ວັນທີ 6 ກຸມພາ 2018 ນີ້ ຢູ່ທີ່ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ໄດ້ຈັດພິທີທຳລາຍຕູ້ເກມຢອດຫຼຽນ ແລະ ຕູ້ເກມການພະນັນທີຜິດກົດໝາຍຂຶ້ນ ໂດຍການເປັນປະທານຂອງ ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ; ມີສະຫະພັນຍິງແຂວງ,ພະແນກການຕ່າງປະເທດແຂວງ,ທະຫານ-ຕໍາຫຼວດ,ຕາງໜ້າກົງສູນໃຫຍ່ ສປ ຈີນ ປະຈຳແຂວງຫຼວງພະບາງ,ແຂກຖືກເຊີນ ຕະຫຼອດຮອດຄູອາຈານ,ນັກຮຽນມັດທະຍົມ ແລະ ນ້ອງນ້ອຍເຍົາວະຊົນເຂົ້າຮ່ວມ.
ທ່ານ ສີສະຫວາດ ຍີ່ລັດໃຈ ຫົວໜ້າຂະແໜງວັດທະນະທຳ ກ່າວວ່າ: ໂດຍປະຕິບັດຕາມຂໍ້ກຳນົດຂອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ສະບັບເລກທີ 664/ຖວທ,ລົງວັນທີ 22 ກັນຍາ 2003 ວ່າດ້ວຍການຄຸ້ມຄອງ, ກວດກາ ແລະ ອະນຸຍາດຫຼິ້ນເກມທຸກປະເພດໃນ ສປປ ລາວ,ຄຳສັ່ງແນະນຳຂອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເລກທີ 286/ຖວທ,ລົງວັນທີ 8 ພຶດສະພາ 2017 ວ່າດ້ວຍການຫ້າມບໍ່ໃຫ້ອອກໃບອະນຸຍາດ ສ້າງຕັ້ງສູນບໍລິການຕູ້ເກມໃນຂອບເຂດທົ່ວປະເທດ.
ຄະນະກຳມາການສະເພາະກິດ ແຂວງຫຼວງພະບາງ ໄດ້ສົມທົບກັບພາກສ່ວນທີ່ກ່ຽວຂ້ອງ ຕັ້ງໜ້າລົງເຄື່ອນໄຫວ ກວດກາ ແລະ ປະຕິບັດໜ້າທີ່ຕາມພາລະບົດບາດ ດ້ວຍຄວາມຮັບຜິດຊອບສູງ ແລະ ໄລຍະຜ່ານມາໄດ້ຈັດພິທີທຳລາຍໄປແລ້ວ 3 ຄັ້ງ ເຊິ່ງຄັ້ງນີ້ເປັນຄັ້ງທີ່ 4. ການຈັດພິທີທຳລາຍປີນີ້ ຄະນະກຳມາການສະເພາະກິດແຂວງ,ສາມາດຢືດຕູ້ເກມທີ່ບໍ່ຖືກຕ້ອງໄດ້ຢູ່ 4 ແຫ່ງ ລວມຕູ້ເກມທັງໝົດ 33 ໜ່ວຍ. ໃນນັ້ນ ປະກອບມີຕູ້ເກມຢອດຫຼຽນນ້ອຍ 8 ໜ່ວຍ, ຕູ້ເກມການພະນັນຂະໜາດກາງ 14 ໜ່ວຍ ແລະ ຕູ້ເກມການພະນັນໃຫຍ່ 11 ໜ່ວຍ.ຈາກນັ້ນຜູ້ເຂົ້າຮ່ວມກໍ່ໄດ້ຮ່ວມກັນເປັນສັກຂີພິຍານ ເບິ່ງການທຳລາຍຕູ້ເກມຢ່າງເປັນທາງການ.
ຂ່າວ: ເພັດສາຄອນ ສິມມະວົງ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment