ລາວ-ໄທ ຫາແກ້ໄຂບັນຫາແຮງງານເຄື່ອນຍ້າຍ ຫຼັງຈາກທີ່ມີແຮງງານລາວຈຳນວນຫຼາຍຍັງຂຶ້ນທະບຽນບໍ່ແລ້ວ
ຂປລ. ໃນວັນທີ 26 ກຸມພາ 2018 ທີ່ນະຄອນຫລວງວຽງຈັນ, ກະຊວງແຮງງານ ແລະ ສະຫວັດດີການສັງຄົມຂອງລາວ ແລະ ກະຊວງແຮງງານຂອງໄທ ໄດ້ພົບປະສອງຝ່າຍ ເພື່ອປຶກສາຫາລື ແລະ ສືບຕໍ່ຮ່ວມມືແກ້ໄຂບັນຫາ ກ່ຽວກັບແຮງງານເຄື່ອນຍ້າຍ ຝ່າຍລາວນຳໂດຍ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະ, ຝ່າຍໄທ ນຳໂດຍທ່ານ ພົນຕຳຫລວດເອກ ອະດຸນ ແສງສິງແກ້ວ ລັດຖະມົນຕີວ່າການກະຊວງແຮງງານ ແຫ່ງ ຣາຊະນາຈັກໄທ ພ້ອມດ້ວຍຄະນະ. ທັງນີ້, ກໍເພື່ອສັນຕິພາບ ແລະ ຄວາມໝັ້ນຄົງໃນພາກພື້ນ ໂດຍສືບຕໍ່ຜັນຂະຫຍາຍເນື້ອໃນຈິດໃຈ ຂອງບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ ໃຫ້ປະກົດຜົນເປັນຈິງ ແລະ ເພື່ອຫັນເອົາແຮງງານ ທີ່ຜິດກົດໝາຍ ໃຫ້ເຂົ້າສູ່ລະບຍບກົດໝາຍຫລາຍຂຶ້ນ.
ພາຍຫລັງສຳເລັດ ການປັບສະຖານະພາບ ແຮງງານລາວ ທີ່ເຮັດວຽກບໍ່ຖືກຕ້ອງຕາມກົດໝາຍ ຢູ່ປະເທດໄທ ໃນທ້າຍເດືອນມິຖຸນາ 2018, ຖ້າຫາກຍັງມີແຮງງານລາວ ທີ່ຍັງບໍ່ທັນໄດ້ປັບສະຖານະພາບ ແມ່ນໃຫ້ເດີນທາງກັບປະເທດ ເພື່ອດຳເນີນເອກະສານ ໃຫ້ຖືກຕ້ອງໂດຍຜ່ານລະບົບ MOU. ນອກຈາກນີ້ທາງການລາວ ຍັງໄດ້ສະເໜີໃຫ້ຝ່າຍໄທ ສະໜອງຂໍ້ມູນແຮງງານລາວ ທີ່ດຳເນີນການປັບສະຖານະພາບ ຍັງບໍ່ທັນແລ້ວ ເພື່ອເປັນບ່ອນອີງໃຫ້ແກ່ຝ່າຍລາວ ໃນການວາງແຜນຈັດຕັ້ງປະຕິບັດ ໃຫ້ທັນກັບກຳນົດເວລາ ແລະ ໃຫ້ມີການເຊື່ອມຕໍ່ຂໍ້ມູນແຮງງານລາວ ທີ່ໄປເຮັດວຽກຢູ່ປະເທດໄທ.
ການຫາລືຄັ້ງນີ້, ແມ່ນເພື່ອກຽມຮັບມື ມາດຕະການທີ່ດີ ແລະ ເພື່ອຊອກວິທີແກ້ໄຂ ບັນຫາຮ່ວມກັນດ້ວຍຄວາມຈິງໃຈ, ຊຶ່ງການຮ່ວມມືຂອງສອງ ກະຊວງແຮງງານລາວ ແລະ ໄທ ຈະສືບຕໍ່ແກ້ໄຂບັນຫາແຮງງານ. ທັງນີ້, ກໍເພື່ອຜົນປະໂຫຍດຂອງປະຊາຊົນທັງສອງຊາດ ລາວ-ໄທ ໂດຍສະເພາະ ແມ່ນຊາວຜູ້ອອກແຮງງານ ໄດ້ຮັບການປົກປ້ອງທາງດ້ານສິດ ແລະ ຜົນປະໂຫຍດ, ເພື່ອໃຫ້ມີການເຄື່ອນຍ້າຍແບບປອດໄພ, ພ້ອມທັງໄດ້ມີໂອກາດ ພັດທະນາສີມື ມີວຽກເຮັດງານທຳທີ່ໜັ້ນຄົງ, ມີສະຫວັດດີການດີ ແລະ ໄດຮັບຄວາມຍຸດຕິທຳ.
ໃນວັນທີ 20 ກຸມພາ ຜ່ານມ ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດກອງປະຊຸມ ພາຍໃຕ້ການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.ໂດຍ ມີຮອງລັດຖະມົນຕີ ກະຊວງການຕ່າງປະເທດ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ມີການລາຍງານໃຫ້ຮູ້ວ່າ: ຫຼັງຈາກທາງການລາວໄດ້ສົ່ງພະນັກງານເຂົ້າໄປປັບສະຖານະພາບໃຫ້ແກ່ແຮງງານລາວ (ກຸ່ມບັດສີຊົມພູ) ທີ່ຍັງເຫຼືອ ຈຳນວນ 71 ພັນກວ່າຄົນຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 448/ຫສນຍ,ກສວ, ລົງວັນທີ 23 ມີນາ 2017 ຊຶ່ງໜ່ວຍງານປັບສະຖານະພາບແຮງງານລາວໄດ້ຕັ້ງຢູ່ຫ້າງ IT Square ເຂດຫຼັກ 4 ກຸງເທບມະຫານະຄອນ ປະເທດໄທ. ຜ່ານການຈັດຕັ້ງປະຕິບັດວຽງານ ແຕ່ວັນທີ 28 ສິງຫາ 2017 ຮອດວັນທີ 31 ມັງກອນ 2018 (5 ເດືອນ) ສາມາດອອກໜັງສືຢັ້ງຢືນສະຖານະພາບບຸກຄົນ (CI) ແລະ ບັດອະນຸຍາດເຮັດວຽກໃຫ້ແຮງງານຜູ້ທີ່ມີບັດສີບົວ ໄດ້ຈຳນວນທັງໝົດ 24.684 ຄົນ, ໃນນັ້ນ ເປັນແຮງງານ ຈຳນວນ 22.422 ຄົນ( ຍິງ 11.525 ຄົນ), ຜູ້ຕິດຕາມ 2.262 ຄົນ( ຍິງ 1.062 ຄົນ), ຍັງອີກຈໍານວນ 46 ພັນກວ່າຄົນທີ່ຕ້ອງໄດ້ປະຕິບັດໃຫ້ສຳເລັດພາຍໃນວັນທີ 31 ມີນາ 2018.
ທ່ານ ຄຳແພງ ໄຊສົມແພງ ກ່າວວ່າ: ອີງໃສ່ຂໍ້ມູນ ປີ 2016 ທີ່ຝ່າຍໄທໄດ້ແຈ້ງໃຫ້ຝ່າຍລາວຮູ້ວ່າ ມີແຮງງານທີ່ມີບັດສີຊົມພູປະມານ 71 ພັນກວ່າຄົນ ຊຶ່ງຈະໝົດອາຍຸ ວັນທີ 31 ມີນາ 2018 ໃຫ້ຝ່າຍລາວ ຮີບຮ້ອນເຂົ້າມາດຳເນີນການປັບສະຖານະພາບໃຫ້ຖືກຕ້ອງ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment