ສິ່ງທີ່ຜູ້ບໍລິຫານຫລືຜູ້ກ້າວຂຶ້ນເປັນຫົວຫນ້າຄວນມີ ນອກເໜືອໄປຈາກການເຮັດໜ້າທີ່ຂອງຕົວເອງໃຫ້ດີທີ່ສຸດແລ້ວນັ້ນຄືການບໍລິຫານຄົນ ເພາະເຈົ້າຕ້ອງມີລູກນ້ອງທີ່ຕ້ອງຮັບຜິດຊອບເພື່ອໃຫ້ລະບົບການເຮັດວຽກຂອງບໍລິສັດເປັນໄປຢ່າງມີປະສິດທິພາບ, ແຕ່ເນື່ອງຈາກຄວາມແຕກຕ່າງຂອງຕົວບຸກຄົນບາງຄັ້ງຈຶ່ງພົບວ່າມັນເປັນເລື່ອງທີ່ຍາກ.
ຢ່າງໃດກໍ່ຕາມ, ມື້ນີ້ແອັດມີນຂໍນໍາເອົາ 5 ເຄັດລັບການບໍລິຫານຄົນໃຫ້ໄດ້ຜົນດີມາແນະນໍາ
1.ສື່ສານກັນໃຫ້ຊັດເຈນ:
ການສື່ສານເປັນເລື່ອງທີ່ມີຄວາມສຳຄັນຫຼາຍທີ່ສຸດອັນດັບຕົ້ນໆໃນການບໍລິການຄົນ ເພາະຫຼາຍຄັ້ງທີ່ຫົວໜ້າ ແລະ ລູກນ້ອງສື່ສານກັນບໍ່ເຂົ້າໃຈກໍ່ຈະສົ່ງຜົນໃຫ້ເຮັດວຽກຜິດພາດ ຫຼື ຊໍ້າຊ້ອນຈົນຕ້ອງເສຍເວລາມານັ່ງແກ້ໄຂໃນພາຍຫຼັງ.
2.ຢ່າເຈົ້າກີ້ເຈົ້າການຫຼາຍເກີນໄປ:
ຜູ້ເປັນຫົວໜ້າບໍ່ຕ້ອງເຮັດໜ້າທີ່ເປັນຜູ້ຄຸມທີ່ຖ້າສັ່ງສອນຜູ້ນັ້ນຜູ້ນີ້ເພື່ອເຮັດໃຫ້ໄດ້ຢ່າງທີ່ໃຈຕົນເອງຕ້ອງການ, ພຽງແຕ່ມອບໝາຍ ແລະ ຕິດຕາມແບບຫ່າງໆກໍ່ພໍແລ້ວ ເພາະການໄປຈໍ້າຈີ້ຫຼາຍເກີນໄປກໍ່ອາດເຮັດໃຫ້ພະນັກງານເກີດຄວາມຕຶງຄຽດ, ກົດດັນ ແລະ ຮູ້ສຶກອຶດອັດເມື່ອຕ້ອງມາເຮັດວຽກ ໂດຍປ່ອຍໃຫ້ພວກເຂົາໄດ້ເຮັດຕາມໜ້າທີ່ຂອງຕົວເອງຈະດີກວ່າ.
3.ຮັບຟັງຄວາມເຫັນຂອງພະນັກງານ:
ເມື່ອໃດກໍ່ຕາມທີ່ພະນັກງານຂອງເຈົ້າຢາກສະແດງຄວາມຄິດເຫັນ ຫຼື ເຂົ້າມາຂໍຄໍາປຶກສາຈົ່ງເປີດໃຈຮັບຟັງ ລວມທັງເປີດໂອກາດໃຫ້ເຂົາໄດ້ສົນທະນາກັນຢ່າງເຕັມທີ່, ຢ່າເຮັດເປັນບໍ່ສົນໃຈ, ເມີນເສີຍ ຫຼື ເບິ່ງວ່າມັນເປັນເລື່ອງນ້ອຍໆ. ເພາະຢ່າງໃດກໍ່ຕາມ, ລາວກໍ່ເປັນຄົນຂອງເຈົ້າ, ເປັນຜູ້ຊ່ວຍເຫຼືອ ແລະ ເຮັດໃຫ້ວຽກເດີນໜ້າຕໍ່ໄປໄດ້. ສະນັ້ນ, ໃຫ້ຮັບຟັງຄືທີ່ລາວຮັບຟັງເຈົ້າສະເໝີ.
4.ກ່າວຍ້ອງຍໍ:
ທຸກໆຄັ້ງທີ່ພະນັກງານຂອງເຈົ້າສ້າງຜົນງານອອກມາດີກໍ່ໃຫ້ກ່າວຍ້ອງຍໍຊົມເຊີຍເພື່ອສ້າງກໍາລັງໃຈໃນການເຮັດວຽກໃຫ້ກັບລາວ ແລະ ທີ່ສຳຄັນຍັງເຮັດໃຫ້ພະນັງານຮູ້ສຶກວ່າການທຸ່ມເທທັງກາຍ ແລະ ໃຈໄປກັບວຽກນັ້ນບໍ່ເສຍໄປລ້າໆ ເພາະຢ່າງໜ້ອຍເຈົ້າກໍ່ເຫັນຄວາມສໍາຄັນໃນຕົວຂອງລາວຢູ່.
5. ຮີບຮ້ອນໃນການຕັດສິນ:
ໃນບາງຄັ້ງທີ່ພະນັກງານຂອງເຈົ້າເຮັດໃນສິ່ງທີ່ນອກເໜືອ ຫຼື ແຕກຕ່າງຈາກທີ່ເຈົ້າມອບໝາຍໄປກໍ່ຢ່າຟ້າວຕັດສິນວ່າລາວບໍ່ຟັງຄໍາສັ່ງ, ໃຫ້ລອງຖາມເຫດຜົນກ່ອນວ່າເປັນຫຍັງຈຶ່ງເຮັດແບບນັ້ນແລ້ວລອງພິຈາລະນາໃນມູມກັບກັນວ່າ: ຖ້າຫາກຕົວເຈົ້າຕົກຢູ່ໃນສະຖານະການດຽວກັບລາວເຈົ້າຈະເຮັດແນວໃດ ເຊິ່ງບາງເທື່ອກໍ່ອາດຄືກັນກໍ່ໄດ້ ເພາະວ່າຜົນການເຮັດວຽກຂອງພະນັກງານເຈົ້າມັນບໍ່ໄດ້ກໍ່ໃຫ້ເກີດຄວາມເສຍຫາຍຫຍັງຫຼາຍກໍ່ຢ່າຖືເປັນເລື່ອງໃຫຍ່ ແລະ ສະແດງຄວາມເຫັນໃຈເພື່ອໃຫ້ ລາວມີກໍາລັງໃຈໃນການເຮັດວຽກນັ້ນຕໍ່ໄປໃຫ້ດີຂຶ້ນຈະດີກວ່າ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment