ຊຽງຂວາງມາໄວ ຮູ້ແລ້ວກຳນົດຫຼີ້ນບຸນປີໃໝ່ລາວ

ແຂວງຊຽງຂວາງໂດຍສະເພາະໃນເທດສະບານແຂວງຫຼາຍປີມາແລ້ວ ທີ່ອຳນາດການປົກຄອງມັກຈະຈັດງານບຸນປີໃໝ່ລາວຢູ່ໜອງນ້ຳ ແຫ່ງໜຶ່ງທີ່ຢູ່ຫ່າງຈາກເທດສະບານແຂວງອອກໄປ ເຮັດໃຫ້ຫຼາຍຄົນທີ່ບໍ່ມີພາຫະນະເປັນຂອງຕົນເອງຕ້ອງອົດໄປທ່ຽວຫຼີ້ນໃນວັນປີໃໝ່ລາວ ແຕ່ປີນີ້ປ່ຽນໃໝ່ເອົາໃຈທຸກຄົນຈັດຢູ່ກາງເມືອງບັນຍາກາດຄົງຄືກຄື້ນ.

ອີງຕາມຂໍ້ຕົກລົງຈາກທ່ານເຈົ້າເມືອງໆແປກ ແຂວງຊຽງຂວາງ ສະບັບເລກທີ 58/ຈມຊຂ ລົງວັນທີ 8 ກຸມພາ 2018 ນີ້ແມ່ນເຫັນດີໃຫ້ກຸ່ມວິສາຫະກິດສວນພູຄຳ (ຜູ້ພັດທະນາສວນໜອງນ້ຳຫງຳເປັນສວນສາທາລະນະ) ຈັດບຸນປີໃໝ່ລາວ ພສ 2561 ຢູ່ສວນໜອງນ້ຳຫງຳ ເທດສະບານໂພນສະຫວັນ ເມືອງແປກແຂວງຊຽງຂວາງ ນັບແຕ່ວັນທີ 13-18 ເມສາ 2018.

ພ້ອມນີ້ເລື່ອງການລະດົມທຶນເປັນຕົ້ນແມ່ນການໃຫ້ເຊົ່າພື້ນທີ່, ຄ່າໃຊ້ຈ່າຍໃນການຈັດງານຕ່າງໆແມ່ນມອບໃຫ້ເປັນຄວາມຮັບຜິດຊອບຂອງສວນພູຄຳທັງໝົດ. ເອົາເປັນວ່າທ່ານໃດທີ່ບໍ່ເຄີຍໄປທ່ຽນບຸນປີໃໝ່ຢູ່ຊຽງຂວາງກໍ່ກຽມໃຈໄປໃຫ້ໄດ້ ເບິ່ງບັນຍາກາດກ່ອນໜອງນ້ຳຫງຳກ່ອນກໍ່ດີ ຮັບຮອງທ່ານຢາກໄປແນ່ນອນ.

ທີ່ສວນໜອງນ້ຳຫງຳໃນວັນປົກກະຕິກໍ່ມີງານຕະຫຼາດນັດເປັນປະຈຳທຸກໆວັນເລີ່ມເປີດແຕ່ 17:00-22:00 ໂມງ ນອກນີ້ທຸກໆທ້າຍເດືອນປະມານວັນທີ 20-30 ກໍ່ຈະມີງານຕະຫຼາດນັດຂາຍສິນຄ້າພື້ນບ້ານຂອງແຂວງຊຽງຂວາງ ຖ້າຈະເວົົ້າໄປແລ້ວສວນໜອງນ້ຳຫງຳ ຖືເປັນໃບໜ້າໃໝ່ຂອງແຂວງຊຽງຂວາງ.

ການເກີດຂຶ້ນຂອງໜອງນ້ຳຫງຳ ເຮັດໃຫ້ເທດສະບານແຂວງຊຽງຂວາງມີໂສມໜ້າປ່ຽນໄປ ທີ່ສຳຄັນສວນສາທາລະນະແຫ່ງນີ້ໄດ້ກາຍເປັນສະຖານທີ່ພັກຜ່ອນໃນຍາມວ່າງຂອງຊາວຊຽງຂວາງກໍ່ຄືແຂກທີ່ໄປຢ້ຽມຢາມ ເພາະສວນໜອງນ້ຳຫງຳມີເສັ້ນທາງປູເບຕົງທະລຸໂລ່ງແຕ່ເໜືອເຖິງໃຕ້ ທັງເຊື່ອມຕໍ່ກັບຫຼາຍເສັ້ນທາງໃນເທດສະບານແຂວງ ຊຶ່ງງ່າຍຕໍ່ການເດີນທາງເຂົ້າເຖິງ.