ກ່ອນອື່ນຕ້ອງຂໍຊົມເຊີຍກະຊວງການເງິນທີ່ເດັດຂາດກັບບັນຫາການກຳນົດນຳໃຊ້ພາສາ, ສະກຸນເງິນ ແລະການກຳນົດຕົວເລກຈຳນວນເງິນໃນຮູບແບບຂອງລາວໃຫ້ມີຄວາມເປັນເອກະພາບກັນໃນການນຳໃຊ້ທົ່ວປະເທດ. ຊຶ່ງບັນຫານີ້ເຮັດໃຫ້ເກີດຄວາມສັບສົນພໍສົມຄວນແກ່ການຕີລາຄາບາງຄັ້ງຄວນໃສ່ຈ້ຳພັດວ່າໄປໃສ່ຈຸດ ເທື່ອຄວນໃສ່ຈຸດກັບວ່າໄປເອົາເຄື່ອງໝາຍຈ້ຳໃສ່ ເຮັດໃຫ້ການອ່ານມູນຄ່າມີຄວາມຜິດພ້ຽນຈາກຄວາມຈິງ ໂດຍສະເພາະການລາຍງານຂ່າວຈາກສື່ມວນຊົນຜູ້ທີ່ຈະຈາຍຂໍ້ມູນຂ່າວສານທີ່ຖືກຕ້ອງສູ່ສັງຄົມ.
ຫຼ້າສຸດເພື່ອຄວາມເປັນເອກະພາບໃນເບື້ອງການນຳໃຊ້ ຫົວໜ້າຫ້ອງການກະຊວງການເງິນໄດ້ອອກແຈ້ງການ ລົງວັນທີ 20 ທັນວາ 2017 ເລື່ອງການນຳໃຊ້ພາສາ, ສະກຸນເງິນຕາ ແລະໂຕເລກຈຳນວນເງິນອອກມາແລ້ວ ໂດຍລະບຸວ່າ: ເພື່ອຈັດຕັ້ງປະຕິບັດກົດໝາຍວ່າດ້ວຍການບັນຊີ ມາດຕາ7 ກ່ຽວກັບການນຳໃຊ້ພາສາ, ສະກຸນເງິນຕາ ແລະໂຕເລກຈຳນວນເງິນໃຫ້ເປັນເອກະພາບໃນຂອບເຂດທົ່ວປະເທດກະຊວງການເງິນຈິ່ງເຫັນວ່າຄວນປະຕິບັດຄື:
- ບັນດາຫົວໜ່ວຍຖືບັນຊີແຫ່ງລັດ, ຫົວໜ່ວຍຖືບັນຊີວິສາຫະກິດ ແລະສະຖາບັນການເງິນໃນການບັນທຶກບັນຊີ, ປື້ມບັນຊີ ແລະເອກະສານລາຍງານການເງິນ ຕ້ອງສະແດງອອກເປັນພາສາລາວ, ສະກຸນເງິນກີບ ເວັ້ນເສຍແຕ່ໄດ້ຮັບອະນຸຍາດຈາກກະຊວງການເງິນ. ກໍລະນີມີເອກະສານລາຍງານເປັນເງິນຕາ ແລະພາສາຕ່າງປະເທດ ຕ້ອງລາຍງານເປັນເງິນກີບ, ເປັນພາສາລາວຄວບຄູ່ນຳ.
ສຳລັບທະນາຄານສາມາດບັນທຶກເປັນສະກຸນເງິນຕາຕ່າງປະເທດ ແຕ່ຕ້ອງລາຍງານເປັນພາສາລາວ ສະກຸນເງິນກີບຕາມການກຳນົດຂອງທະນາຄານແຫ່ງ ສປປ ລາວ.
ຕົວເລກຈຳນວນເງິນໃນບັນຊີໃຫ້ນຳໃຊ້ຕົວເລກອາຣັບ 1,2,3,4.......9 ແລະເຄື່ອງໝາຍຫົວໜ່ວຍເຊັ່ນ: ພັນ, ລ້ານ, ຕື້ ຂຶ້ນໄປໃຫ້ນຳໃຊ້ເຄື່ອງໝາຍຈ້ຳ (.) ແລະຈຳນວນເສດສ່ວນໃຫ້ນຳໃຊ້ເຄື່ອງໝາຍຈຸດ(,).
ເອົາເປັນວ່າໃຫ້ເຂົ້າໃຈຕາມນີ້ ແລະຫວັງວ່າຕໍ່ໄປຈະໄດ້ເຫັນການຂຽນລາຍງານຕົວເລກໃນຮູບແບບລາວຫຼາຍຂຶ້ນ ແລະເປັນເອກະພາບກັນໃນທີ່ສຸດ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment