ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທັງເປັນຫົວໜ້າຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ ກ່າວໃນກອງປະຊຸມເມື່ອອາທິດຜ່ານມາວ່າ: ມາຮອດປັດຈຸບັນ, ວຽກງານປັກຫລັກໝາຍຂອບເຂດແລວທາງລົດໄຟແຕ່ນະ ຄອນຫລວງວຽງຈັນ-ແຂວງຫລວງນໍ້າທາທີ່ມີຄວາມຍາວທັງໝົດ 409 ກິໂລແມັດແມ່ນສໍາເລັດແລ້ວ 100%. ສໍາລັບການເຈາະອຸໂມງໄດ້ກວ່າ 55 ແຫ່ງລວມມີຄວາມຍາວກວ່າ 48 ກິໂລແມັດ, ກໍ່ສ້າງຂົວ 66 ແຫ່ງ, ສ້າງເສົາຂົວສຳເລັດ 285 ເສົາ, ເຈາະເສົາເຂັມຂົວສໍາເລັດ 4.410 ເຂັມລວມຄວາມຍາວກວ່າ 119 ກິໂລ.
ສ່ວນວຽກອື່ນໆ ເຊັ່ນ: ການກໍ່ສ້າງເສັ້ນທາງເຂົ້າຫາສະຖານທີ່ກໍ່ສ້າງ, ຕິດຕັ້ງສາຍສົ່ງໄຟຟ້າ, ໝໍ້ແປງໄຟ, ກໍ່ສ້າງລະບົບນ້ຳປະປາເຫັນວ່າມີຄວາມຄືບໜ້າຕາມແຜນການວາງໄວ້ ແລະ ຂະນະດຽວກັນກໍພົບບາງບັນຫາຫຍຸ້ງຍາກຈໍານວນໜຶ່ງຄື: ສະພາບດິນຕາມແລວທາງບາງຈຸດເປັນດິນອ່ອນ ແລະ ອົມນໍ້າ ເຮັດໃຫ້ການເຈາະອຸໂມງມີຄວາມລຳບາກ ແລະ ໃຊ້ເວລາດົນ ແລະ ການສະໜອງພະລັງງານໄຟຟ້າໃນບາງຈຸດກໍ່ສ້າງບໍ່ພຽງພໍ ແລະ ໂດຍລວມເຫັນວ່າການກໍ່ສ້າງໂຄງການດັ່ງກ່າວມີຄວາມຄືບໜ້າປະມານ 26%.
ທ່ານຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ໃຫ້ຮູ້ຕື່ມວ່າ: ສໍາລັບວຽກງານແກ້ໄຂສິ່ງກີດຂວາງຕ່າງໆ, ມາຮອດປັດຈຸບັນ ສາມາດມອບພື້ນທີ່ໃຫ້ການກໍ່ສ້າງໄດ້ຫລາຍກວ່າ 87% ແລະ ຄ່າຊົດເຊີຍໃຫ້ຜູ້ຖືກກະທົບແມ່ນຈະຊຳລະໃຫ້ພາຍຫລັງ, ເຊິ່ງມີປະມານ 2.515 ຕື້ກວ່າກີບ. ປັດຈຸບັນມີງົບປະມານແລ້ວ 635 ຕື້ກີບ ແລະ ຍັງບໍ່ພໍ 1.880 ກວ່າຕື້ກີບ. ສ່ວນການອະນຸມັດນຳເຂົ້າອຸປະກອນ, ພາຫະນະ ແລະ ກົນຈັກ ໃຫ້ໂຄງການໄດ້ 7.096 ຊຸດ, ໃນນັ້ນພາຫະນະ ແລະ ກົນຈັກມີ 1.500 ຄັນ, ສ່ວນການອະນຸມັດນຳເຂົ້າແຮງງານໃນປີ 2017 ມີທັງໝົດ 17.750 ຄົນ ແລະ ປີ 2018 ແມ່ນປະມານ 11.550 ຄົນ.
ແຫລ່ງທີ່ມາຈາກໜັງສືພິມຄວາມສະຫງົບ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment