ເອົາແຕ່ເຊົ້າມືດ, ໄຟໄໝ້ສາງເກັບມ້ຽນເຄື່ອງ

ກ່ອນອື່ນຕ້ອງຂໍສະແດງຄວາມເສຍໃຈນຳເຈົ້າຂອງກິດຈະການທີ່ຕ້ອງສູນເສຍຊັບສິນເປັນຈຳນວນມະຫາສານ ຈາກເຫດການໄຟໄໝ້ຄັ້ງນີ້. ເຫດເກີດໃນເວລາປະມານ 3:50 ນາທີຂອງເຊົ້າມື້ນີ້ 8 ກຸມພາ 2018 ໄດ້ເກີດເຫດໄຟໄໝ້ຂຶ້ນທີ່ສາງມ້ຽງເຄື່ອງເສັ້ນທາງເລກ 13 ໃຕ້ ເຂດບ້ານໂພນຕ້ອງ ເມືອງໄຊທານີ ນະຄອນຫຼວງວຽງຈັນ.

ພາຍຫຼັງເຫດເກີດຂຶ້ນ ປະຊາຊົນໄດ້ແຈ້ງມາຍັງໜ່ວຍກູ້ໄພມູນນິທິຈີນ1628, ຈາກນັ້ນອາສາສະໝັກກູ້ໄພໄດ້ອອກກວດສອບເຫດທັນທີ ພົບເຫັນເປັນສາງເກັບເຄື່ອງຂາຍ ແລະໄຟກຳລັງຈະລາມມາຫາເຮືອນໃຫຍ່ ດັ່ງນັ້ນໜ່ວຍກູ້ໄພມູນນິທິຈີນ 1628 ພ້ອມປະຊາຊົນບ້ານໃກ້ຄຽງແລະເຈົ້າໜ້າທີ່ມອດໄຟນະຄອນຫຼວງວຽງຈັນ(ດັບເພີງ)ໄດ້ຮ່ວມກັນສະກັດກັ້ນແລະຄຸມເພີງໄດ້ເປັນທີ່ຮຽບຮ້ອຍແລ້ວ.

ສາເຫດຂອງໄຟໄໝ້ຍັງບໍ່ທັນເປັນທີ່ຊັດເຈນ ແຕ່ເບິ່ງຈາກພາບແລ້ວທຸກຢ່າງຖືກເຜົາຈົນກາຍເປັນເຖົ່າຖ່ານ ເຖິງຈະມີສິ່ງຂອງລອດເຫຼືອກໍ່ຄົງບໍ່ສາມາດໃຊ້ການໄດ້ແລ້ວ. ອີກເທື່ອໜຶ່ງຂໍສະແດງຄວາມເສຍໃຈນຳຫຼາຍໆ ແລະຂໍໃຫ້ທຸກຄົນມີສະຕິໃນການໃຊ້ຟືນໄຟ ເພາະຊ່ວງນີ້ມີລົມພັດແຮງ, ທຸກບ່ອນທຸກທີ່ແຫ້ງເມື່ອມີແປວໄຟເລັກນ້ອຍກໍ່ສາມາດຕິດໄຟໄດ້ໂດຍງ່າຍ.