ເປີດສາກປີ 2018 ສາວລົດແກ້ວ ອິນທະກຸມມານ ເຮັດໃຫ້ແຟນໆບໍ່ຜິດຫວັງ ດ້ວຍການຄວ້າອັນດັບ 5 ໃນລາຍການທໍາອິດ ກ່ອນຈະພັດທະນາຂຶ້ນຄວ້າຮອງແຊັມ ໃນລາຍການໃຫຍ່ຢ່າງ Amazing Thailand Marathon Bangkok ເມື່ອທ້າຍອາທິດທີ່ຜ່ານມາ ແລະ ລາວຕັ້ງເປົ້າຕິດ 1 ໃນ 5 ສໍາລັບລາຍການຕໍ່ໄປອາທິດນີ້ ເພື່ອຮັກສາມາດຕະຖານນີ້ຕໍ່ໄປ.
ສາວ ລົດແກ້ວ ເປີດເຜີຍຕໍ່ແອັດມິນນົກວ່າ: ທ້າຍອາທິດນີ້ ນ້ອງກຽມໄປແຂ່ງຂັນຢູ່ ແຂວງບູລີລໍາ ປະເທດໄທ ໃນລາຍການ Buriram International Marathon ທີ່ຈະຈັດຂຶ້ນໃນວັນທີ 11 ກຸມພາ 2018 ເຊິ່ງປີນີ້ ເປັນຄັ້ງທີ 2 ເປັນລາຍການທີ່ໃຫຍ່, ນ້ອງຈະແຂ່ງໃນລາຍການ 10 ກິໂລແມັດ ພ້ອມຕັ້ງຄວາມຫວັງຕິດ 1 ໃນ 5 ອັນດັບທໍາອິດໃຫ້ໄດ້ ເພື່ອຫວັງຮັກສາມາດຕະຖານນີ້ໄວ້.
ສໍາລັບ ສາວລົດແກ້ວ ກາຍເປັນທີ່ຮູ້ຈັກໃນວົງການນັກແລ່ນລາວຢ່າງເຕັມຕົວເມື່ອ 2013 ເຂົ້າຮ່ວມແຂ່ງຂັນກິລາຊີເກມຄັ້ງທີ 27 ທີ່ປະເທດມຽນມາ ຍາດໄດ້ຫຼຽນທອງຈາກລາຍການແລ່ນ 10,000 ແມັດ.
ປີ 2014 ເຂົ້າຮ່ວມແຂ່ງຂັນກິລາເອຊຽນເກມທີ່ ອິນຊອນ ສ ເກົາຫຼີ ແລະ ກິລາແຫ່ງຊາດຄັ້ງທີ 10 ທີ່ແຂວງອຸດົມໄຊ ຍາດໄດ້ 2 ຫຼຽນຄໍາ ຈາກລາຍການແລ່ນ 1500 ແລະ 3000 ແມັດ,
ພ້ອມເຂົ້າຮ່ວມແຂ່ງຂັນກິລາມະຫາວິທະຍາໄລອາຊຽນຄັ້ງທີ 17 ທີ່ປາແລມບັງ ປະເທດອິນໂດເນເຊຍ ຍາດໄດ້ 1 ຫຼຽນຄໍາ ( 10,000 ແມັດ), 1 ຫຼຽນເງິນ (5000 ແມັດ), 1 ຫຼຽນທອງ (1500 ແມັດ).
ໃນເດືອນກໍລະກົດ 2016 ເຂົ້າຮ່ວມງານກິລາມະຫາວິທະຍາໄລອາຊຽນຄັ້ງທີ 18 ຢູ່ສິງກະໂປ ຍາດໄດ້ 1 ຫຼຽນຄໍາ (ແລ່ນໄລຍະ 800 ແມັດ) ແລະ 1 ຫຼຽນເງິນ (ແລ່ນໄລຍະ 5000 ແມັດ) ແລະ ເຂົ້າຮ່ວມແຂ່ງຂັນກິລາມະຫາວິທະຍາໄລລາວຄັ້ງທີ 1 ທີ່ມະຫາວິທະຍາໄລແຫ່ງຊາດ ຍາດໄດ້ 2 ຫຼຽນຄໍາ ຈາກລາຍການແລ່ນ 800 & 3000 ແມັດ .
ຈົນຫຼ້າສຸດ ສ້າງຄວາມພາກພູມໃຈໃຫ້ກັບຊາວລາວທັງປະເທດ ສາມາດຍາດໄດ້ຫຼຽນທອງ ໃນລາຍການ ແລ່ນ 1500 ແມັດ ໃນຊີເກມ 2017 ທີ່ມາເລເຊຍ ເມື່ອເດືອນສິງຫາ ທີ່ຜ່ານມາ.
ປັດຈຸບັນ ລົດແກ້ວ ອາຍຸ 22 ປີ ຫາກໍ່ຈົບການສຶກສາຈາກມະຫາວິທະຍາໄລແຫ່ງຊາດ ຄະນະວິທະຍາສາດປ່າໄມ້, ພາກວິຊາທ່ອງທ່ຽວອະນຸຮັກ ແລະ ກໍາລັງສຶກສາທີ່ ວິທະຍາໄລ ລາວ-ທ໊ອບ ພາສາອັງກິດ ປີທີ 3 ແລະ ປີ 2018 ແມ່ນເຂົ້າຮ່ວມລາຍການ Khokaen International Marathon ຄັ້ງທີ 15 ເມື່ອວັນທີ 28 ມັງກອນ 2018 ທີ່ແຂວງຂອນແກ່ນ ປະເທດໄທ ສາມາດຍາດໄດ້ອັນດັບທີ 5 ລຸ້ນທົ່ວໄປຍິງ ກ່ອນຈະພັດທະນາຂຶ້ນດ້ວຍການຄວ້າອັນດັບທີ 2 ໃນລາຍການຫຼ້າສຸດ.
ຂອບໃຈຮູບຈາກ: Lodkeo
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment