ອອກມາແລ້ວ!ກະຊວງການເງິນ ປະກາດ ໃຫ້ໄປເສຍຄ່າທຳນຽມທາງປີ2017 ເລີ່ມແຕ່ວັນທີ 30 ຕຸລາ ເປັນຕົ້ນໄປ

ກະຊວງການເງິນໄດ້ອອກແຈ້ງໃຫ້ຜູ້ໃຊ້ລົດໄປເສຍຄ່າທໍານຽມທາງປີຈຳປີ2017 ນັບແຕ່ວັນທີ 30 ຕຸລານີ້ເປັນຕົ້ນໄປ,ການຊຳລະເງິນຄ່າທຳນຽມທາງແມ່ນ ໃຫ້ຊຳລະຜ່ານລະບົບທະນາຄານ ໂດຍມີ5 ທາງເລືອກ .ຫາກທ່ານໃດບໍ່ເສຍກໍຈະມີການປັບໃຫມ ຕາມແຕ່ລະກໍລະນີ, ຂະນະທີ່ຄ່າທຳນຽມ ແມ່ນປະຕິບັດຕາມ ລັດຖະດຳລັດຂອງປະທານປະເທດ ເລກທີ 001/ປປທ ລົງວັນທີ 20 ກັນຍາ 2017

ຫ້ອງການກະຊວງການເງິນ ໄດ້ອອກແຈ້ງການ ເລກທີ 2667/ຫກງ ລົງວັນທີ 17 ຕຸລາ 2017 ເລື່ອງການເສຍຄ່່າທໍານຽມທາງ (ໃບຄ່າທາງ) ປະຈໍາປີ 2017 ໂດຍໃຫ້ປະຕິບັດຕາມດັ່ງນີ້:
1. ເນື່ອງຈາກມີການປັບປຸງນິຕິກຳ ແລະ ກົນໄກການຄຸ້ມຄອງການເກັບຄ່າທຳນຽມທາງໃນປີ ດ້ວຍລະບົບທີ່ທັນສະໄໝຫຼ້າຊ້າ ແລະ ອີງຕາມຜົນໃນການຈັດຕັ້ງປະຕິບັດ, ສະນັ້ນ ການເສຍຄ່າທຳນຽມທາງປະຈຳປີ 2017 ໃຫ້ເລີ່ມເສຍຄ່າທຳນຽມທາງ ນັບແຕ່ວັນທີ 30 ຕຸລາ 2017 ເປັນຕົ້ນໄປ.

2. ໄລຍະເວລາປົກກະຕິຂອງການເສຍຄ່າທຳນຽມທາງປະຈຳປີ 2017 ຍ້ອນມີການຫຼ້າຊ້າຕາມເຫດຜົນທີ່ໄດ້ກ່າວໃນຂໍ້ 1 ຂ້າງເທິງ; ດັ່ງນັ້ນ, ການເສຍຄ່າທຳນຽມທາງ ຈຶ່ງສາມາດແກ່ຍາວຮອດ ວັນທີ 31 ມີນາ 2018 ແຕ່ຖ້າກາຍກຳນົດເວລາດັ່ງກ່າວ ຈະຖືກປັບໄໝຕາມແຕ່ລະກໍລະນີທີ່ໄດ້ກຳນົດໄວ້ໃນ IV ຂໍ້ 2 ຂອງຄຳແນະນຳຈັດຕັ້ງປະຕິບັດ ລັດຖະບັນຍັດວ່າດ້ວຍຄ່າທຳນຽມທາງສະບັບເລກທີ 3455/ກງ ລົງວັນທີ 10 ຕຸລາ 2017.

3. ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ນຳໃຊ້ຍານພາຫະນະໃໝ່ ເຖິງແມ່ນວ່າຈະນຳໃຊ້ ຫຼື ຂຶ້ນທະບຽນຍານພາຫະນະໃນວັນທີ ຫຼື ເດືອນໃດກໍຕາມພາຍໃນປີ ກໍຕ້ອງໄດ້ເສຍຄ່າທຳນຽມທາງປະຈຳປີນັ້ນ.
4. ອັດຕາຄ່າທຳນຽມທາງແມ່ນ ໃຫ້ປະຕິບັດຕາມລັດຖະບັນຍັດຂອງປະທານປະເທດສະບັບເລກທີ 001/ປປທ ລົງວັນທີ 20 ກັນຍາ 2017 ວ່າດ້ວຍຄ່າທໍານຽມທາງ.

5. ການຊຳລະເງິນຄ່າທຳນຽມທາງແມ່ນ ໃຫ້ຊຳລະຜ່ານລະບົບທະນາຄານ (ທະນາຄານການຄ້າຕ່າງປະເທດລາວມະຫາຊົນ) ດ້ວຍ 5 ທາງເລືອກຄື: ຊຳລະຜ່ານລະບົບເຄົາເຕີຂອງທະນາຄານ, ຊຳລະຜ່ານແອັບພິເຄເຊິນມືຖື, ຊຳລະຜ່ານຕູ້ເອທີເອັມ, ຊຳລະຜ່ານຕູ້ອັດຕະໂນມັດ ແລະ ຊຳລະຜ່ານສະຖານທີ່ຈຸດໃຫ້ບໍລິການທີ່ໄດ້ຮັບອະນຸຍາດ, ຖ້າຫາກບໍ່ເຂົ້າໃຈລາຍລະອຽດ ແມ່ນໃຫ້ຕິດຕໍ່ສອບຖາມມາຍັງ ກົມສ່ວຍສາອາກອນ: 021 217 025 ແລະ ບໍລິການສອບຖາມຂອງທະນາຄານການຄ້າຕ່າງປະເທດລາວ ມະຫາຊົນ: 1555.
ສ່ວນລາຍລະອຽດຂັ້ນຕອນຂອງການຊຳລະຈະມີຄູ່ມືປະຕິບັດຕ່າງຫາກ.