ທ່ານ ອຳໄພວັນ ຈັນທະລາວົງ ຫົວຫນ້າຄູເຝິກ ສະໂມສອນ ນະຄອນຫຼວງ ຢູໄນເຕັດ ຊຸດດີວີຊັ່ນ 1 ຕົກລົງຍ້າຍຮ່ວມ ສະໂມສອນ ດີເຄ ເອັຟຊີ ທີມໃນການແຂ່ງຂັນບານເຕະ ເປບຊີ ລາວພຣີເມຍລີກ 2018 ເປັນທີ່ຮຽບຮ້ອຍ. ພ້ອມຂໍເປີດຕົວນັດແຮກ ແລກເກມກັບ ຫຼວງພະບາງ ເພື່ອເອົາໃຈແຟນບານ
ອີງຕາມຂໍ້ມູນຈາກເຟັສບຸກສະໂມສອນ ດີເຄ ເອັຟຊີ ໃນຊາບວ່າ : ສະໂມສອນ ດີເຄ ເອັຟຊີ ຕົກລົງດືງຕົວ ທ່ານ ອຳໄພວັນ ຈັນທະລາວົງ ຫົວຫນ້າຄູເຝິກ ສະໂມສອນ ນະຄອນຫຼວງ ຢູໄນເຕັດ ຊຸດດີວີຊັ່ນ 1 ມາເປັນຄູເຝິກໃຫຍ່ຂອງທີມເພື່ອລຸຍການແຂ່ງຂັນບານເຕະ ເປບຊີ ລາວພຣີເມຍລີກ 2018 ເປັນທີ່ຮຽບຮ້ອຍ.
ໂອກາດດັ່ງກ່າວ, ທ່ານ ອຳໄພວັນ ຈັນທະລາວົງ (ຊ້າງ) ກໍ່ໄດ້ໃຫ້ສຳພາດວ່າ : ຈຸດເລີ່ມຕົ້ນຂອງການກ້າວສູ່ການເປັນຄູເຝິກເຕັມຕົວແບບນີ້ ແມ່ນເກີນຈາກຄຳດູຖູກ ແລະ ຄຳຢຽບຢາມຂອງຄູເຝິກໃຫຍ່ບາງຄົນ ທີ່ມິນປະມານໃນຕົວເຮົາ ດ້ວຍຄຳວ່າ “ເຮົາເປັນພຽງນັກຂ່າວ ເຮົາຈະໄປຮູ້ຈັກຫຍັງກັບການເຕະບານ” ຈາກນັ້ນ ກໍ່ເລີ່ມພິສູດຕົວເອງເລື້ອຍມາ ເຊິ່ງໄດ້ການແນະນຳຈາກຫົວໜ້າກໍ່ຄື ທ່ານ ສຸກສາຄອນ ສີປະເສີດ ໃນການຕັດເຕືອນ ແລະ ຫາວິທີການຈັດສັນເວລາໃຫ້ຖືກຕ້ອງ ໂດຍທີ່ບໍ່ໃຫ້ມີປັນຫາກັບວຽກງານ ພ້ອມກັບຕົນເອງໂຊກດີ ທີ່ໄດ້ຮັບໂອກາດຈາກ ທ່ານ ພັນທະຈິດ ອິນທິລາດ ປະທານ ລ້ານຊ້າງ ຢູໄນເຕັດ ທີ່ສະໜັບສະໜູນເລື້ອຍມາຈົນເຖິງປັດຈຸບັນນີ້. ແຕ່ນັ້ນຍັງບໍ່ພໍ ການທີ່ເຮົາເລີ່ມຄຸມນະຄອນຫຼວງ ທີມດີວີຊັ່ນ 1 ກໍ່ຍັງມີຄູເຝິກຫຼາຍຄົນເຂົ້າມາໂຈມຕີ ໃນການຄຸມທີມ ເຊິ່ງເວົ້າຫຼາຍຢ່າງໃນທາງທີ່ບໍ່ດີ ໂດຍສະເພາະ ເລື່ອງສາຍອາຊີບນັກຂ່າວ ແລະ ການເປັນຄູເຝິກມືໃໝ່ ແຕ່ຕົວເອງກໍ່ບໍ່ໄດ້ທໍ້ ຈຶ່ງເກັບຄຳເວົ້ານັ້ນໄວ້ ແລ້ວພິສູດຕົວເອງທີ່ຜົນງານ ສຸດທ້າຍທຸກຢ່າງກໍ່ຈົບດ້ວຍສິ່ງດີດີ ທີ່ທຸກຄົນເຫັນ.
ສ່ວນ ການຕັດສິນໃຈມາຮ່ວມທີມ ດີເຄ ເອັຟຊີ ໃນປີນີ້ ຕ້ອງບອກວ່າ ເປັນໂຊກສະຕາຂອງຕົວເອງຫຼາຍກວ່າ ຄະນະບໍລິຫານງານຂອງ ດີເຄ ເອັຟຊີ ມີຈຸດໝາຍອັນດຽວກັນ ແລະ ທຸກຄົນເຮັດວຽກແບບຄອບຄົວ. ນັກກິລາກໍ່ຮູ້ຈັກກັນດີ ແລະ ອີກຢ່າງໜຶ່ງ ທີ່ມັກສຸດ ຄືທິດທາງການດັນນັກເຕະເຍົາວະຊົນຂຶ້ນມາແຂ່ງຂັນລາຍການນີ້ ເຊິ່ງເປັນສິ່ງທີ່ຕົວເອງຖະນັດ ແລະ ຕ້ອງການເຮັດມັນ ເຖິງແມ້ວ່າມັນຈະຍາກ ແຕ່ບໍ່ໄດ້ຍາກຖ້າຕົວເຮົາເອງຢາກເຮັດ. ສ່ວນ ນັດແຮກໃນອາທິດນີ້ ແນ່ນອນ ຈະຂໍແລກເກມກັບ ຫຼວງພະບາງ ເພື່ອເອົາໃຈແຟນບານ ໂດຍສະເພາະ “ຄົນຂ້າງສະໜາມ“ ຫວັງວ່ານັດນີ້ ຈະໄດ້ຮັບກຽດມານັ່ງຊົມ.
ພ້ອມກັນນັ້ນ, ຄູເຝິກນັກຂ່າວສາຍກິລາ ກໍ່ຍັງໄດ້ກ່າວຕື່ມອີກວ່າ : ກ່ອນອື່ນກໍ່ຕ້ອງຂອບໃຈຫົວໜ້າສູນ ແລະ ປະທານ ລ້ານຊ້າງ ແລະ ນະຄອນຫຼວງ ທີ່ໃຫ້ໂອກາດ. ແລະ ສິ່ງທີ່ຂາດບໍ່ໄດ້ກໍ່ຄື ອ້າຍນ້ອງສື່ມວນຊົນລາວທຸກໆຄົນ ກໍ່ຄື ນັກຂ່າວ ທີ່ໃຫ້ການສະໜັບສະໜູນ ຊ່ວຍເຫຼືອ ກັນຕະຫຼອດມາ. ຕໍ່ຈາກນີ້ໄປ ກໍ່ຈະຂໍສືບຕໍ່ສ້າງຜົນງານ ແລະ ສ້າງຊື່ສຽງ ໃຫ້ສົມກັບອ້າຍເື້ອອຍນ້ອງໝູ່ຄູ່ນັກຂ່າວທຸກຄົນເຊື່ອໝັ້ນ ແລະ ຄ່ອຍໃຫ້ກຳລັງໃຈເລື້ອຍໆ.
ສຳລັບ ທ່ານ ອຳໄພວັນ ຈັນທະລາວົງ ແມ່ນເປັນຄູເຝິກຄົນໜຶ່ງ ທີ່ມີອາຊີບເປັນນັກຂ່າວສາຍກິລາ ຂອງໜັງສືພິມສຶກສາ ແລະ ກິລາ ລາຍວັນ (ສູນໂຄສະນາຂ່າວສານ ແລະ ກິລາ ກະຊວງສຶກສາທິການ ແລະ ກິລາ) ຈາກຈຸດເລີ່ມຕົ້ນໃນການຫຼິ້ນຕຳແຫນ່ງຜູ້ຮັກສາປະຕູ ຫຼາຍໆສະໂມສອນໃນລາວ ປະກອບມີ : ສະໂມສອນ ມູນເດີໄນ, ປກສ ເອັຟຊີ, ຊິດຕີ ກອຟປີ້ ເຊັນເຕີ, ອິສເຕີນ ສະຕຣາ ເອຟຊີ, ລາວລ້ານຊ້າງ ແລະ ລ້ານຊ້າງ ຢູໄນເຕັດ ໃນປີ 2014. ນອກນັ້ນ ຍັງເຄີຍຮັບໃຊ້ຊາດໃນຕຳແໜ່ງຜູ້ຮັກສາປະຕູຟຸດຊໍລາວ ຕັ້ງແຕ່ປີ 2012 ຫາ 2014 ແລະ ຍັງເຄີຍຄວ້າຫຼຽນຄຳ ໃນງານກິລາແຫ່ງຊາດ ທີ່ແຂວງອຸດົມໄຊ ໃຫ້ກັບແຂວງວຽງຈັນ ເປັນປະຫວັດສາດ. ສ່ວນຜົນງານໃນການເປັນຄູເຝິກ ໃນປີ 2014 ຫາ 2016 ແມ່ນເປັນຄູເຝິກຜູ້ຮັກສາປະຕູຂອງສະໂມສອນ ລ້ານຊ້າງ ຢູໄນເຕັດ, 2017 ມາເປັນຜູ້ຊ່ວຍຄູເຝິກສະໂມສອນ ນະຄອນຫຼວງ ຢູໄນເຕັດ ແລະ 2017 ກໍ່ໄດ້ຮັບໂອກາດຄຸມທີມສະໂມສອນ ນະຄອນຫຼວງ ຢູໄນເຕັດ ຊຸດດີວີຊັ່ນ 1 ເຂົ້າຮ່ວມການແຂ່ງຂັນເຕະບານ ດີວີຊັ່ນ 1 ປີ 2017 ພ້ອມກັບຄວ້າອັນດັບ 3 ມາຄອງ ແລະ ຍັງຄຸມທີມຟຸດຊໍ ນະຄອນຫຼວງ ຢູໄນເຕັດ ເຂົ້າຮ່ວມການແຂ່ງຂັນຟຸດຊໍລີກ 2017 ພ້ອມດ້ວຍຮອງແຊ໋ມ. ນອກຈາກນັ້ນ ຜົນງານຄຸມທີມຟຸດຊໍຂອງ ທ່ານ ອຳໄພວັນ ຈັນທະລາວົງ ຍັງເຄີຍພາທີມຟຸດຊໍໂຮງຮຽນພາກເອກະຊົນ ຄວ້າຫຼຽນຄຳ ໃນຟຸດຊໍງານກິລາມະຫາວິທະຍາໄລລາວ ຄັ້ງທີ 1 ໃນປີ 2016 ນຳອີກ.
ການແຂ່ງຂັນບານເຕະ ເປບຊີ ລາວພຣີເມຍລີກ 2018 ຈະເລີ່ມເປີດສາກຄວາມມັນໃນວັນເສົາ 24 ກຸມພາ ທີ່ຈະມາເຖິງນີ້.
+ ວັນເສົາ 24 ກຸມພາ 2018
- ເວລາ 15:00 ສະໂມສອນ ປກສ ເອຟຊີ ພົບ ສະໂມສອນ ສະຫວັນ ຢູໄນເຕັດ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ ທີວີລາວ )
- ເວລາ 17:30 ສະໂມສອນ ລາວໂຕໂຢຕ້າ ພົບ ສະໂມສອນ ກອງທັບ ເອຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ ທີວີລາວ )
+ ວັນອາທິດ 25 ກຸມພາ 2018
- ເວລາ 17:00 ສະໂມສອນ ຊ້າງນ້ອຍ ເອຟຊີ ພົບ ສະໂມສອນ ມາສເຕີ ເຊເວັນ ເອຟຊີ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16 ( ຖ່າຍທອດສົດ mycujoo.tv )
Link ຖ່າຍທອດສົດ : https://mycujoo.tv/lao-football-federation?id=13344
- ເວລາ 17:00 ສະໂມສອນ ດີເຄ ເອຟຊີ ພົບ ສະໂມສອນ ຫລວງພະບາງ ຢູໄນເຕັດ ແຂ່ງຂັນຢູ່ທີ່ສະຫນາມກິລາ ມຊ
ຂໍ້ມູນຈາກ: ຈໍາປາກິລາລາວ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment