ການເປັນສະມາຊິກພັກສົມບູນຖືເປັນຄວາມຫວັງຄັ້ງສຳຄັນ ຂອງຜູ້ທີ່ເຮັດວຽກໃນອົງການຈັດຕັ້ງພັກ-ລັດ ເພາະນັ້ນໝາຍເຖິງການປະພຶດປະຕິບັດຕົວດີ ສາມາດເປັນຫົວຈັກຫຼັກແຫຼ່ງ, ເປັນແບບຢ່າງແກ່ພະນັກງານລັດຖະກອນຄົນອື່ນໆ ແລະເປັນທີ່ເພິ່ງຂອງປະຊາຊົນ ຊຶ່ງປີນີ້ມີຜູ້ໄດ້ເປັນສະມາຊິກພັກສົມບູນເກືອບ 700 ຄົນ.
ກອງປະຊຸມມອບບັດສະມາຊິກພັກສົມບູນ ຊຸດທີ I ຢູ່ແຂວງໄຊສົມບູນໄດ້ຈັດຂຶ້ນໃນຕອນເຊົ້າຂອງວັນທີ 1 ກຸມພາ ປີ 2018 ທີຜ່ານມາທີ່ສະໂມສອນ ເມືອງອະນຸວົງ ແຂວງໄຊສົມບູນ ໃຫ້ກຽດເປັນປະທານຂອງ ທ່ານ ບຸນສຸກ ຈອມວິສານ ຮອງເລຂາພັກແຂວງ, ປະທານສະພາປະຊາຊົນແຂວງໄຊສົມບູນ, ມີສະຫາຍເລຂາ, ຮອງເລຂາ, ພະແນກ-ອົງການ, ກົມກອງ ພ້ອມດ້ວຍສະມາຊິກພັກສົມບູນອ້ອມຂ້າງແຂວງເຂົ້າຮ່ວມ ໃນພິທີ ສະຫາຍ ນາງ ສາຍສະໝອນ ແສງເມືອງ ກຳມະການພັກແຂວງ, ຫົວໜ້າຄະນະຈັດຕັ້ງແຂວງໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ວ່າດ້ວຍການຮັບຮອງອອກບັດສະມາຊິກພັກສົມບູນ ໃຫ້ແກ່ສະມາຊິກພັກສົມບູນຂອງຄະນະພັກຮາກຖານ, ໜ່ວຍພັກຮາກຖານ, ບັນດາພະແນກການ, ອົງການ, ກົມກອງຂອງຫ້ອງການ, ກົມກອງອ້ອມຂ້າງແຂວງ ເຊິ່ງໄດ້ຮັບທັງໝົດ 697 ສະຫາຍ.
ໃນນັ້ນ ສະເພາະບັນດາຄະນະພັກຮາກຖານ, ໜ່ວຍພັກຮາກຖານຂັ້ນແຂວງ ໄດ້ຮັບເອົາທັງໝົດ 265 ສະຫາຍ ຈາກນັ້ນພິທີໄດ້ມອບບັດໃຫ້ສະມາຊິກພັກຄະນະພັກຮາກຖານ ບັນດາພະແນກການ, ອົງການ, ກົມກອງຕາມລຳດັບ ໂດຍເປັນກຽດມອບຂອງສະຫາຍ ບຸນສຸກ ຈອມວິສານ, ໂອກາດດຽວກັນນີ້ ສະຫາຍ ບຸນສຸກ ຈອມວິສານ ໄດ້ໂອ້ລົມຕໍ່ພິທີ ເຊິ່ງໄດ້ເນັ້ນໜັກໃຫ້ສະມາຊິກພັກ ຈົ່ງກຳແໜ້ນລະບຽບພັກປະຊາຊົນປະຕິວັດລາວວາງອອກ. ຈົ່ງພ້ອມກັນສ້າງໜ່ວຍພັກຂອງຕົນໃຫ້ປອດໃສ, ເຂັ້ມແຂງ ແລະ ໜັກແໜ້ນ ພ້ອມຈິດພ້ອມໃຈກັນສືບຕໍ່ປະຕິບັດໜ້າທີ່ວຽກງານ ຕາມການມອບໝາຍຂອງພັກ-ລັດໃຫ້ປະກົດຜົນເປັນຈິງ ສຳຄັນແມ່ນການເປັນແບບຢ່າງນຳໜ້າສ້າງແຂວງໄຊສົມບູນໃຫ້ມີບາດກ້າວໃໝ່ຍິ່ງໃຫຍ່ຂຶ້ນເປັນລຳດັບ.
ຂ່າວ ປກສ ແຂວງໄຊສົມບູນ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment