ຜ່ານມາລາວອັບເດດພວກເຮົາໄດ້ນຳສະເໜີຜົນງານຂອງນ້ອງໆນັກຮຽນໃນໂຮງຮຽນກິນນອນຊົນເຜົ່າແຂວງອຸດົມໄຊທີ່ກຳລັງບຸກເບິກ ແລະເລີ່ມປູກຜັກກິນເອງເພື່ອຫຼຸດຜ່ອນຄ່າໃຊ້ຈ່າຍຂອງໂຮງຮຽນ ມື້ນີ້ມີຄວາມຄືບໜ້າມາຝາກອີກ ສວນຜັກຂອງນ້ອງເພິ່ນຂຽວເຕັມເດິ່ນເຫັນແລ້ວເປັນຕາສະອອນ.
ໂຮງຮຽນກິນນອນຊົນເຜົ່າແຂວງອຸດົມໄຊນັບເປັນໂຮງຮຽນຕົວແບບທີ່ຫຼາຍໂຮງຮຽນຄວນນຳໄປປະຕິບັດໃນຊຸມຊົນຂອງຕົນ ເພື່ອໃຫ້ນ້ອງນັກຮຽນມີຄວາມຮູ້ດ້ານກະສິກຳທີ່ເປັນທ່າແຮງຂອງປະເທດເຮົາ ຢ່າງນ້ອຍທີ່ສຸດພາຍຫຼັງຮຽນຈົບຖ້າບໍ່ມີໂອກາດໄດ້ຮຽນຕໍ່ກໍ່ໃຫ້ໄດ້ບົດຮຽນກະສິກຳຈາກທີ່ນີ້ໄປທຳມາຫາກິນຕໍ່ ແລະເປັນການໝູນໃຊ້ພື້ນທີ່ຫວ່າງເປົ່າໃນຮົ້ວໂຮງຮຽນສ້າງໃຫ້ເປັນປະໂຫຍດ ນອກຈາກນັກຮຽນ-ຄູອາຈານເອົາໄປກິນເອງແລ້ວເຫຼືອຍັງສາມາດຂາຍເປັນສິນຄ້າໄດ້ອີກ.
ອາຈານ ສົມຈິດ ໄຊສົມບຸນ ບອກກັບລາວອັບເດດວ່າ: ຢູ່ໂຮງຮຽນກິນນອນຊົນເຜົ່າແຫ່ງນີ້ພາຍຫຼັງເລີກໂຮງຮຽນໜຶ່ງໃນກິດຈະກຳຂອງນ້ອງໆນັກຮຽນແມ່ນການລົງສວນຜັກເພື່ອບົວລະບັດ, ໃສ່ຝຸ່ນ ແລະ ລົກຫຍ້າ. ຄູປະຈຳຫ້ອງຈະເລີ່ມນຳພານ້ອງນັກຮຽນປູກຜັກຕັ້ງແຕ່ເດືອນ ກັນຍາຂອງທຸກໆປີ.
ໂດຍສົກຮຽນໜຶ່ງສາມາດປູກໄດ້ເຖິງ 4-5 ຊຸດຜັກດັ່ງກ່າວແມ່ນຂາຍເຂົ້າເຮືອນຄົວຂອງໂຮງຮຽນ ແລະ ນຳເງິນດັ່ງກ່າວນັ້ນມາເປັນເງິນຄັງຫ້ອງໝູນໃຊ້ໃນເວລາຈຳເປັນ. ສິ່ງທີ່ດີໄປກວ່ານັ້ນຄືຜັກດັ່ງກ່າວແມ່ນໃຫ້ນ້ອງໆນັກຮຽນຂອງໂຮງຮຽນເປັນຄົນກິນ ເພື່ອຫຼີກລ້ຽງບໍ່ໃຫ້ນ້ອງນັກຮຽນເຈັບໄຂ້ໄດ້ປ່ວຍອັນເນື່ອງມາຈາກສານພິດປົນເປື້ອນ.
ອາຈານສົມຈິດຍັງບອກອີກວ່າ: ພວກເຮົາແມ່ນພະຍາຍາມບໍ່ໄປຊື້ຜັກຈາກຕະຫຼາດ ແຕ່ພັດຕັ້ງໃຈປູກຜັກປອດສານຜິດ ແລະ ໃສ່ຝຸ່ນຄອກ ຫຼື ຝຸ່ນບົ່ມ ທີ່ບໍ່ມີສານເຄມີ, ເປົ້າໝາຍອັນຫຼັກໆອີກອັນໜຶ່ງກໍເພື່ອໃຫ້ນັກຮຽນຮຽນຮູ້ວິຊາກະສິກຳການປູກຝັງ ແລະ ອາໄສເວລາທີ່ເຄື່ອນໄຫວກິດຈະກຳນີ້ສ້າງຄວາມສາມັກຄີພາຍໃນໂຮງຮຽນ ແລະກໍ່ໄດ້ຜົນຕາມທີ່ຄາດໄວ້ ໂຮງຮຽນກິນນອນຊົນເຜົ່າອຸດົມໄຊຈິ່ງສືບຕໍ່ກິດຈະກຳນັ້ນເລື້ອຍມາເພາະເປັນຄວາມປະທັບໃຈແທ້ໆ.
ຄວາມງາມສວນຜັກນ້ອງນ້ອຍຈະງົດງາມຂະໜາດໃດຊົມຄຣິບວີດີໂອຂ້າງລຸ່ມນີ້ເລີຍ
-----------------
Laos Update : ໃຫ້ທ່ານຫຼາຍກວ່າຂ່າວ
&via=stc_network)
0 comments:
Post a Comment