ໃນຕອນບ່າຍ ຂອງວັນທີ 19 ຕຸລາ 2017 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການ ຕ້ານການສໍ້ລາດບັງຫຼວງ ຂັ້ນສູນກາງ ໄດ້ໃຫ້ກຽດພົບປະໂອ້ລົມ ຕໍ່ພະນັກງານການນຳຫຼັກແຫຼ່ງ ເມືອງຈອມເພັດ, ແຂວງຫຼວງພະບາງ ທີ່ສະໂມສອນຂອງເມືອງດັ່ງກ່າວ
ກ່ອນອື່ນ, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານ ສະພາບການພັດທະນາ ເສດຖະກິດ-ສັງຄົມຂອງເມືອງ ໂດຍຫຍໍ້ ຈາກທ່ານ ຈັນ ວັນນະສີ ເຈົ້າເມືອງໆຈອມເພັດ ເຊິ່ງເຫັນວ່າ: ທົ່ວເມືອງສືບຕໍ່ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ ໂດຍພື້ນຖານ, ເສດຖະກິດ ໄດ້ຮັບການພັດທະນາ ແລະ ຂະຫຍາຍຕົວ ໃນລະດັບ 8,4%, ສະເລ່ຍລາຍຮັບ ໃສ່ຫົວຄົນ ບັນລຸ 1.145 ໂດລາ, ເດັກໃນເກນອາຍຸ ໄດ້ເຂົ້າຮຽນ ກວມ 98%, ມີບ້ານປອດຄະດີ ກວມ 91%; ມີເສັ້ນທາງລົດໄຟ ຜ່ານ 19 ກິໂລແມັດ ໂດຍກວມເອົາ 7 ບ້ານ; ໃນໄລຍະເສັ້ນທາງ 19 ກິໂລແມັດນີ້ ປະກອບມີ 2 ສະຖານີ, ຂົວ 8 ແຫ່ງ, ອຸໂມງ 6 ແຫ່ງ, ມີປະຊາຊົນ ຖືກຜົນກະທົບ ຈຳນວນ 57 ຄອບຄົວ; ໃນນັ້ນ ມີເນື້ອທີ່ນາ 5 ກວ່າເຮັກຕາ, ສວນໄມ້ສັກ 21 ເຮັກຕາ, ສວນໄມ້ກິນໝາກ ແລະ ອື່ນໆ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ມີຄຳເຫັນຊີ້ນຳ ຕໍ່ການພັດທະນາເສດຖະກິດສັງຄົມ ຂອງເມືອງ ຕື່ມບາງດ້ານ ເປັນຕົ້ນ ເອົາໃຈໃສ່ປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບ ຢ່າງແຂງແຮງ ໂດຍສະເພາະແມ່ນ ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ຢ່າງທັນການ; ເອົາໃຈໃສ່ພັດທະນາສີມືແຮງງານ ໃຫ້ແກ່ປະຊາຊົນ ເພື່ອສາມາດ ສ້າງວຽກເຮັດງານທຳ ກໍ່ຄື ລາຍຮັບໃຫ້ແກ່ເຂົາເຈົ້າ.
ເອົາໃຈໃສ່ຕໍ່ການແກ້ໄຂ ຄວາມທຸກຍາກ ຂອງປະຊາຊົນ ໃຫ້ຫຼຸດໜ້ອຍຖອຍລົງ ເປັນກ້າວໆ; ສືບຕໍ່ຊຸກຍູ້ປະຊາຊົນ ເອົາໃຈໃສ່ພັດທະນາຕົນເອງ ໂດຍເລັ່ງໃສ່ການນຳໃຊ້ທ່າແຮງ ຂອງທ້ອງຖິ່ນ ລວມທັງ ການສ້າງສະຕິ ຄວາມເປັນເຈົ້າ ເຄົາລົບລະບຽບກົດໝາຍ, ນັບຖືການຈັດຕັ້ງ, ສ້າງສະຕິຊາດ...; ເອົາໃຈໃສ່ຕໍ່ວຽກງານ ຮັກສາສຸຂະພາບ ຂອງປະຊາຊົນ ຕາມຫຼັກອະນາໄມ 3 ສະອາດ; ປັບປຸງລະບົບການເມືອງຢູ່ຮາກຖານ ໃຫ້ມີຄວາມໜັກແໜ້ນ, ເຂັ້ມແຂງ ບົນພື້ນຖານຄວາມເປັນເອກະພາບ ຂອງຄະນະພັກ-ຄະນະນຳທຸກຂັ້ນ ແລະ ຄວາມສາມັກຄີພາຍໃນ ຢ່າງແໜ້ນແຟ້ນ ເຊິ່ງສິ່ງເຫຼົ່ານີ້ ມັນເປັນຂອດຕັດສິນ ຕໍ່ການຈັດຕັ້ງປະຕິບັດວຽກງານ ຮອບດ້ານ ຂອງເມືອງ ໃຫ້ມີຜົນສຳເລັດ.
ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment