ວິຖີພື້ນບ້ານ ຄວາມປະທັບໃຈທີ່ແຂກມັກ, ຈັດລາວຕິດ1 ໃນ 52 ປະເທດໜ້າທ່ຽວຂອງໂລກ

ແອັດມິນມັກຢ້ຳສະເໝີກ່ຽວກັບຈຸດຂາຍໄລຍະຍາວດ້ານການທ່ອງທ່ຽວ ບໍ່ມີຫຍັງຍືນຍົງຄົງຢູ່ໄດ້ຫຼາຍກວ່າການຮັກສາເອກະລັກພື້ນຖານຂອງປະຊາຊົນບັນດາເຜົ່າ ເພາະທຸກປະເທດໃນໂລກລ້ວນແຂ່ງຂັນກັນສ້າງຕຶກສູງ, ສ້າງຫ້າງຫຼູ ແຕ່ວິຖີພື້ນບ້ານຢູ່ແບບທຳມະຊາດຊົນນະບົດຄືບ້ານເຮົາມີໜ້ອຍແລ້ວ ນັກທ່ອງທ່ຽວທັງຫຼາຍຈິ່ງຫັນໄປນິຍົມພັກຜ່ອນກັບສະຖານທີ່ທຳມະດາແບບນັ້ນທີ່ບໍ່ມີໃນບ້ານເຂົາ.

ແລະກໍ່ເປັນເລື່ອງທີ່ໜ້າຍິນດີເມື່ອຂ່າວເປີດເຜີຍຈາກໜັງສືພິມ New York Time ເປີດເຜີຍໃນວັນທີ 10 ມັງກອນ 2018 ຜ່ານມາໃຫ້ຮູ້ວ່າ: ປີ 2018 ນີ້ລາວເຮົາໄດ້ຖືກຈັດເປັນ1 ໃນ 52 ປະເທດໜ້າທ່ຽວສຸດຂອງໂລກ ແລະເປັນພຽງ 1 ໃນສອງປະເທດຂອງອາຊຽນຄືລາວກັບກຳປູເຈຍ ເທົ່ານັ້ນທີ່ຖືກຈັດເຂົ້າໃນບັນຊີ.

ຂ່າວທີ່ລາວຕິດອັນດັບປະເທດໜ້າທ່ຽວຈັດຂຶ້ນໂດຍໜັງສືພິມນິວຢອກທາມ ໂດຍໂຫວດໃຫ້ລາວຕິດ 1 ໃນ 52 ສະຖານທີ່ນັ້ນຍ້ອນວ່າລາວເປັນປະເທດທີ່ສະຫງົບ, ປອດໄພ, ຢູ່ຢ່າງລຽບງ່າຍ ແລະຍັງສາມາດຮັກສາໄດ້ວິຖີພື້ນບ້ານໄດ້ເປັນຢ່າງດີເປັນຕົ້ນຢູ່ຫຼວງພະບາງ ໜຶ່ງໃນກິດຈະກຳທີ່ແຂກນັກທ່ອງທ່ຽວປະທັບໃຈກໍ່ຄືການໃສ່ບາດຕອນເຊົ້າ, ການພະຈົນໄພຍ່າງປ່າ ແລະຂີ່ຊ້າງຕາມສະຖານທີ່ທ່ອງທ່ຽວ.

ນອກຈາກນີ້ຫຼວງພະບາງຍັງມີສະຖານທີ່ທ່ອງທ່ຽວທາງວັດທະນະທຳ, ທຳມະຊາດ ແລະປະຫວັດສາດ ຫຼາຍແຫ່ງໃຫ້ໄປສຳຜັດ ພ້ອມດຽວກັນປະຊາຊົນກໍ່ຕ້ອນຮັບແຂກຄົນດ້ວຍຮອຍຍີ້ມ, ມີຮ້ານອາຫານທີ່ເປັນເອກະລັກຂອງທ້ອງຖິ່ນ, ທີ່ພັກອາໄສກໍ່ມີຫຼາຍລະດັບ ແລະການຂົນສົ່ງສະດວກສະບາຍສາມາດເຊື່ອມຕໍ່ກັບສະໜາມບິນປະເທດໃກ້ຄຽງຫຼາຍແຫ່ງ.