ການມອບ-ໂອນກຳມະສິດທີ່ດິນເປັນທີ່ຕ້ອງການຫຼາຍໃນທົ່ວສັງຄົມ ແລະກຳລັງມີລາຄາສູງຂຶ້ນນັບມື້ຈິ່ງກາຍເປັນຊ່ອງຫວ່າງໃຫ້ພວກຄົນບໍ່ດີສວຍໂອກາດຫາກິນໂດຍບໍ່ຊອບທຳ ງານນີ້ມີຜູ້ເສຍຫາຍຫຼາຍລາຍ, ສ່ວນຜູ້ກໍ່ເຫດຍີ້ມກິນໃນເບື້ອງຕົ້ນ ຕອນນີ້ຕິດຄຸກ ແລ້ວແມ່ນໃຜຈະມາໃຊ້ແທນ ເຫັນໃຈຜູ້ຕົກເປັນເຫຍື່ອ, ຄົນອື່ນໆທີ່ຈະຊື້ດິນຄວນເບິ່ງໃຫ້ຄັກຢ່າໃຫ້ຕົກໃນກໍລະນີນີ້.
ຜູ້ກໍ່ເຫດຊື່ທ້າວ ຫຼຽນທອງ ອາຍຸ 45 ປີ ອາຊີບເຮັດນາ ຢູ່ບ້ານນາຊາ ເມືອງປາກງື່ມ ນະຄອນຫຼວງວຽງຈັນ ຖືກເຈົ້າໜ້າທີ່ໜ່ວຍງານສອບສວນຄະດີອາຍາ-ເສດຖະກິດ ປກສ ເມືອງປາກງື່ມ ກັກຕົວມາດໍາເນີນຄະດີວັນທີ 19 ພຶດສະພາ 2017 ໃນຂໍ້ຫາສໍ້ໂກງຊັບ, ຍັກຍອກຊັບ ແລະ ປອມແປງເອກະສານ.ພາຍຫຼັງຜູ້ເສຍຫາຍໄດ້ເຂົ້າແຈ້ງຄວາມຕໍ່ເຈົ້າໜ້າທີ່ວ່າ: ທ້າວ ຫຼຽນທອງ ໄດ້ຕົວະຂາຍດິນໃຫ້ໃນລາຄາ 5 ແສນບາດ ແຕ່ດິນທີ່ໄດ້ພັດ ບໍ່ແມ່ນດິນທີ່ຕ້ອງການ.
ຜ່ານການສືບສວນສອບສວນຂອງເຈົ້າໜ້າທີ່ທ້າວ ຫຼຽນທອງ ໃຫ້ການຮັບສາລະພາບວ່າ: ໃນຄັ້ງວັນທີ 31 ກໍລະກົດ 2016 ໄດ້ໄປຕິດຕໍ່ຂາຍດິນ 1 ຕອນມີເນື້ອທີ່ 10.850 ແມັດ ຂອງນາງ ບຸນໜາ ທີ່ຕັ້ງຢູ່ບ້ານ ນາຊາ ເມືອງປາກງື່ມ ນະຄອນຫຼວງວຽງຈັນ ຂາຍໃຫ້ທ້າວ ບຸນມາ ໃນລາຄາ 5 ແສນບາດ ຈາກນັ້ນ ກໍບອກທ້າວ ບຸນມາວ່າດິນຕອນນັ້ນແມ່ນຂອງຕົນເອງ ແລ້ວໃຫ້ທ້າວ ບຸນມາຈ່າຍເງິນຄ່າມັດຈໍາກ່ອນ 1 ແສນບາດ ເມື່ອໄດ້ເງິນມາກໍປະກອບເອກະສານມອບໂອນກໍາມະສິດໃຫ້ ໂດຍເອົາດິນຂອງຕົນເອງທີ່ຂາຍໄປແລ້ວແຕ່ປີ 2013 ມາປະກອບເອກະສານຄືນໃໝ່ ເພື່ອຕົວະທ້າວ ບຸນມາ ໃຫ້ຈ່າຍເງິນຈໍານວນທີ່ຍັງເຫຼືອ. ເມື່ອໄດ້ເງິນຄົບຕາມຈໍານວນທີ່ຕົກລົງກັນກໍເອົາເງິນຈໍານວນ 6 ພັນບາດ ໄປໃຫ້ເຈົ້າຂອງດິນທີ່ຕິດຕໍ່ໄວ້ເພື່ອມັດຈໍາບໍ່ໃຫ້ຂາຍດິນໃຫ້ຄົນອື່ນ ແລະ ບອກເຈົ້າຂອງດິນວ່າ ຍັງບໍ່ທັນໄດ້ຂາຍດິນເທື່ອ.
ທ້າວ ຫຼຽນທອງ ຍັງຮັບສາລະພາບອີກວ່າ: ຜ່ານມາເຄີຍນໍາໃຊ້ວິທີການແບບນີ້ ຕົວະເອົາເງິນຄົນອື່ນອີກ 4 ຄັ້ງ ໄດ້ເງິນເປັນຈໍານວນຫຼາຍຮ້ອຍລ້ານກີບ. ຄືຄັ້ງວັນທີ 21 ພະຈິກ 2016 ໄດ້ໄປຕິດຕໍ່ຂາຍດິນຂອງທ້າວ ໝຸດ ຈໍານວນ 1 ຕອນໃນລາຄາ 8 ສີບພັນບາດ ແລະ ດິນຂອງທ້າວ ຮູ້ ຈໍານວນ 1 ຕອນ ໃນລາຄາ 75 ພັນບາດ ໂດຍຕິດຕໍ່ຂາຍໃຫ້ ນາງ ອໍາໄພພອນ ຢູ່ບ້ານສີບຸນເຮືອງທົ່ງ ເມືອງສີໂຄດຕະບອງ ເມື່ອໄດ້ເງິນມາຄົບຕາມຈໍານວນແລ້ວ ຜູ້ກ່ຽວໄດ້ເອົາໃຫ້ທ້າວ ໝຸດ ຈໍານວນ 76 ພັນບາດ ສ່ວນທ້າວ ຮູ້ ໄດ້ຮັບເງິນພຽງ 10 ພັນບາດ.
ຕໍ່ມາຄັ້ງວັນທີ 2 ທັນວາ 2016 ໄດ້ໄປຕິດຕໍ່ຂາຍດິນຂອງທ້າວ ແດນວິໄລ ບ້ານ ໜອງແຫ້ວ ເມືອງຫາດຊາຍຟອງ ໃນລາຄາ 2ແສນ 5 ສີບພັນບາດ ຂາຍໃຫ້ ນາງ ອໍາໄພພອນ ເມື່ອໄດ້ເງີນມາແລ້ວພັດບໍ່ເອົາໄປໃຫ້ ທ້າວ ແດນວິໄລ ເຈົ້າຂອງດິນແຕ່ຢ່າງໃດ, ມາໃນວັນທີ 19 ມັງກອນ 2017 ໄດ້ໄປຕິດຕໍ່ຂາຍດິນຂອງທ້າວທອງພັນ ທີ່ຕັ້ງຢູ່ບ້ານ ນາຊາ ເຊິ່ງຂາຍໃຫ້ນາງ ພອນທິບ ຢູ່ບ້ານສະຫວ່າງ ເມືອງຈັນທະບູລີ ໃນລາຄາ 60 ລ້ານກີບ. ພາຍຫຼັງທີ່ໄດ້ເງິນມາ ຜູ້ກ່ຽວກໍເອົາໄປໃຫ້ທ້າວ ທອງພັນ ພຽງແຕ່ 5 ລ້ານກີບ ເພື່ອມັດຈໍາບໍ່ໃຫ້ຜູ້ກ່ຽວຂາຍດິນໃຫ້ຄົນອື່ນ ພ້ອມທັງບອກວ່າຍັງບໍ່ທັນໄດ້ຂາຍດິນເທື່ອແລະ ໃນເດືອນ ກຸມພາ 2017 ໄດ້ຕິດຕໍ່ຂາຍດິນຂອງທ້າວ ວິໄລພອນ ໃນລາຄາ 1 ແສນ 35 ພັນບາດ ໃຫ້ນາງ ສາຍສະໝອນ ຫຼັງຈາກໄດ້ເງິນມາກໍ່ເອົາໄປໃຫ້ ເຈົ້າຂອງດິນພຽງ 8 ສີບພັນບາດ.
ເຈົ້າໜ້າທີ່ໜ່ວຍງານສືບສວນຄະດີອາຍາ-ເສດຖະກິດ ປກສ ເມືອງ ປາກງື່ມ ໄດ້ໃຫ້ຮູ້ວ່າ ປັດຈຸບັນຄະດີລາຍນີ້ ຢູ່ໃນຂັ້ນຕອນຂອງການສືບສວນ-ສອບສວນ ເພື່ອສະຫຼຸບສໍານວນ-ສໍາເນົາຄະດີ ສົ່ງໃຫ້ໄອຍາການສານປະຊາຊົນ ເຂດ II ຕັດສິນລົງໂທດຕາມລະບຽບຂອງກົດໝາຍ.
ຂອບໃຈແຫຼ່ງຂ່າວຈາກ ປ້ອງກັນຄວາມສະຫງົບນະຄອນຫຼວງວຽງຈັນ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment