ທີ່ພວກເຮົາພົບຫຼາຍທີ່ສຸດຢ່າງໜຶ່ງ ຄືການຢ້ານທີ່ຈະສ້າງຄວາມຜິດຜາດໃຫ້ກັບບຸກຄົນທີ່ມີຄວາມສໍາຄັນຕໍ່ຕົວເອງ, ບໍ່ວ່າຈະເປັນຜູ້ປົກຄອງ, ຄູຝຶກ, ຜູ້ສະໜັບສະໜູນ ລວມໄປເຖິງຜູ້ຊົມ. ນັກກີລາຫຼາຍຄົນຕ້ອງການໃຫ້ບຸກຄົນເຫຼົ່ານີ້ຍອມຮັບ ແລະ ບໍ່ຕ້ອງການເຮັດໃຫ້ພວກເຂົາຜິດຫວັງ.
ດັ່ງນັ້ນ, ນັກກີລາຈະພະຍາຍາມ ແລະ ຕັ້ງໃຈເປັນພິເສດໃນການຫຼິ້ນ ແຕ່ການພະຍາຍາມທີ່ຫຼາຍເກີນໄປຈະຂັດຂວາງການຫຼິ້ນທີ່ເປັນທໍາມະຊາດ ແລະ ສົ່ງຜົນໃຫ້ນັກກີລາບໍ່ສາມາດສະແດງຄວາມສາມາດສູງສຸດອອກມາໄດ້ ໃນການແຂ່ງຂັນ.
ແນ່ນອນທຸກຄົນຕ້ອງການໃຫ້ຜູ້ອື່ນເຄົາລົບ ແລະ ຍອມຮັບ ໃນຖານະຂອງນັກກີລາທີ່ມີຄວາມສາມາດ, ຄວາມຕ້ອງການເຫຼົ່ານີ້ປຽບເໝືອນດາບສອງຄົມຄື: ນັກກີລາທີ່ຕ້ອງການຍອມຮັບຈາກຜູ້ອື່ນ ຈະມີຄວາມຕ້ອງການທີ່ຈະພັດທະນາຕົວເອງ ແຕ່ກົງກັນຂ້າມ ຖ້ານັກກີລາໄປໃຫ້ຄວາມສໍາຄັນກັບຄວາມຄິດຂອງຄົນອື່ນທີ່ມີຕໍ່ຕົວພວກເຮົາ ໃນການແຂ່ຂັນນັກກິລາຈະພົບວ່າ ມັນຄືແຮງກົດດັນທີ່ສົ່ງຜົນໃຫ້ຕົວເອງນັ້ນເສຍສະມາທິ ແລະ ສົ່ງຜົນໃຫ້ການຫຼິ້ນເຕັມໄປດ້ວຍຄວາມຕື້ງຄຽດ ແລະ ສ້າງຜົນງານໄດ້ບໍ່ດີ.
ດັ່ງນັ້ນ, ມື້ນີ້ ແອັດມິນ ຂໍແນະນໍາ ວິທີການທີ່ງ່າຍທີ່ສຸດ ໃນການຈັດກັບບັນຫານີ້ກໍ່ຄື: ການປ່ອຍວາງ, ເລີກສົນໃຈຄວາມຄິດຂອງຄົນອື່ນ ແລະ ກັບມາສົນໃຈແຕ່ງານຂອງຕົວເອງ ເຊິ່ງຟັງແລ້ວເໝືອນເປັນເລື່ອງງ່າຍ ແຕ່ການປະຕິບັດຕົວຈິງນັ້ນບໍ່ໄດ້ງ່າຍເລີຍ.
1.ທໍາອິດນັກກີລາຈໍາເປັນທີ່ຈະຕ້ອງໄດ້ຮັບການຝຶກການຈັດການກັບຄວາມຄິດຂອງຕົວເອງ ໃຫ້ເລັ່ງເປົ້າຄວາມສົນໃຈມາຢູ່ກັບການແຂ່ງຂັນທີ່ຢູ່ຕໍ່ໜ້າ ແລະ ສົນໃຈໃນເລືອງຄວບຄຸມໄດ້.
2.ນັກກີລາຈໍາເປັນທີ່ຈະຕ້ອງເພີ່ມການນັບຖືຕົວເອງ ເພາະເມື່ອເຈົ້ານັບຖືຕົວເອງແລ້ວ ເຈົ້າຈະສະແຫວງຫາຄວາມເຄົາລົບ ແລະ ການຍອມຮັບຈາກຄົນອື່ນໜ້ອຍລົງ.
ເຊິ່ງການເຄົາລົບຕົວເອງ ຫຼື ນັບຖືຕົວເອງນັ້ນເປັນສິ່ງສໍາຄັນໃນການນດໍາເນີນຊີວິດ ຈາກງານວິໄຈພົບວ່າ: ຄົນທີ່ມີລະດັບການນັບຖືຕົວເອງຕໍ່າ ຈະມີບັນຫາດ້ານອາລົມຫຼາຍກວ່າຄົນທີ່ມີການນັບຖືຕົວເອງສູງ ໂດຍຄົນທີ່ມີການນັບຖືຕົວເອງຕໍ່າ ມັກຈະກັງວົນຢູ່ສະເໝີວ່າ ຕົວເອງຈະບໍ່ປະສົບຄວາມສໍາເລັດໃນຊີວິດ, ມັກຈະກັງວົນວ່າ ຄົນອື່ນຄິດແນວໃດກັບຕົວເອງ ແລະ ກັງວົນວ່າ ຕົວເອງຈະບໍ່ມີຄວາມສາມາດໃນການຈັດການກັບບັນຫາຕ່າງໆທີ່ເຂົ້າມາໃນຊີວິດ.
ກົງກັນຂ້າມຄົນທີ່ມີການນັບຖືຕົວເອງສູງ ຈະກ້າສ່ຽງຫຼາຍຂຶ້ນ ແລະ ໝັ້ນໃຈໃນຄວາມສາມາດຂອງຕົວເອງ ໃນການຈັດການກັບບັນຫາ ຫຼື ຄວາມທ້າທາຍຕ່າງໆ ທີ່ຜ່ານເຂົ້າມາໃນຊີວິດ ລວມໄປເຖິງຈະບໍ່ວິຕົກກັງວົນວ່າ ຄົນອື່ນຈະຍອມຮັບຕົວເອງ ຫຼື ບໍ? ແລະ ຄິດກ່ຽວກັບຕົວເອງ ເຊິ່ງການປະສະຈາກຄວາມຢ້ານກົວບ່ອນນີ້ ຈະເຮັດໃຫ້ພວກເຮົາສາມາດໃຊ້ຊີວິດ ໄດ້ຢ່າງມີປະສິດທິພາບ ແລະ ມີຄວາມສຸກຫຼາຍຂຶ້ນ.
ດັ່ງນັ້ນ, ຈິ່ງເປັນເລື່ອງສໍາຄັນທີ່ນັກກີລາ ແລະ ຜູ້ທີ່ກ່ຽວຂ້ອງທຸກຄົນ ຕ້ອງໃຫ້ຄວາມສໍາຄັນກັບການສ້າງຄວາມນັບຖືໃນຕົວເອງ ລວມເຖິງການສິ່ງເສີມໃຫ້ເກີດການຝຶກຄວາມແຂງແກ່ນທາງຈິດໃຈທີ່ມີປະສິດທິພາບໃຫ້ແກ່ນັກກີລາຕໍ່ໄປ.
ທີ່ມາ: www.sportmindmatters.com
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment