ເຈົ້າໜ້າທີ່ແຂວງຫຼວງນ້ຳທາກວດເຫັນລົດນຳເຂົ້າບໍ່ຖືກຕ້ອງຈາກປະເທດເພື່ອນບ້ານເຊັ່ນ ສປ ຈີນ, ມຽນມາ,ໄທແລະ ແຂວງໃກ້ຄຽງຈຳນວນ 893 ຄັນ ໃນຊ່ວງຕົ້ນປີ 2017.
ທ່ານ ທອງຫຼ້າ ອອນລືໄຊ ຫົວໜ້າກອງກວດກາພາສີແຂວງຫຼວງນ້ຳທາ, ຄະນະກໍາມະການແກ້ໄຂພາຫະນະນຳເຂົ້າບໍ່ຖືກຕ້ອງຂັ້ນແຂວງ ໃຫ້ສຳພາດຕໍ່ສື່ມວນຊົນວ່າ: ໃນຊ່ວງຕົ້ນປີ 2017 ຄືເລີ່ມແຕ່ວັນທີ 1 ມັງກອນ ເຖິງ 31 ມີນາ 2017 ໄດ້ກວດເຫັນຈຳນວນພາຫານະນຳເຂົ້າບໍ່ຖືກຕ້ອງທີ່ເຈົ້າຂອງພາຫານະມາແຈ້ງນຳຄະນະກຳມະການທັງໝົດ 893 ຄັນ,ໃນນີ້ມີລົດບັນທຸກ 29 ຄັນ, ລົດກະບະ 390 ຄັນ, ລົດເກັງ 362 ຄັນ, ລົດຈິບ 61 ຄັນ, ລົດຕູ້ 8 ຄັນ, ລົດຕຸກໆ 1 ຄັນ, ລົດຈັກ 42 ຄັນ. ຮອດວັນທີ 31 ມີນາ 2017 ໄດ້ແກ້ໄຂສຳເລັດແລ້ວ 350 ຄັນໃນນີ້ມີ ລົດບັນທຸກ 11 ຄັນ, ລົດກະບະ 152 ຄັນ, ລົດເກັງ 137 ຄັນ, ລົດຈິບ 26 ຄັນ, ລົດຕູ້ 3 ຄັນ ແລະ ລົດຈັກ 21 ຄັນ. ພ້ອມກັນນັ້ນ, ຈຳນວນລົດທີ່ຍັງບໍ່ທັນໄດ້ແກ້ໄຂລວມມີ 539 ຄັນ, ສາມາດເກັບລາຍຮັບຈາກການແກ້ໄຂລົດນຳເຂົ້າບໍ່ຖືກຕ້ອງໄດ້ທັງໝົດ 8 ຕື້ກວ່າກີບ.
ທ່ານຫົວໜ້າກອງກວດກາພາສີແຂວງຫຼວງນ້ຳທາ ກ່າວຕື່ມວ່າ: ແຂວງຫຼວງນ້ຳທາມີຊາຍແດນຕິດກັບປະເທດມຽນມາ, ສປ ຈີນ ແລະ ເປັນທາງຜ່ານເສັ້ນທາງ R3A ເຮັດໃຫ້ສະພາບການລັກລອບນໍາເຂົ້າພາຫານະບໍ່ຖືກຕ້ອງໄດ້ງ່າຍ.
ຢ່າງໃດກໍ່ດີ ເພື່ອປະຕິບັດຕາມແຈ້ງການຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 1943 ລົງວັນນທີ 8 ທັນວາ 2016 ແລະ ສະບັບເລກທີ 142 ລົງວັນທີ 25 ມັງກອນ 2017 ກ່ຽວກັບການກຳນົດມູນຄ່າແຈ້ງເສຍພາສີ-ອາກອນ ແລະ ໃຫ້ແກ້ໄຂພາຫານະນຳເຂົ້າບໍ່ຖືກຕ້ອງໃນຂອບເຂດທົ່ວປະເທດ ແລະ ແຈ້ງການຂອງກະຊວງການເງິນສະບັບເລກທີ 2088/ກງ,ແຈ້ງການແນະນຳສະບັບເລກທີ 0095/ກງ ກ່ຽວກັບການແກ້ໄຂພາຫານະນຳເຂົ້າບໍ່ຖືກຕ້ອງ ແລະ ປະຕິບັດຕາມຂໍ້ຕົກລົງຂອງທ່ານເຈົ້າແຂວງສະບັບເລກທີ 633/ຈຂ ລົງວັນທີ 11 ຕຸລາ 2016 ວ່າດ້ວຍກາານແຕ່ງຕັ້ງຄະນະກຳມະການແກ້ໄຂລົດນຳເຂົ້າ ແລະ ຊື້ຂາຍລົດບໍ່ຖືກຕ້ອງຕາມລະບຽບກົດໝາຍຢູ່ພາຍໃນແຂວງ.
ທ່ານຍັງໄດ້ຮຽກຮ້ອງມາຍັງອົງການປົກຄອງແຕ່ລະຂັ້ນ ຈົ່ງເປັນເຈົ້າການສຶກສາອົບຮົມໃຫ້ພະນັກງານ, ທະຫານ,ຕຳຫຼວດ, ນັກທຸລະກິດ, ຊາວຄ້າຂາຍ ແລະ ປະຊາຊົນຜູ້ທີ່ນຳໃຊ້ ແລະ ມີພາຫານະນຳເຂົ້າບໍ່ຖືກຕ້ອງໄວ້ຄອບຄອງຈົ່ງເປັນເຈົ້າການຕື່ນຕົວປະກອບສ່ວນເສຍພັນທະພາສີ-ອາກອນ, ນຳເອົາພາຫານະມາເສຍພາສີ-ອາກອນຕາມລະບຽບກົດໝາຍ.
ຂ່າວ:ກິ່ນນາລົມ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment