ກົມຕຳຫຼວດສະກັດກັ້ນ ແລະ ຕ້ານອັກຄີໄພໃຫ້ຮູ້ວ່າ: ອາທິດຜ່ານມາ ເປັນໄລຍະສະຫຼອງເທສະການປີໃໝ່ຂອງຊາວຫວຽດນາມ ແລະ ຈີນ ໂດຍໃນທົ່ວປະເທດ ໄດ້ມີອັກຄີໄພເກີດຂຶ້ນ 6 ຄັ້ງ ຄື:
+ໃນວັນທີ 19 ກຸມພາ 2018 ເວລາປະມານ 5:00 ໂມງ ໄດ້ເກີດໄຟໄໝ້ເຮືອນຂອງນາງ ໝ່ວຍ ອາຍຸ 50 ປີ ຢູ່ບ້ານອຸດົມຜົນ ເມືອງໄຊທານີ ນະຄອນຫຼວງວຽງຈັນ ໄດ້ຮັບຄວາມເສຍຫາຍເຮືອນ 1 ຫຼັງ ລວມມູນຄ່າເສຍຫາຍກວ່າ 2 ຮ້ອຍລ້ານກີບ
+ຢູ່ແຂວງຈຳປາສັກ ເກີດຂຶ້ນ 2 ຄັ້ງຄື: ວັນທີ 12 ກຸມພາ 2018 ໄດ້ເກີດໄຟໄໝ້ເຮືອນຂອງນາງ ນ້ອຍ ອາຍຸ 50 ປີ ຢູ່ບ້ານທ່າຫຼວງ ເມືອງປາກເຊ ຜົນເສຍຫາຍເຮືອນ 1 ຫຼັງ ແລະ ລົດຈັກ 1 ຄັນ ແລະ ມື້ດຽວກັນໄດ້ເກີດໄຟໄໝ້ເຮືອນຂອງທ້າວ ພອນປະເສີດ ອາຍຸ 40 ປີ ຢູ່ບ້ານຮ່ອງຄະຍອມ ເມືອງປາກເຊ ໄດ້ຮັບຜົນເສຍຫາຍເຮືອນ 2 ຫຼັງ ແລະ ຖືກໄຟລວກ 3 ຫຼັງ ໂດຍສາເຫດຍັງຢູ່ໃນຂັ້ນຕອນສືບສວນ-ສອບສວນ ແລະ
+ໃນວັນທີ 13 ກຸມພາ 2018 ເວລາປະມານ 14 ໂມງ ໄດ້ເກີດເຫດໄຟໄໝ້ໂຮງງານປຸງແຕ່ງໄມ້ພອນສັກຂອງທ້າວ ຄຳປະສິດ ສີມຸກດາ ອາຍຸ 46 ປີ ຢູ່ບ້ານຄຳທອງ ເມືອງສາລະວັນ ໂດຍເຈົ້າໜ້າທີ່ໄດ້ລະດົມກຳລັງ 40 ຄົນ ໃຊ້ລົດມອດໄຟ 12 ຄັນ ແລະ ໃຊ້ເວລາດັບມອດໄຟເຖິງ 15 ຊົ່ວໂມງ ຈຶ່ງສາມາດຄວບຄຸມໄຟໄວ້ໄດ້ ຜົນເສຍຫາຍແມ່ນມີໄມ້ທ່ອນຖືກໄຟໄໝ້ 15 ພັນແມັດກ້ອນ ໂດຍສາເຫດແມ່ນເກີດຈາກໄຟໄໝ້ປ່າແລ້ວລາມມາໃສ່ໂຮງງານ
+ວັນທີ 15 ກຸມພາ 2018 ໄດ້ເກີດໄຟໄໝ້ຕະຫຼາດຂາຍເຄື່ອງຄົບວົງຈອນເຊໂນ ເມືອງອຸທຸມພອນ ແຂວງສະຫວັນນະເຂດ ຜົນເສຍຫາຍມີຮ້ານຂາຍເຄື່ອງ 6 ຫ້ອງລວມມູນຄ່າຫຼາຍກວ່າ 1 ຕື້ກີບ.
ເຈົ້າໜ້າທີ່ໃຫ້ຮູ້ວ່າ: ສາເຫດສ່ວນໃຫຍ່ທີ່ພາໃຫ້ເກີດອັກຄີໄພ ແມ່ນຍ້ອນໄຟຟ້າລັດວົງຈອນໄຟໄໝ້ປ່າ ຊົມໃຊ້ຟືນໄຟໂດຍປະໝາດ ແລະ ເພື່ອຮັບປະກັນໃຫ້ສະພາບການເກີດອັກຄີໄພຫຼຸດຜ່ອນລົງ ເຈົ້າໜ້າທີ່ກ່ຽວຂ້ອງຈະໄດ້ເພີ່ມທະວີການໂຄສະນາ ເຝິກອົບຮົມການສະກັດກັ້ນ ແລະ ຕ້ານອັກຄີໄພຢູ່ຕາມສະຖານທີ່ ແລະ ຊຸມຊົນຕ່າງໆໃຫ້ມີປະສິດທິຜົນກວ່າເກົ່າ.
ແຫຼ່ງທີ່ມາຈາກ ຫນັງສືພິມວຽງຈັນໃຫມ່
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment