ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ລົງເຄື່ອນໄຫວ ຕິດຕາມການຈັດຕັ້ງປະຕິບັດຂໍ້ຕົກລົງ ວ່າດ້ວຍການຈັດສັນຄວາມເປັນລະບຽບຮຽບຮ້ອຍພາຍໃນຕົວເມືອງ ແລະ ຊານເມືອງ ວັນທີ 27 ກຸມພາ 2018 ທີ່ສະໂມສອນເມືອງສີສັດຕະນາກ ນະຄອນຫຼວງວຽງຈັນ ມີທ່ານ ໂພຄຳ ໄຊຍະສອນ ເຈົ້າເມືອງສີສັດຕະນາກ ພ້ອມດ້ວຍພະແນກການກ່ຽວຂ້ອງ ຄະນະພັກເມືອງ ນາຍບ້ານ ແລະ ພະນັກງານກໍ່ສ້າງຮາກຖານການເມືອງເຂົ້າຮ່ວມ.
ທ່ານ ພອນສັນ ສາວະລີ ຫົວໜ້າຫ້ອງວ່າການປົກຄອງເມືອງສີສັດຕະນາກ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ແກ້ໄຂຄວາມບໍ່ສະຫງົບ ຄວາມບໍ່ເປັນລະບຽບຮຽບຮ້ອຍ ວ່າ: ເມືອງສີສັດຕະນາກ ໄດ້ເປີດຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບການຈັດຕັ້ງປະຕິບັດວຽກງານ 3 ຫຼຸດ 3 ເພີ່ມຂອງນະຄອນຫຼວງວຽງຈັນ ຕາມຂໍ້ຕົກລົງວ່າດ້ວຍການເປີດຂະບວນການແຂ່ງຂັນຮັກຊາດ ແລະ ພັດທະນາ ເຊິ່ງຜ່ານການຈັດຕັ້ງປະຕິບັດມີຫຼາຍວຽກງານທີ່ພົ້ນເດັ່ນ ໂດຍສະເພາະການຈັດສັນຄວາມບໍ່ເປັນລະບຽບຮຽບຮ້ອຍຂອງຕະຫຼາດ 4 ແຫ່ງພາຍໃນເມືອງສີສັດຕະນາກ ແລະ ສຳເລັດໄປແລ້ວ 1 ແຫ່ງ ຄື: ຕະຫຼາດສີຂຽວດອນກອຍ ປັດຈຸບັນກຳລັງດຳເນີນຢູ່ຕະຫຼາດໜອງຈັນ ຕະຫຼາດທົ່ງພານທອງ ຕະຫຼາດສວນມອນ ໂດຍມີໜ້າວຽກຫຼັກແມ່ນມາດຖານຄວາມສະອາດຂອງຕະຫຼາດ ບ່ອນຈອດລົດ ຫຼັງຄາ ອາຄານ ໄຟຟ້າ ແລະ ການຕິດຕັ້ງບັ້ງດັບເພີງ ຮ້ານຂາຍເຄື່ອງກໍ່ສ້າງ ແລະ ຮ້ານຂາຍເຄື່ອງຕາມຖະໜົນຄູວຽງ ພ້ອມນັ້ນ ຍັງມີຈຸດອ່ອນທີ່ຈະຕ້ອງສືບຕໍ່ແກ້ໄຂ ເພື່ອເຮັດໃຫ້ເມືອງສີສັດຕະນາກ ມີຄວາມເປັນລະບຽບຮຽບຮ້ອຍ ແລະ ສະອາດຈົບງາມ.
ໃນໂອກາດນີ້ ທ່ານເຈົ້າຄອງ ໄດ້ເປີດໂອກາດໃຫ້ບັນດາພະແນກການກ່ຽວຂ້ອງຜັດປ່ຽນກັນ ປະກອບຄຳຄິດຄຳເຫັນ ເປັນຕົ້ນແມ່ນການແກ້ໄຂຄວາມບໍ່ສະອາດຂອງເມືອງ ການຂາຍເຄື່ອງຊະຊາຍຂອງແມ່ຄ້າຊາວຂາຍຢູ່ແຄມທາງຕະຫຼາດຂົວດິນ ຂ້າງໂຮງໝໍມະໂຫສົດ ການຕິດປ້າຍບໍ່ຖືກຕາມລະບຽບການຂອງຜູ້ປະກອບການ ແລະ ສະຖານທີ່ອື່ນໆ ທີ່ມີການຂາຍເຄື່ອງຊະຊາຍ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດສຳເລັດຕາມແຜນການທີ່ວາງໄວ້ ແນໃສ່ເຮັດໃຫ້ເມືອງສີສັດຕະນາກມີຄວາມເປັນລະບຽບຮຽບຮ້ອຍ ສະອາດ ຈົບງາມ ທັງປະຕິບັດນະໂຍບາຍ 6ສ ຂອງເຈົ້າຄອງນະຄອນຫຼວງວຽງຈັນຕື່ມອີກ ເພື່ອຕ້ອນຮັບໃຫ້ແກ່ປີທ່ອງທ່ຽວລາວ 2018.
ຕອນທ້າຍ ທ່ານເຈົ້າຄອງນະຄອນຫຼວງວຽງຈັນ ໄດ້ຍ້ອງຍໍຊົມເຊີຍຕໍ່ຄະນະພັກເມືອງ ກໍ່ຄືພາກສ່ວນກ່ຽວຂ້ອງທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນຢ່າງເຂັ້ມງວດ ພ້ອມນັ້ນ ທ່ານໄດ້ແນະນຳໃຫ້ເມືອງສີສັດຕະນາກສືບຕໍ່ເຮັດໃຫ້ໄດ້ດີ ແລະ ເຂັ້ມແຂງກວ່າເກົ່າ ໂດຍໃຫ້ເອົາໃຈໃສ່ການປະຕິບັດຂໍ້ແຂ່ງຂັນຮັກຊາດ ແລະ ພັດທະນາຕິດພັນກັບການຮັກເມືອງຫຼວງ ໂດຍຈັດຕັ້ງຜັນຂະຫຍາຍເປີດຂະບວນການແຂ່ງຂັນ ເພື່ອເຮັດໃຫ້ບັນດາປາກົດການຫຍໍ້ທໍ້ດ້ານອັກຄີໄພຢາເສບຕິດ ແລະ ອຸບັດຕິເຫດຫຼຸດໜ້ອຍຖອຍລົງເປັນກ້າວໆ.
ແຫລງທີ່ມາຈາກhttps://www.vientianemai.net
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment