ອຸຕຸເຕືອນ! ຝົນຍັງຈະສືບຕໍ່ຕົກຕື່ມອີກຫຼາຍມື້

ກົມອຸຕຸນິຍົມ ແລະ ອຸຕຸທົບກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ອອກບົດລາຍງານສະພາບພະຍາກອນອາກາດ ເລກທີ 1015/ກອຕທ, ນະຄອນຫຼວງວຽງຈັນ, ລົງວັນທີ 16ຕຸລາ 2017 ຄາດຄະເນສະພາບອາກາດ ແລະ ລະດັບນ້ຳ ໃນໄລຍະວັນທີ16 ຫາ 22 ຕຸລາ 2017 ວ່າ: ໃນໄລຍະວັນທີ 16 ຫາ 18 ຕຸລາ 2017 ພາຍຸໜູນເຂດຮ້ອນຄະໜຸນ ຫົວທີ 20 ປະຈຳປີ 2017 ຍັງຈະສືບຕໍ່ເຄື່ອນທີ່ຢູ່ໃກ້ເຂດເກາະໄຮໜຳ ຈາກນັ້ນອ່ອນກຳລັງລົງເປັນພາຍຸດີເປຼ່ຊັນເຄື່ອນທີ່ຜ່ານພາກກາງຂອງປະເທດຫວຽດນາມ ແລະ ຜ່ານພາກກາງ ຫຼື ພາກໃຕ້ຂອງປະເທດລາວ.

ພ້ອມດຽວກັນນີ້ ບໍລິເວນຄວາມກົດດັນອາກາດສູງຈະປົກຄຸມເຂດພາກເໜືອ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງໃນແຕ່ລະພາກ ແລະ ຕົກໜັກພ້ອມມີລົມພັດແຮງຢູ່ບາງທ້ອງຖິ່ນ.

ຈາກນັ້ນໄລຍະວັນທີ 19-20 ຕຸລາ ບໍລິເວນຄວາມກົດດັນອາກາດສູງຈະມີກຳລັງແຮງເພີ່ມຂຶ້ນປົກຄຸມເຂດພາກເໜືອ ພ້ອມດຽວກັນນັ້ນ ພາຍຸໜູນເຂດຮ້ອນຈະກໍ່ຕົວອີກຫົວໃໝ່ໃນເຂດທະເລຈີນໃຕ້ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງ ຢູ່ເຂດພາກເໜືອດ້ານຕາເວັນຕົກ ແລະ ເຂດພາກໃຕ້.

ໃນໄລຍະວັນທີ 21-22 ຕຸລາ 2017 ພາຍຸໜູນເຂດຮ້ອນຈະເພີ່ມກໍາລັງແຮງຂຶ້ນຕື່ມອີກ ເຄື່ອນທີ່ໄປທາງທິດຕາເວັນອອກສ່ຽງເໜືອ ມຸ່ງໜ້າເຂົ້າຫາປະເທດຟີລິບປິນ ເຊິ່ງຈະເຮັດໃຫ້ມີຝົນຕົກຟ້າຮ້ອງ ຟ້າເຫຼື້ອມໃນລະດັບຄ່ອຍ ແລະ ຕົກປານກາງພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ