ວັນທີ 18 ຕຸລາ 2017 ນີ້, ໜ່ວຍງານມາດຕະຖານ ແລະວັດແທກຂອງພະແນກວິທະຍາສາດ ແລະເຕັກໂນໂລຊີແຂວງສະຫວັນນະເຂດ ໄດ້ລົງເຄື່ອນໄຫວກວດກາມາດຕະຖານຂອງຕາຊັ່ງ ຢູ່ຕາມຮ້ານຂາຍຄຳແຕ່ລະຮ້ານໃນແຂວງສະຫວັນນະເຂດ ພ້ອມທັງເກັບຄ່າທຳນຽມປະຈຳປີ ແລະຕິດກາມາດຕະຖານໃສ່ໃນເຄື່ອງຊັ່ງຄຳຂອງແຕ່ລະຮ້ານ ເພື່ອໃຫ້ລູກຄ້າໄດ້ຮັບຄວາມໄວ້ເນື້ອເຊື່ອໃຈວ່າ ຮ້ານດັ່ງກ່າວມີການກວດສອບຈາກໜ່ວຍງານມາດຕະຖານ ແລະວັດແທກຂອງພະແນກວິທະຍາສາດ ແລະເຕັກໂນໂລຊີແລ້ວ.
ທ່ານ ສີສະຫວ່າງ ແສງຈັນ ຮອງຫົວໜ້າໜ່ວຍງານມາດຕະຖານ ແລະວັດແທກໃຫ້ສໍາພາດຕໍ່ກັບສື່ພວກເຮົາວ່າ: ກ່ຽວກັບການຄຸມຄອງຊິງຊັງແມ່ນໄດ້ກວດສອບທຸກໆປີ ເອີ້ນວ່າກວດກາປະຈຳປີ ໂດຍຈະກວດຊິງຊັງຮ້ານຂາຍຄຳ ແລະຮ້ານຂາຍເງິນ, ໂດຍຈັດຕັ້ງປະຕິບັດມາແຕ່ປີ 2015 ເປັນຕົ້ນມາເຊິ່ງເຫັນໄດ້ວ່າແຕ່ລະຮ້ານແມ່ນຍັງບໍພົບເຫັນຜູ້ລະເມີດ ຫຼື ໂກງຕາຊັ່ງ, ສ່ວນພວກຊິງຊັງຕາມຮ້ານຂາຍຊີ້ນ, ປາ... ແມ່ນມອບໃຫ້ບັນດາໜ່ວຍງານປະຈຳເມືອງຕ່າງໆເປັນຜູ້ກວດສອບ ແລະຄຸ້ມຄອງ.
ທີ່ຜ່ານມາທາງໜ່ວຍງານດັ່ງກ່າວຍັງໄດ້ກວດສອບພົບເຫັນແປ້ງນົວ, ກາເຟ ແລະອາໄລ່ຂອງບໍລິສັດໂຄບູຕ້າເປັນຂອງຮຽນແບບເຄື່ອງໝາຍການຄ້າ ແລະໄດ້ຢຶດມາທຳລາຍແລ້ວເປັນຈຳນວນຫຼວງຫຼາຍ; ທີ່ຜ່ານມາກໍ່ໄດ້ມີການກວດສອບມາດຕະຖານຂອງກົງເຕີນ້ຳປະປາ ແລະໃນອີກບໍ່ພໍທໍໃດເດືອນຂ້າງໜ້ານີ້ກໍ່ຈະມີການກວດສອບກົງເຕີໄຟຟ້ານຳອີກ ຄາດວ່າພາຍໃນເດືອນ ພະຈິກ 2017 ແມ່ນຈະໄດ້ເລີ່ມຈັດຕັ້ງປະຕິບັດ ໂດຍຈະໄດ້ເຄືອນໄຫວກວດກາໄປຕາມແຕ່ລະຄົວເຮືອນຂອງພໍ່ແມ່ປະຊາຊົນສະເພາະກົງເຕີໄຟຟ້າທີ່ໄດ້ຕິດຕັ້ງມາແລ້ວ 2 ປີ ແມ່ນຈະໄດ້ກວດສອບຄືນປີລະໜຶ່ງຄັ້ງທັງກົງເຕີໄຟຟ້າ ແລະນຳປະປາ.
ສຳລັບຄຸນະພາບນ້ຳມັນແມ່ນທາງໜ່ວຍງານດັ່ງກ່າວໄດ້ສົມທົບກັບທາງກະຊວງວິທະຍາສາດແລະເຕັກໂນໂລຊີ, ກົມວັດແທກ ແລະມາດຕະຖານ ເພື່ອກວດສອບຄຸນນະພາບນ້ຳມັນໃນແຕ່ລະປ້ຳ, ແຕ່ລະເມືອງຂອງແຂວງສະຫວັນນະເຂດ ທັງນີ້ກໍ່ເພື່ອຄວາມຍຸຕິທຳລະຫວ່າງຜູ້ປະກອບການ ແລະຜູ້ຊົມໃຊ້ໃຫ້ໄດ້ຮັບຜົນປະໂຫຍດທັງສອງຝ່າຍອີກດ້ວຍ./
ແຫລ່ງຂ່າວຈາກແຂວງສະຫວັນນະເຂດ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment