ທ່ານ ນາງ ປອ. ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ລາຍງານຕໍ່ກອງປະຊຸມສະພາໃນວັນທີ16 ຕຸລາຜ່ານມາວ່າ:ຜົນການກວດກາດ້ານງົບປະມານ ໃນສົກປີ 2015-2016 ໄດ້ກວດສອບເຫັນ ລາຍຮັບສ່ວຍສາອາກອນ, ລາຍຮັບຊັບສິນຂອງລັດ, ເງິນກອງທຶນລັດ ແລະ ອື່ນໆ ທີ່ບໍ່ໄດ້ມອບເຂົ້າງົບປະມານແຫ່ງລັດ ຈຳນວນ 689,61 ຕື້ກີບ; ໃນນັ້ນ ຂັ້ນສູນກາງ ຈຳນວນ 516,07 ຕື້ກີບ ແລະ ຂັ້ນທ້ອງຖິ່ນ ຈຳນວນ 173,54 ຕື້ກີບ.
ກວດສອບເຫັນການຂຸດຄົ້ນໄມ້ເກີນໂກຕາທີ່ລັດຖະບານອະນຸມັດຈາກແຂວງຊຽງຂວາງ ແລະ ອັດຕະປື ຈຳນວນ 28.238 ແມັດກ້ອນ.
ກວດພົບການຂຸດຄົ້ນໄມ້ທີ່ບໍ່ໄດ້ຮັບອະນຸຍາດຈາກລັດຖະບານ ຂອງແຂວງບໍ່ແກ້ວ, ສາລະວັນ, ເຊກອງ ແລະ ຈຳປາສັກ ຈຳນວນ 11.788 ແມັດກ້ອນ ແລະ 1.216 ໂຕນ.
ກວດພົບ ການຈັດຕັ້ງປະຕິບັດການຂາຍໄມ້ຂອງບັນດາ 4 ແຂວງພາກໃຕ້ເຊັ່ນ: ສາລະວັນ, ເຊກອງ, ອັດຕະປື ແລະ ຈຳປາສັກ ບໍ່ໄດ້ດຳເນີນການປະມູນຕາມລະບຽບການທີ່ໄດ້ກຳນົດໄວ້ ຈຳນວນ 25.771ແມັດກ້ອນ ແລະ 1.848 ໂຕນ ມູນຄ່າສັນຍາ ຈຳນວນ 41,18 ຕື້ກີບ.
ພ້ອມກວດສອບເຫັນ 3 ແຂວງເຊັ່ນ: ຊຽງຂວາງ, ເຊກອງ ແລະ ຈຳປາສັກ ໄດ້ຂາຍໄມ້ຫຼຸດລາຄາຕໍ່າສຸດທີ່ກະຊວງອຸດສາຫະກຳ ແລະ ການຄ້າກຳນົດ ຈຳນວນ 5,37 ຕື້ກີບ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment